ພະແນກອຸດສາຫະກຳ ແລະ ການຄ້າ ແຂວງສະຫວັນນະເຂດ ຈັດກອງປະຊຸມປຶກສາຫາລືກ່ຽວກັບການຄຸ້ມຄອງເຄມີ ແລະ ຝຶກອົບຮົມການນຳໃຊ້ຖານຂໍ້ມູນເຄມີແຫ່ງຊາດ ໃນວັນທີ 30 ກໍລະກົດ 2024 ໂດຍການເປັນປະທານຂອງທ່ານ ວັນແສງ ແກ້ວບຸນພັນ ຫົວໜ້າພະແນກອຸດສາຫະກຳ ແລະ ການຄ້າແຂວງ, ທ່ານ ໄວຍະກອນ ສີສະຫວັດ ຫົວໜ້າພະແນກຄຸ້ມຄອງເຄມີ ກົມອຸດສາຫະກຳ, ກະຊວງອຸດສາຫະກຳ ແລະ ການຄ້າ ພ້ອມດ້ວຍບັນດາຂະແໜງການ, ຄະນະຫ້ອງຫານອຸດສາຫະກຳ ແລະ ການຄ້າເມືອງເຂົ້າຮ່ວມ.
ທ່ານ ວັນແສງ ແກ້ວບຸນພັນ ໄດ້ກ່າວວ່າ: ວຽກງານຄຸ້ມຄອງເຄມີ ເປັນວຽກງານໜຶ່ງທີ່ລັດຖະບານ ກໍຄືກະຊວງທີ່ກ່ຽວຂ້ອງໄດ້ໃຫ້ຄວາມສຳຄັນ ເນື່ອງຈາກວ່າເຄມີ ໄດ້ຖືກນຳໃຊ້ຢ່າງກວ້າງຂວາງຫລາກຫລາຍເຂົ້າໃນການດຳລົງຊີວິດ, ນຳໃຊ້ເຂົ້າໃນຂົງເຂດເສດຖະກິດ ກໍຄືໂຮງຈັກໂຮງງານຕ່າງໆ ໂດຍສະເພາະ ການນຳໃຊ້ຢູ່ໃນການດຳລົງຊີປະຈຳວັນຂອງຄົນເຮົາ ເຊັ່ນ: ການນຳໃຊ້ສະບູ, ແຟັບ ແລະ ບັນດາເຄື່ອງສຳອາງອື່ນໆ ກໍລ້ວນແລ້ວແຕ່ຜະລິດມາຈາກທາດເຄມີ, ຊຶ່ງບັນດາເຄມີເຫລົ່ານັ້ນມີທັງຄຸນປະໂຫຍດ ແລະ ຍັງມີຄວາມສ່ຽງຕໍ່ການດຳລົງຊີວິດຂອງຄົນເຮົາ ດັ່ງນັ້ນ, ລັດຖະບານຈຶ່ງໄດ້ມອບໃຫ້ກະຊວງອຸດສາຫະກຳ ແລະ ການຄ້າ, ພະແນກອຸດສາຫະກຳ ແລະ ການຄ້າແຂວງໃນທົ່ວປະເທດ ເປັນເຈົ້າການປະສານສົມທົບ ກັບພາກສ່ວນກ່ຽວຂ້ອງ ເພື່ອການຄຸ້ມຄອງຢ່າງລວມສູນ ແນໃສ່ຮັບປະກັນການນຳເຂົ້າ ແລະ ເຄື່ອນຍ້າຍ, ຈຳໜ່າຍ, ເກັບຮັກສາ, ນຳໃຊ້, ກຳຈັດ ແລະ ບຳບັດໃຫ້ຖືກຕ້ອງສອດຄ່ອງຕາມຫລັກວິຊາການ.
ທ່ານ ນາງ ສຸດາລັດ ແກ້ວວິໄລຫົງ ຮອງຫົວໜ້າຂະແໜງອຸດສາຫະກຳ ໄດ້ລາຍງານກ່ຽວກັບການຈັດຕັ້ງປະຕິບັດວຽກງານຄຸ້ມຄອງເຄມີ ແລະ ການນໍາໃຊ້ເຄມີ ຢູ່ໃນເຂດຄວາມຮັບຜິດຊອບຂອງພະແນກອຸດສາຫະກຳ ແລະ ການຄ້າແຂວງວ່າ: ໃນທົ່ວແຂວງສະຫວັນນະເຂດ ມີໂຮງງານທີ່ນໍາໃຊ້ທາດເຄມີທັງໝົດ 31 ໂຮງງານ ແລະ ໜຶ່ງບໍລິສັດຂາອອກ-ຂາເຂົ້າ ໃນນີ້, ມີໂຮງງານທີ່ນອນໃນເຂດເສດຖະກິດພິເສດສະຫວັນນະເຂດ ມີ 15 ໂຮງງານ, ຊຶ່ງໃນໄລຍະຜ່ານມາ ໄດ້ມີການແນະນໍາໃຫ້ຜູ້ປະກອບການໄປຂຶ້ນທະບຽນ ນໍາກົມອຸດສາຫະກໍາ ແລ້ວ 9 ໂຮງງານ, ໄດ້ສົມທົບກັບກົມອຸດສາຫະກຳລົງຕິດຕາມສາງເກັບມ້ຽນ ແລະ ການນໍາໃຊ້ທາດເຄມີຂອງບໍ່ຄໍາ ເມືອງວິລະບູລີ, ໂຮງງານຊັນເປເປີ້ ເມືອງເຊໂປນ, ໂຮງງານຫລອມໂລຫະພາກໃຕ້, ໂຮງງານຜະລິດຢາສູບຫົງຖາ ແລະ ໂຮງງານຜະລິດເຫລັກເສັ້ນຄູນຄໍາ. ພ້ອມນີ້, ຍັງໄດ້ລົງກວດກາສາງເກັບມ້ຽນເຄມີ ຂອງບັນດາໂຮງງານທີ່ນອນໃນເຂດເສດຖະກິດພິເສດສະຫວັນນະເຂດ ຕາມການມອບໝາຍຂອງກົມອຸດສາຫະກຳ ພ້ອມທັງໄດ້ອອກໃບອະນຸຍາດນໍາເຂົ້າທາດເຄມີໄດ້ 01 ສະບັບ, ທາດເຄມີທີ່ນໍາເຂົ້າແມ່ນ ໂປຣທາສຊ່ຽມ ໂກລດ ໄຊຍາໄນດ(Potssium Gold Cyanide), ຕິດຕາມການຂົນສົ່ງຜ່ານແດນທາດແຫລວ ອາກອນ ( Liquid Argon ) ຂອງບໍລິສັດສະຫວັນຂົນສົ່ງ ແລະ ໂລຈິສຕິກ ຈໍາກັດໄດ້ 10 ຄັ້ງ. ພ້ອມທັງລົງກວດກາ ຕໍ່ດຳເນີນກິດຈະການ ຕິດພັນກັບການລົງກວດກາສາງເກັບມ້ຽນ ແລະ ການເກັບຮັກສາທາດເຄຂອງໂຮງງານດັ່ງກ່າວຄຽງຄູ່ກັນໄປອີກດ້ວຍ.
ທ່ານ ໄວຍະກອນ ສີສະຫວັດ ຍັງໄດ້ເຜີຍແຜ່ກົດໝາຍ ວ່າດ້ວຍການຄຸ້ມຄອງເຄມີ ແລະ ນິຕິກຳ ລຸ່ມກົດໝາຍ ແລະ ເຜີຍແຜ່ ແຈ້ງການ ຂອງຫ້ອງວ່າການສໍານັກງານນາຍຍົກລັດຖະມົນຕີ ສະບັບເລກທີ 16/ສຫນຍ, ລົງວັນທີ 03 ມັງກອນ 2024 ວ່າດ້ວຍການຈັດຕັ້ງປະຕິບັດກົດໝາຍ ວ່າດ້ວຍການຄຸ້ມຄອງເຄມີ ແຈ້ງການ ການນໍາໃຊ້ຖານຂໍ້ມູນເຄມີແຫ່ງຊາດ ສະບັບເລກທີ 1675/ຫອຄ ລົງວັນທີ 10 ກໍລະກົດຕື່ມອີກ.
ໂອກາດດຽວກັນ, ຍັງໄດ້ຈັດຝຶກອົບຮົມການນຳໃຊ້ຖານຂໍ້ມູນເຄມີແຫ່ງຊາດ ໃຫ້ກັບພະນັກງານ ພະແນກອຸດສາຫະກຳ ແລະ ການຄ້າແຂວງ, ເມືອງ,ນະຄອນ ແລະ ບັນດາຜູ້ປະກອບການໂຮງຈັກໂຮງງານນຳອີກ.
ຂ່າວ-ພາບ: ອັກສອນສິນ ພົມມະຈັນ
