ພິທີສະຫລຸບການແຂ່ງຂັນ ກິລາປີ່ງປ່ອງ ເຍົາວະຊົນໂລກ WTT Youth Contender 2023 ທີ່ສູນການຄ້າໄອເຕັກມໍ ຊັ້ນ 7 ຄັ້ງວັນທີ 20-23 ກັນຍາ 2023. ຈັດຂຶ້ນໃນຕອນຄ່ຳວັນທີ 13 ຕຸລາ 2023 ທີ່ໂຮງແຮມແລນມາກ ນະຄອນຫລວງວຽງຈັນ ໂດຍການເຂົ້າຮ່ວມຂອງທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການແລະກິລາ, ທ່ານ ຄຳແພງ ໄຊສົມແພງ ເຈົ້າແຂວງຫົວພັນ ທັງເປັນປະທານກິຕິມະສັກສະຫະພັນກິລາປິ່ງປ່ອງແຫ່ງຊາດລາວ, ທ່ານ ນາງ ແສງເດືອນ ຫລ້າຈັນທະບູນ ປະທານສະຫະພັນກິລາປິ່ງປ່ອງແຫ່ງຊາດລາວ ປະທານຈັດການແຂ່ງຂັນກິລາປີ່ງປ່ອງເຍົາວະຊົນໂລກ 2023, ມີຜູ້ຕາງຫນ້າຜູ້ໃຫ້ການສະຫນັບສະຫນູນ ພ້ອມດ້ວຍນັກກິລາແລະສື່ມວນຊົນເຂົ້າຮ່ວມ.
ທ່ານ ນາງ ສົມໃຈ ວົງສາ ເລຂາທິການສະຫະພັນກິລາປິ່ງປ່ອງແຫ່ງຊາດລາວ ໄດ້ສະຫລຸບລາຍງານຜົນການແຂ່ງຂັນໃນຄັ້ງນີ້ວ່າ: ຜ່ານການຈັດການແຂ່ງຂັນ ມາເປັນເວລາ 4 ວັນ, ຄະນະຮັບຜິດຊອບຈັດງານໄດ້ແຕ່ງຕັ້ງເຈົ້າໜ້າທີ່ ແຕ່ລະຝ່າຍຢ່າງເປັນລະບົບ ແລະ ມີຄວາມປອດໄພຮອບດ້ານ. ສະແດງອອກໃນຜົນການແຂ່ງຂັນ: ອັນດັບທີ1 ໄດ້ແກ່ ໄຕ້ຫວັນ ຂອງຈີນ ສາມາດຍາດໄດ້ຂັນຊະນະເລີດໄດ້ 8 ລາຍການ ໃນຮຸ້ນ 11ປີ ຊາຍ, 13 ປີຊາຍ, 15 ປີຊາຍ, 17 ປີຊາຍ, 17 ຍິງ, 19 ປີຊາຍ, ຄູປະສົມໃນຮຸ້ນອາຍຸ 15 ແລະ 17 ປີ. ອັນດັບທີ2 ໄດ້ແກ່ ສ.ເກົາຫຼີ ຍາດໄດ້ 2ລາຍການ ຄື: ຍິງດ່ຽວ ຮຸ້ນ 13ປີ ແລະ 15 ປີ. ອັນດັບທີ3 ຮົງກົງຂອງຈີນ ຍາດໄດ້ແຊ້ມ 1 ລາຍການຄື ດ່ຽວຍິງຮຸ້ນ 19ປີ, ຮອງແຊ້ມ 1 ລາຍການ ແລະ ອັນດັບສາມ 3 ລາຍການ.ອັນດັບທີ4 ປະເທດມາເລເຊຍ ໄດ້ແຊ້ມ 1 ລາຍການ, ອັນດັບທີ 5 ສປປ ລາວ ໄດ້ຮອງຊະນະເລີດ 2 ລາຍການ ຮຸ້ນອາຍຸ ບໍ່ເກີນ 11 ປີ ຊາຍ-ຍິງ ແລະ ອັນດັບທີສາມຮ່ວມ 2 ລາຍການ, ຮຸ້ນອາຍຸບໍ່ເກີນ 11 ປີ ຊາຍ.
ໂອກາດນີ້, ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການແລະກິລາ ໄດ້ສະແດງຄວາມຍິນດີຕໍ່ນັກກິລາແຕ່ລະປະເພດທີ່ສາມາດຍາດໄດ້ຜົນສຳເລັດທີ່ໜ້າເພີ່ງພໍໃຈ ພ້ອມທັງຊົມເຊີຍຄະນະຈັດງານແຂ່ງຂັນ ກິລາປີ່ງປ່ອງ ເຍົາວະຊົນໂລກ 2023 ແລະຜູ້ອຸປະຖຳທຸກພາກສ່ວນ ທີ່ຮ່ວມໃຈກັນຈັດງານໃນຄັ້ງນີ້ດ້ວຍຄວາມຮັບຜິດຊອບສູງ ເຮັດໃຫ້ການແຂ່ງຂັນໃນຄັ້ງນີ້ໄດ້ຮັບຜົນສຳເລັດຕາມລະດັບຄາດຫມາຍທີ່ວາງໄວ້, ພ້ອມທັງຊີ້ນຳໃຫ້ຄະນະຈັດການແຂ່ງຂັນຖອດຖອນບົດຮຽນເຊີ່ງກັນແລະກັນ ເພື່ອປັບປຸງແກ້ໄຂຂໍ້ຄົງຄ້າງບາງຈຸດ ແນໃສ່ເຮັດໃຫ້ການແຂ່ງຂັນ ກິລາປີ່ງປ່ອງເຍົາວະຊົນໂລກຄັ້ງຕໍ່ໄປ ມີປະສິດທິພາບແລະປະສິດທິຜົນດີຂຶ້ນກວ່າເກົ່າ.
