ວັນທີ 28 ພຶດສະພາ 2021, ທີ່ໂຮງໝໍສູນກາງ 103 ກອງທັບ ສະຫາຍ ພັນໂທ ນາງ ປາ ວົງສະແຫວງ ຫົວໜ້າພະແນກສະຫະພັນແມ່ຍິງກົມໃຫຍ່ການເມືອງກອງທັບ ພ້ອມດ້ວຍສະຫະພັນແມ່ຍິງກົມໃຫຍ່ເສນາ ແລະ ສະຫະພັນແມ່ຍິງຫ້ອງວ່າການກະຊວງປ້ອງກັນປະເທດ ໄດ້ນໍາເອົາເຄື່ອງບໍລິໂພກ ລວມມູນຄ່າ 2 ລ້ານກີບ ມອບໃຫ້ແກ່ໂຮງໝໍສູນກາງ 103 ກອງທັບ, ເຊິ່ງຕາງໜ້າກ່າວຮັບໂດຍສະຫາຍ ພັນເອກ ສຸລິພັນ ເພັດຈັນທະລາ ຫົວໜ້າການທະຫານໂຮງໝໍສູນກາງກອງທັບພ້ອມດ້ວຍຄະນະ. ສະຫາຍ ພັນໂທ ນາງ ປາ ວົງສະແຫວງ ກ່າວວ່າ: ວັດຖຸປັດໄຈທີ່ມາມອບໃຫ້ໂຮງໝໍສູນກາງ 103 ກອງທັບຄັ້ງນີ້ກໍເພື່ອປະກອບສ່ວນຊຸກຍູ້ກໍາລັງໃຈແພດໝໍທີ່ພວມປະຕິບັດໜ້າທີ່ຢ່າງລະອິດລະອ້ຽວໃນການປິ່ນປົວຄົນເຈັບທີ່ຕິດເຊື້ອພະຍາດໂຄວິດ-19. ນອກນີ້, ຍັງໄດ້ຮຽກຮ້ອງໃຫ້ປະຊາຊົນລາວທຸກຄົນຈົ່ງພ້ອມກັນປະຕິບັດມາດຕະການທີ່ຂັ້ນເທິງວາງອອກດ້ວຍການໃສ່ຜ້າປິດປາກ, ຮັກສາໄລຍະຫ່າງທາງສັງຄົມ ແລະ ໝັ່ນລ້າງມືດ້ວຍເຈວອໍກໍຮໍເປັນປະຈໍາ ເພື່ອປ້ອງກັນການແຜ່ລະບາດຂອງພະຍາດໂຄວິດ-19. ໂອກາດນີ້, ສະຫາຍ ພັນເອກ ສຸລິພັນ ໄດ້ກ່າວສະແດງຄວາມຂອບໃຈນໍາຄະນະສະຫະພັນແມ່ຍິງທັງສາມພາກສ່ວນທີ່ໄດ້ປະກອບສ່ວນທັງວັດຖຸ ແລະ ກໍາລັງແຮງໃຈໃຫ້ພະນັກງານແພດໝໍພາຍໃນໂຮງໝໍສູນກາງ 103 ກອງທັບ ສືບຕໍ່ປະຕິບັດໜ້າທີ່ເປັນນັກຮົບຊຸດຂາວໃນການຕໍ່ສູ້ກັບພະຍາດໂຄວິດ-19.
ນັກຂ່າວ: ພ/ຕ ສາຍເພັດ ທໍາມະວົງສາ
Loading...