ທ່ານ ບຸນລ້ວນ ລີໄຊຍະລາດ ຫົວໜ້າພະແນກພະະລັງງານ ແລະ ບໍ່ແຮ່ ແຂວງສະຫວັນນະເຂດ ໄດ້ລາຍງານຕໍ່ກອງປະຊຸມສະໄໝສາມັນ ເທື່ອທີ 07 ຂອງສະພາປະຊາຊົນ ແຂວງສະຫວັນນະເຂດ ຊຸດທີ II ໃນຄັ້ງວັນທີ 24 ກໍລະກົດ 2014 ທີ່ ຫໍວັດທະນະທຳ ໄກສອນ ພົມວິຫານ ກ່ຽວກັບກ່ຽວການ ດຳເນີນກິດຈະການດ້ານບໍ່ແຮຂອງໂຄງການຂຸດຄົ້ນ ແລະ ປຸງແຕ່ງແຮ່ທາດ ໃນໄລຍະຜ່ານມາວ່າ: ພະແນກພະລັງງານ ແລະ ບໍ່ແຮ່ແຂວງ ຄຸ້ມຄອງຕິດຕາມ, ກວດກາ, ໂຄງການທີ່ລົງທຶນດ້ານບໍ່ແຮ່ພາຍໃນແຂວງ ສະຫວັນນະເຂດ ມີທັງໝົດ 56 ບໍລິສັດ ຂັ້ນສູນກາງອອກອະນຸຍາດ ມີ 15 ບໍລິສັດ, 15 ກິດຈະການ, ໃນນັ້ນມີ 07 ໂຄງການ (ເປັນໂຄງການແບບເຮັດທົດລອງຕາມນະໂຍບາຍຂອງລັດຖະບານ ເພື່ອແກ້ໄຂບັນຫາດ້ານເສດຖະກິດການເງິນ, ການຂຸດຄົ້ນແຮ່ເຫຼັກ 03 ໂຄງການ, ຂູດຄົ້ນຄຳຕົກຂ້ອນ 03 ໂຄງການ ແລະ ຂຸດຄົ້ນຄຳເຄົ້າ 01 ໂຄງການ, ສໍາລັບກິດຈະການຂັ້ນແຂວງອອກອະນຸຍາດ ມີ 41 ບໍລິສັດ, 45 ກິດຈະການ, ລວມເນື້ອທີ່ສຳປະທານທັງໝົດຂັ້ນສູນກາງ ແລະ ຂັ້ນແຂວງ ອະນຸຍາດ ຈຳນວນ 133.296 ເຮັກຕາ.
ສຳລັບໂຄງການຂຸດຄົ້ນ ແລະ ປຸງແຕ່ງແຮ່ທາດ ຕາມກົດໝາຍກຳນົດ ຂັ້ນສູນກາງອອກອະນຸຍາດ ທັງໝົດ 15 ບໍລິສັດ, 15 ກິດຈະການ ອອກອະນຸຍາດຕາມຂັ້ນຕອນ ຂອງກົດໝາຍກຳນົດ 8 ບໍລິສັດ 08 ກິດຈະການຄື: ບໍລິສັດ ລ້ານຊ້າງມີເນໂຣນ ຈຳກັດ ດຳເນີນການຂຸດຄົ້ນ-ປຸງແຕ່ງຄຳ-ທອງແດງ, ເມືອງ ວິລະບູລີ, ບໍລິສັດ DMN-VTS ຈໍາກັດ ດຳເນີນການຂຸດຄົ້ນປຸງແຕ່ງບາຣິດ, ບ້ານຫ້ວຍຫອງ, ເມືອງວິລະບູລີ, ບໍລິສັດ ແຮ່ທາດ ໂກເອໂກ ຈໍາກັດ ດຳເນີນການຂູດຄົ້ນ-ປຸງແຕ່ງຫີນກາວ, ບ້ານ ນາແກ, ເມືອງ ໄຊພູທອງ, ບໍລິສັດ ແຮ່ທາດ ສະຫວັນ ຈໍາກັດ ດຳເນີນການຂຸດຄົ້ນ-ປຸງແຕ່ງຫີນກາວ, ບ້ານຫ້ວຍຊາຍ, ເມືອງ ຈຳພອນ, ບໍລິສັດ ຫຸ້ນສ່ວນພັດທະນາແຮ່ທາດ ລາວ ຈຳກັດ ດຳເນີນການຂຸດຄົ້ນ-ປຸງແຕ່ງຫີນກາວ, ບ້ານ ສີບຸນເຮືອງ, ເມືອງຈຳພອນ, ບໍລິສັດ ພິເດ ມາຍນິ້ງ ຈຳກັດ ດຳເນີນການຂຸດຄົ້ນ ປຸງແຕ່ງຫີນກາວ, ບ້ານ ຫ້ວຍຊາຍ, ເມືອງ ຈຳພອນ, ບໍລິສັດ ສະຫວັນຢິບຊຳ ຈຳກັດ ດໍາເນີນການຂຸດດິນ-ປຸງແຕ່ງຫີນກາວ ບ້ານ ເລົ່າໝາກຂ່າ, ເມືອງ ຈຳພອນ, ບໍລິສັດ ລາວດາຍຢວນ ບໍ່ແຮ່ ຈຳກັດ ດຳເນີນການຂຸດຄົ້ນ ແລະ ປຸງແຕ່ງ ເກືອກາລີ ໂປຕາສ ເມືອງໄຊບູລີ, ອອກອະນຸຍາດໂຄງການຂຸດຄົ້ນ, ປຸງແຕ່ງ ແລະ ສົ່ງອອກແຮ່ເຫຼັກ, ແຮ່ຄຳເຄົ້າ ແລະ ແຮ່ຄຳຕົກຂ້ອນ (ແບບທົດລອງ) ຕາມນະໂຍບາຍຂອງລັດຖະບານ ເພື່ອແກ້ໄຂບັນຫາດ້ານເສດຖະກິດການເງິນ ລວມມີທັງໝົດ 07 ບໍລິສັດ, ໃນນັ້ນ ມີໂຄງການຂຸດຄົ້ນ ແຮ່ເຫຼັກມີ 03 ບໍລິສັດ (ລວມເນື້ອທີ່ 1.200 ເຮັກຕາ), ໂຄງການຂຸດຄົ້ນຄຳເຄົ້າມີ 01 ບໍລິສັດ (ມີເນື້ອທີ່ 732 ເຮັກຕາ) ແລະໂຄງການຂຸດຄົ້ນຄໍາຕົກຂ້ອນມີ 03 ບໍລິສັດ (ມິເນື້ອທີ່ 19 ເຮັກຕາ) ເຊິ່ງມີເນື້ອທີ່ລວມທັງໝົດແມ່ນ 1.953 ເຮັກຕາ.
ຂ່າວ: ເສດຖະກິດ-ສັງຄົມ
