ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສະຫວັນນະເຂດ ມີແຜນປູກໄມ້ 3.000 ເຮັກຕາ ພ້ອມຖືສຳຄັນ ການບົວລະບັດຮັກສາ

ເພື່ອກຽມໃຫ້ແກ່ການປູກໄມ້ໃນປີ 2017 ນີ້ໃຫ້ມີປະສິດທິພາບ ຂະແໜງປ່າໄມ້ ແຂວງສະຫວັນນະເຂດກ ໄດ້ມີ​ແຜນ​ປູກ​ຕົ້ນ​ໄມ້ ຈຳນວນ 3.000 ​ເຮັກ ພ້ອມ​ນີ້ ຍັງມີແຜນຟື້ນຟູປ່າໃຫ້ໄດ້ ເກືອບ 6.000 ເຮັກຕາ ​ເຊິ່ງຜ່ານ​ມາ ​ໄດ້ເປັນເຈົ້າການຊີ້ນຳ-ນຳພາ ເຮັດຢ່າງຈິງຈັງ​ໃນການກຽມເບ້ຍໄມ້ ເພື່ອສະໜອງໃຫ້ແຕ່ລະທ້ອງຖິ່ນປູກ ​ເພື່ອໃຫ້ແທດເໝາະກັບສະພາບພູມສາດ ພ້ອມທັງເອົາໃຈ ໃສ່ແບ່ງໃຫ້ ບຸກຄົນ, ລວມໝູ່, ກົມກອງຕ່າງໆ ເປັນຜູ້ຮັບຜິດຊອບ ໃນເຂດປ່າໄມ້ທີ່ປູກໃໝ່ຂອງໃຜລາວ ເພື່ອການບົວລະບັດຮັກສາໃຫ້ດີ, ຄຽງຄູ່ກັບການປຸກລະດົມ ວຽກງານຟື້ນຟູປ່າ ເພື່ອປົກປັກຮັກສາສິ່ງແວດ ລ້ອມ ​ໃຫ້ເປັນພັນທະໜ້າທີ່ຂອງທົ່ວປວງຊົນ,


ທ່ານ
ລຳສັກ ແກ້ວມໍລະກົດ ຮອງຫົວໜ້າຂະແໜງປ່າໄມ້ ແຂວງສະຫວັນນະເຂດ ກ່າວວ່າ: ​ເພື່ອໃຫ້ບັນລຸຕາມເປົ້າໝາຍວາງໄວ້ ປີນີ້ ແຂວງສະຫວັນນະເຂດ ເກັບເກ່ນໄດ້1.500 ກິໂລ, ຜະລິດ ເບ້ຍໄມ້ ຊະນິດຕ່າງໆ 2.500.000 ເບ້ຍ ເປັນຕົ້ນແມ່ນເບ້ຍໄມ້ພື້ນເມືອງເຊັ່ນ: ໄມ້ຂະຍູງ, ໄມ້ດູ່, ໄມ້ແຕ້ຄ່າ, ໄມ້ຍາງ, ໄມ້ສົ້ມຜາດ ​ແລະ ອື່ນໆ. ມາ​ຮອດ​ປັດຈຸບັນ ສາມາດຜະລິດເບັ້ຍໄມ້ໄດ້ແລ້ວ 35.000 ເບ້ຍ., ສະ​ເພາະ​ການປູກ​ໄມ້​ໃນວັນທີ 1 ເດືອນມີຖຸນາປີ​ນີ້ ຈະ​ໃຫ້​ໄດ້ 1.300 ກວ່າເຮັກຕາ ໃນນີ້ເປັນ ຂອງພາກສ່ວນລັດປູກ 100 ເຮັກຕາ, ບັນດາບໍລິສັດທຸລະກິດຕ່າງໆ ປູກ 900 ເຮັກຕາ ແລະ ປະຊາ ຊົນປູກ ເກືອບ 400 ເຮັກຕາ ໂດຍຈະປູກບໍລິເວນປ່າໂຄກ ເຂດເມືອງພະລານໄຊ, ຊົນນະບູລີ ແລະ ເມືອງທ່າປາງທອງ ຈຳນວນ 10 ກວ່າເຮັກຕາພ້ອມນີ້ ກໍ່ປູກຕາມສວນປູກໄມ້ ຂອງເມືອງຕ່າງໆຕື່ມອີກ ແລະ ຈະປູກບໍລິເວນດົງນາຕາດ ແລະ ປູກໄມ້ປະດັບຕາມເສັ້ນ ທາງພາຍໃນເທດສະບານ ແຂວງສະ ຫວັນນະເຂດ.

ຢ່າງ​ໃດ​ກໍ​ຕາມ ວຽກງານປູກໄມ້ ຢູ່ແຂວງສະຫວັນນະເຂດ ໃນແຕ່ລະປີແມ່ນເປັນຂະບວນການ ແຕ່ວ່າການປູກແລ້ວກໍ່ຍັງຂາດ ການບົວລະບັດຮັກສາ ເຮັດໃຫ້ການປູກໄມ້ໃນແຕ່ລະປີ ບໍ່ມີຄຸນະພາບ ແມ່ນ​ເພາະ​ພາກສ່ວນ​ກ່ຽວຂ້ອງ ​ຍັງຖືເບົາ​ໃນການສຶກສາ ເບິ່ງສະພາບຄວາມເປັນຈິງ ທາງດ້ານພູມສາດ, ສະພາບດິນຟ້າອາກາດ ໃນແຕ່ລະທ້ອງ​ຖິ່ນເໝາະສົມ ກັບການປູກໄມ້ປະເພດໃດ, ຊະນິດໃດສິ່ງ​ສຳຄັນແມ່ນ ປູກແລ້ວປ່ອຍປະລະ​ເລີຍ ຂາດຄວາມຮັບຜິດຊອບ ເຮັດໃຫ້ການລອດເຫລືອ ຂອງຕົ້ນໄມ້ທີ່ປູກໃໝ່ມີໜ້ອຍ.
ຂ່າວຈາກ:ຂປລ