ສະຫະກອນຜູ້ຜະລິດກາເຟເຂດພູພຽງບໍລະເວນcpc ໄດ້ມອບອາຄານຮຽນຊັ້ນອະ ນຸບານຫຼັງໃໝ່ໃຫ້ບ້ານຫຼັກຂາວ ເມືອງທ່າແຕງ ແຂວງເຊກອງ ໃນຕອນເຊົ້າວັນທີ 30 ກັນຍາ 2022 ຢູ່ທີ່ໂຮງຮຽນປະຖົມສົມບູນ – ອະບານບ້ານຫຼັກຂາວ.ໂດຍເປັນກຽດມອບຂອງ ທ່ານ ສີທອງ ເພັດລັງສີ ປະທານສະຫະກອນຜູ້ຜະລິດກາເຟເຂດພູພຽງບໍລະເວນ,ຮັບໂດຍທ່ານ ທ່ານ ກົມມະລິນ ໜໍ່ແກ້ວ ຮອງຫົວໜ້າຫ້ອງການສຶກສາທິການ ແລະ ກິລາເມືອງທ່າແຕງ ພ້ອມທັງມອບຕໍ່ໃຫ້ອຳນາດການປົກ ຄອງ,ກຸ່ມບ້ານ ແລະ ຄູອາຈານເປັນເຈົ້າ ການນຳໃຊ້ ແລະປົກປັກຮັກສາ.
ທ່ານ ສີທອງ ເພັດລັງສີ ປະທານສະຫະກອນຜູ້ຜະລິດກາເຟເຂດພູພຽງບໍລະເວນ ໄດ້ກ່າວວ່າ:
ການກໍ່ສ້າງໂຮງຮຽນ ອະນຸບານ ບ້ານຫລັກຂາວ ແມ່ນໜຶ່ງໃນໂຄງການຊ່ວຍ ເຫຼືອສັງຄົມ-ຊຸມຊົນຂອງ ສະຫະກອນ ທີ່ໄດ້ຮັບການອະນຸມັດ ຈາກກອງປະຊຸມໃຫ່ຍສະໄໝສາມັນຄັ້ງທີ 14, ໃນວັນທີ 22 ກໍລະກົດ 2021 ໂຄງການດັ່ງກ່າວແມ່ນໄດ້ເລີ້ມລົງມືກໍ່ສ້າງມາແຕ່ເດືອນມິຖຸນາ 2022 ເປັນຕົ້ນມາ ແລະ ໄດ້ສໍາເລັດໃນທ້າຍເດືອນ ກັນຍາ 2022, ໂຮງຮຽນຫຼັງນີ້ມີຄວາມຍາວ 21 ແມັດ, ກວ້າງ 8 ແມັດ, ເປັນອາຄານຊັ້ນດຽວ, ປູກາໂລ, ມຸ່ງ ດ້ວຍກະເບື້ອງ ປະກອບມີ 3 ຫ້ອງຮຽນ, ລວມມູນຄ່າການກໍ່ສ້າງທັງ ໝົດ 353.000.000 ກີບ ຫຼືເທົ່າກັບ 18.000 ໂດລາສະຫະລັດ, ສະຫະກອນຜູ້ຜະລິດກາເຟ ເຂດພູພຽງບໍລະເວນເປັນເຈົ້າຂອງໂຄງການ 100% ໂດຍນໍາໃຊ້ເງິນກອງທຶນພິເສດການຄ້າເປັນທໍາ ເຂົ້າໃນວຽກງານສຶກສາ ເພື່ອພັດທະນາຊັບພະ ຍາກອນມະນຸດ ນອກນີ້ ຍັງມີເງິນເກັບຈາກພໍ່ແມ່ປະຊາຊົນເພື່ອສົມທົບທຶນ ຈຳນວນ 21,800,000 ກີບ ໄດ້ປະກອບສ່ວນ ນໍາສະຫະກອນ 11,800,000ກີບ ຍັງເຫລືອໃນຄັງ 10 ລ້ານກີບ.
ໃນໂອກາດໃຫ້ກຽດຮ່ວມພິທີຮັບອາຄານຮຽນ ທ່ານ ນາງ ແກ້ວອຸດອນ ດວງມະນີ ຄະນະປະຈຳພັກເມືອງ ຫົວ ໜ້າຄະນະໂຄສະນາອົບຮົມເມືອງທ່າແຕງ ຍັງໄດ້ເປັນກຽດໂອ້ລົມ ໂດຍຕາງໜ້າການນຳເມືອງທ່າແຕງ ສະແດງຄວາມຂອບໃຈຕໍ່ສະຫະກອນຜູ້ຜະລິດກາເຟເຂດພູພຽງບໍລະເວນ cpc ທີ່ຊ່ວຍເຫຼືອກໍ່ສ້າງໂຮງ ຮຽນອະນຸບານບ້ານຫຼັກຂາວ ແຫ່ງນີ້ຈົນສຳເລັດ ເປັນການປະກອບສ່ວນພັດ ທະນາການສຶກສາ ຂະຫຍາຍໂອກາດເຂົ້າຮຽນຂອງລູກຫຼານກໍຄືເມືອງທ່າແຕງໃຫ້ສູງຂຶ້ນ.
ເຂົ້າຮ່ວມພິທີມອບໃນຄັ້ງຍັງນີມີທ່ານ ໄຊຍະກອນ ອ່ອນນາລີ ຜູ້ຈັດການສະຫະກອນຜູ້ຜະລິດກາເຟເຂດພູພຽງບໍລະເວນ ພ້ອມດ້ວຍຄະນະ,ມີພະນັກງານຫ້ອງການກ່ຽວຂ້ອງຂອງເມືອງທ່າແຕງ ອຳນາດການປົກຄອງ,ຄູອາຈານ,ຫຼານນ້ອຍນັກຮຽນ ແລະ ປະຊາຊົນພາຍໃນບ້ານເຂົ້າຮ່ວມ.
ເກດສະໜາ ແກ້ວສຸວັນນະແສງ