ເມື່ອບໍ່ດົນມານີ້,ການນຳແຂວງສະຫວັນນະເຂດນຳໂດຍ ທ່ານ ມົງກຸດເພັດ ວົງພະຈັນ ຮອງຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ຫົວໜ້າໂຄງການສະຫວັນຈໍາປາສະຫວັນນະເຂດ ໄດ້ໄປກວດກາຊຸກຍູ້ໂຄງການກໍ່ສ້າງສາລາສື່ຄວາມໝາຍໜອງເຮືອທອງທີ່ເມືອງໄຊບູລີ,ເຊິ່ງແມ່ນວຽກງານອະນຸລັກ ແລະ ຟື້ນຟູມໍລະດົກທາງວັດທະນະທຳໄປຄຽງຄູ່ກັບການຄົ້ນຄວ້າ ແລະ ເສີມສ້າງຄຸນຄ່າທາງປະຫວັດສາດ, ບູຮານຄະດີ ໂດຍມີຊື່ວ່າ ມໍລະດົກສະຖານໜອງເຮືອທອງ. ສາລາສື່ຄວາມໝາຍແຫ່ງນີ້ຈະເປັນບ່ອນໃຫ້ຂໍ້ມູນຂ່າວສານ ແລະ ເລື່ອງລາວທີ່ກ່າວຂານກ່ຽວກັບຄວາມເປັນມາຂອງນະຄອນສີໂຄດຕະບູນ ແລະ ສົມບັດທີ່ຄົ້ນພົບໃນສະຖານທີ່ນີ້ ແລ້ວຊ່ວຍໃຫ້ນັກທ່ອງທ່ຽວໄດ້ຄົ້ນຫາ ແລະ ຢ້ຽມຊົມສົມບັດທີ່ຈະນຳມາວາງສະແດງໄວ້ທີ່ຫໍພິພິທະພັນຄົບວົງຈອນ ຂອງແຂວງສະຫວັນນະເຂດ.
ທ່ານ ແສງອາລຸນ ທອງສະຫວັດ ສະຖາປານິກມໍລະດົກ ໃຫ້ຮູ້ວ່າ: ຈຸດປະສົງຫຼັກໃນການລົງມາຄັ້ງນີ້ກໍ່ເພື່ອກວດສອບເບີ່ງຄວາມຄືບໜ້າຂອງໜ້າວຽກໃນປັດຈຸບັນ ແລະຊ່ວຍທາງດ້ານເຕັກນິກການວາງແຜນຜັງ,ການປັບວຽກ ,ກວດກາຄຸນະພາບຂອງວຽກ ໄປຕາມເປົ້າໝາຍທີ່ໄດ້ວາງໄວ້ ແລະ ໃຫ້ຄຳແນະນຳເວົ້າລວມເວົ້າສະເພາະ ກໍຄືກວດກາຄວາມຄືບຫນ້າ ແລະ ຊ່ວຍຊຸກຍູ້ວຽກງານໃຫ້ໄປຕາມເປົ້າຫມາຍ,ບໍ່ວ່າຈະເປັນເວລາ ແລະ ຄຸນະພາບວຽກ. ຈາກນັ້ນໃນຕອນບ່າຍຂອງວັນດຽວກັນ ການນໍາແຂວງສະຫວັນນະເຂດ ຍັງໄດ້ໄປ ສຶກສາຕິດຕາມເບິ່ງວັດເກົ່າຕາແຫຼວທີ່ເມືອງຈໍາພອນ ຕື່ມອີກ.
ຂ່າວ: ມີເດຍລາວ
