ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເມືອງຊໍາເໜືອ ແຂວງຫົວພັນ ໄດ້ຈັດພິທີສະເຫລີມສະຫລອງສວນແກ້ວຫລັກເມືອງ ຄົບຮອບ 16 ປີ ໃນວັນທີ 16 ພຶດສະພາ 2024 ທີ່ເດີນສວນມິດຕະພາບຫົວພັນ-ແທັງຮວ່າ ໂດຍມີທ່ານ ພຸດພັນ ແກ້ວວົງໄຊ ຮອງເຈົ້າແຂວງໆຫົວພັນ ພ້ອມດ້ວຍການນໍາແຂວງ, ເມືອງ, ພະສົງສາມະເນນ, ພະແນກການອ້ອມຂ້າງແຂວງ ແລະ ປະຊາຊົນພາຍໃນເທດສະບານແຂວງເຂົ້າຮ່ວມ.
ສວນແກ້ວຫລັກເມືອງ ໄດ້ສ້າງຂຶ້ນ ເພື່ອໃຫ້ເປັນສູນລວມທາງດ້ານຈິດໃຈ, ເຊີດຊູກຽດສັກສີ, ຊື່ສຽງ, ນາມມະຍົດ ມູນເຊື້ອວິລະຊົນ ຂອງປະຊາຊົນບັນດາເຜົ່າຊາວແຂວງຫົວພັນ ໃນດິນແດນເຂດທີ່ໝັ້ນ ຂອງການປະຕິວັດ, ເປັນຖິ່ນກໍາເນີດ ຂອງພັກປະຊາຊົນ ປະຕິວັດລາວ ແລະ ກອງທັບປະຊາຊົນລາວ ທັງເປັນສູນກາງນໍາພາ-ຊີ້ນໍາ ການປະຕິວັດຊາດ ຈົນສາມາດຍາດໄດ້ໄຊຊະນະຢ່າງສົມບູນ ໃນວັນທີ 2 ທັນວາ 1975.
ສວນແກ້ວຫລັກເມືອງແຫ່ງນີ້ ຍັງເປັນສັນຍາລັກໃຫ້ເຫັນພາບປະຈັກຕາ ຕາມກອນຂັບຊໍາເໜືອທີ່ວ່າ: “ຊໍາເໜືອເປັນໜ່ວຍແກ້ວ” ເພາະວ່າກ່ອນປີ 2008 ຄືນຫລັງ ໄດ້ຍິນແຕ່ສຽງຂັບ, ແຕ່ບໍ່ເຫັນປະຈັກຕາ ເປັນພຽງຄວາມສໍານຶກ ແຕ່ມາເຖິງມື້ນີ້ແມ່ນໄດ້ເຫັນປະຈັກຕາແລ້ວ, ເຊິ່ງເປັນໜ່ວຍແກ້ວ ແຫ່ງຄວາມກະຕັນຍູຮູ້ບຸນຄຸນ ຂອງຊາວແຂວງຫົວພັນຕໍ່ກັບບັນພະບຸລຸດ, ນັກຮົບ ແລະ ປະຊາຊົນບັນດາເຜົ່າທີ່ມີຄຸນງາມຄວາມດີຕໍ່ພາລະກິດປະຕິວັດຊາດ ກໍຄື ພາລະກິດແຫ່ງການຕໍ່ສູ້ປົກປັກຮັກສາ ແລະ ສ້າງສາແຂວງຫົວພັນ.
ເພື່ອເຮັດໃຫ້ສວນແກ້ວຫລັກເມືອງ ໄດ້ເປັນຫລັກບ້ານ ຫລັກເມືອງ ແລະ ເປັນມິ່ງແກ້ວຂວັນເມືອງຂອງປະຊາຊົນແຂວງຫົວພັນຕະຫລອດໄປນັ້ນ ຄະນະພັກ-ອໍານາດການປົກຄອງທຸກຂັ້ນ, ພະນັກງານ-ລັດຖະກອນ, ນັກຮຽນຮູ້ປັນຍາຊົນ ລວມທັງປະຊາຊົນບັນດາເຜົ່າທຸກຖ້ວນໜ້າ ຈົ່ງພ້ອມກັນຈົດຈໍາ ແລະ ຊື່ສັດຕໍ່ສັດຈະທໍາທັງ 4 ປະການ ທີ່ລະບຸໄວ້ໃນເສົາຫລັກເມືອງ ທີ່ວ່າ “ຢູ່ຮ່ວມກັນຢ່າງສັນຕິສຸກ, ບຸກບືນສ້າງສາຄວາມຈະເລີນ, ປົກຄອງບ້ານເມືອງໂດຍຍຸຕິທໍາ, ນໍາພາປະຊາຊົນຢູ່ ເຢັນເປັນສຸກ”.
ສວນແກ້ວຫລັກເມືອງ ໄດ້ກໍ່ສ້າງສໍາເລັດໃນປີ 2008 ນັບແຕ່ນັ້ນເປັນຕົ້ນມາ ການນໍາແຂວງ, ການນໍາເມືອງຊໍາເໜືອ ໄດ້ນໍາພາມວນຊົນພ້ອມກັນ ຈັດພິທີສະເຫລີມສະຫລອງໃນແຕ່ລະປີ. ໃນພິທີຈະມີຫລາຍກິດຈະກຳ ເປັນຕົ້ນ ພິທີທາງສາສະໜາ, ການຕັ້ງກອງທານ, ຄົບງັນຕະຫລອດຄືນ, ພິທີຕັກບາດຢາດນໍ້າຂໍພອນສິ່ງສັກສິດທັງປວງມາກຸ່ມກວມໃຫ້ ຊາວເມືອງຊໍາເໜືອ ກໍຄືແຂວງຫົວພັນໄດ້ຢູ່ເຢັນເປັນສຸກ ແລະ ເປັນການອຸທິດສ່ວນບຸນກຸສົນໄປໃຫ້ຜູ້ທີ່ລ່ວງລັບອີກດ້ວຍ.
ຂ່າວ-ພາບ: ນິດຖະໜອມ