ສະຫວັນນະເຂດລະດົມທຶນຊ່ວຍອຸປະກອນການຮຽນ, ເຄື່ອງນຸ່ງໃຫ້ນັກຮຽນ

ວັນທີ 26 ສິງຫາ 2024 “, ທີ່ຫ້ອງປະຊຸມຫ້ອງວ່າການ ແຂວງ ສະຫວັນນະເຂດ ຄະນະນໍາຂັ້ນແຂວງ ໄດ້ຈັດກອງປະຊຸມປຶກສາຫາຫລືກ່ຽວກັບການລະດົມທຶນຫາລາຍໄດ້ຊຸກຍູ້, ປະ ກອບສ່ວນຊ່ວຍເຫຼືອເຄື່ອງອຸປະກອນການຮຽນ ແລະເຄື່ອງນຸ່ງໃຫ້ນັກຮຽນຢູ່ເຂດຫ່າງໄກສອກຫຼີກຂອງແຂວງສະຫວັນນະເຂດ ໂດຍພາຍໃຕ້ການເປັນປະທານຂອງທ່ານ ບຸນໂຈມ ອຸບົນປະເສີດ ເຈົ້າແຂວງ ສະຫວັນນະເຂດ.

ໃນກອງປະຊຸມ ທ່ານ ສຸກສົມພອນ ອະໂນໄທ ຫົວໜ້າພະແນກສຶກສາທິການ ແລະ ກິລາແຂວງໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງ ສະຫວັນນະເຂດ ວ່າດ້ວຍການແຕ່ງຕັ້ງຄະນະຮັບ ຜິດຊອບຕິດຕາມຄະນະນໍາຂັ້ນແຂວງລົງຮ່ວມພິທີໄຂສົກຮຽນໃໝ່ສົກ 2024-2025 ທີ່ຈະໄດ້ຈັດຂຶ້ນໃນວັນທີ 03 ກັນຍາ 2024 ໃຫ້ຖືກກັບວາລະໃນແຕ່ລະເຂດທີ່ຫ່າງໄກສອກຫຼິກຂອງແຂວງ.

ຈາກນັ້ນທາງສະມາຄົມນັກທຸລະກິດ ແລະ ບໍລິສັດຫ້າງຮ້ານກໍ່ໄດ້ປະກອບ ສ່ວນຊຸກຍູ້ດ້ານງົບປະມານທຶນຮອນ ເຊິ່ງມີຫລາຍໂຄງການທີ່ໄດ້ໃຫ້ການຊ່ວຍເຫລືອຄື: ໂຄງການຮ່ວມໃຈສາຍໄຍ- ໂລມາຄຳ, ບໍລິສັດຢາງພາລາ ກວາຊາ, ທ່ານ ຄໍາຜຸຍ ສີບຸນເຮືອງ ຫົວໜ້າພະແນກແຜນການ ແລະການລົງທຶນແຂວງ ສະຫວັນ ນະເຂດ.

ກອງປະຊຸມຍັງໄດ້ມີການປະກອບຄຳຄິດຄຳເຫັນໃສ່ແຜນການ ແລະແຜນງານເພື່ອໃຫ້ພິທີໄຂສົກຮຽນໃໝ່ສົກປີ 2024-2025 ຂອງແຂວງ ສະຫວັນນະເຂດທີ່ຈະຈັດຂຶ້ນໃຫ້ໄດ້ຜົນສໍາເລັດໄປຕາມຄາດໝາຍທີ່ວາງອອກ.

ທີ່ມາ: ມີເດຍ ລາວ