ສະຫະພັນກຳມະບານກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ຈັດກອງປະຊຸມສະຫລຸບການຈັດຕັ້ງປະຕິບັດ ຂະບວນການຂໍ້ແຂ່ງຂັນ 5 ເປັນເຈົ້າຂອງກຳມະບານ ປະຈໍາປີ 2023 ແລະທິດທາງແຜນການເຄື່ອນໄຫວປີ 2024 ໃນວັນທີ 16 ພຶດສະພາ 2024, ທີ່ກົມສິນລະປະ-ວັດທະນະທຳ ໂດຍການເປັນປະທານຂອງ ທ່ານ ໂພສີ ແກ້ວມະນີວົງ ຮອງລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ, ທ່ານ ຄຳຫລ້າ ຍອຍສາຍຄຳ ປະທານຄະນະບໍລິຫານງານ ສະຫະພັນກຳມະບານ ກະຊວງ ຖວທ, ມີຄະນະສະຫະພັນກຳມະບານກະຊວງ, ຮາກຖານອ້ອມຂ້າງ ກະຊວງ ຖວທ ເຂົ້າຮ່ວມ.
ກອງປະຊຸມໄດ້ຮັບຟັງການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງກຳມະບານປະຈໍາປີ 2023 ແລະ ທິດທາງແຜນການເຄື່ອນໄຫວປີ 2024 ຂອງສະຫະພັນກໍາມະບານກະຊວງ ຖວທ ຈາກ ທ່ານ ວຽງວັດທະນາ ຊະນະພານ ຮອງປະທານຄະນະບໍລິຫານງານສະຫະພັນກຳມະບານກະຊວງ ຖວທ ທັງເປັນຜູ້ຮັບຜິດຊອບວຽກງານຂະບວນການ ໂດຍໄດ້ຍົກໃຫ້ເຫັນຜົນສໍາເລັດຂອງການຈັດຕັ້ງປະຕິບັດ ຂໍ້ແຂ່ງຂັນໃນແຕ່ລະດ້ານ, ຈຸດອ່ອນຂໍ້ຄົງຄ້າງ ແລະບົດຮຽນທີ່ຖອດຖອນໄດ້ ເພື່ອສືບຕໍ່ຈັດຕັ້ງປະຕິບັດ ເນື້ອໃນຂໍ້ແຂ່ງຂັນ 5 ເປັນເຈົ້າໃຫ້ມີປະສິດທິຜົນໃນຕໍ່ໜ້າ. ສະຫລຸບການເຄື່ອນໄຫວວຽກງານຂອງສະຫະພັນກຳມະບານກະຊວງ ຖວທ ປີ 2023 ແລະ ທິດທາງແຜນການປີ 2024.
ກອງປະຊຸມຍັງໄດ້ຮັບຟັງການໂອ້ລົມຈາກ ທ່ານ ໂພສີ ແກ້ວມະນີວົງ ຮອງລັດຖະມົນ ຕີກະຊວງ ຖວທ ໂດຍທ່ານໄດ້ເນັ້ນໜັກຫລາຍບັນຫາຕໍ່ຄະນະສະຫະພັນກຳມະບານ ກະຊວງ ຖວທ ເພື່ອເຮັດໃຫ້ການ ເຄື່ອນໄຫວວຽກງານຂອງສະຫະພັນກຳມະບານກະຊວງ ຖວທ ສືບຕໍ່ຈັດຕັ້ງປະຕິບັດໃຫ້ນັບມື້ມີຄຸນນະພາບ, ສ້າງໄດ້ສະມາຊິກກຳມະບານທີ່ມີຄຸນສົມບັດສິນທຳປະຕິວັດ, ມີຄວາມຮູ້ຄວາມສາມາດ, ມີຫົວຄິດປະດິດສ້າງ, ກ້າເຮັດໃນສິ່ງທີ່ຖືກຕ້ອງ, ມີຄວາມຮັບຜິດຊອບສູງຕໍ່ທຸກໆວຽກງານ ທີ່ການຈັດຕັ້ງມອບໝາຍໃຫ້ມີຜົນສໍາເລັດດ້ວຍຄຸນນະພາບສູງ, ບັນດາສະມາຊິກກຳມະບານກະຊວງ ຖວທ ຄວນສືບຕໍ່ເຄື່ອນໄຫວວຽກງານຂະບວນການ ຕິດພັນກັບວຽກງານວິຊາສະເພາະ ແຕ່ລະຂະແໜງການທີ່ກ່ຽວຂ້ອງກັບພາລະບົດບາດ ແລະ ມີຄວາມຈໍາເປັນຕ້ອງໄດ້ຄົ້ນຄ້ວາຮໍ່າຮຽນເພີ່ມທັກສະຄວາມຮູ້ຄວາມສາມາດທາງດ້ານວິທະຍາສາດເຕັກນິກ-ເຕັກໂນໂລຊີ ກໍ່ຄືການສຶກສາຄົ້ນຄ້ວາຮໍ່າຮຽນ ໃຫ້ມີການພັດທະນາ ມີຄວາມກ້າວໜ້າ ທາງດ້ານເຕັກນິກວິທະຍາສາດຕ່າງໆ ເພື່ອຍົກສູງລະດັບວິຊາສະເພາະວິຊາການໃຫ້ຮັບປະກັນໃນການຈັດຕັ້ງປະຕິບັດໜ້າທີ່ ໃຫ້ມີຜົນສໍາເລັດຕາມການຈັດຕັ້ງມອບໝາຍໃຫ້ຢ່າງມີປະສິດທິພາບສູງທັງດ້ານປະລິມານ ແລະ ຄຸນນະພາບ.
ກອງປະຊຸມຄັ້ງນີ້ຍັງໄດ້ມອບໃບຢັ້ງຢືນ 5 ເປັນເຈົ້າໃຫ້ສະຫະພັນກຳມະບານກະຊວງ ຖວທ ແລະ ໜ່ວຍກຳມະບານອ້ອມຂ້າງ ກະຊວງ ຖວທ ຈໍານວນ 27 ໜ່ວຍຕື່ມອີກ.
