ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສະຫະພັນແມ່ຍິງໂຮງຮຽນ ມສພ ຈັດກອງປະຊຸມໃຫຍ່ຄັ້ງທີ IX

ສະຫະພັນແມ່ຍິງ ( ສຍ) ໂຮງຮຽນມັດທະຍົມ​ສົມບູນໂພນສະຫວັນ (ມສພ) ​ແຂວງ​ຊຽງ​ຂວາງ ຈັດກອງປະຊຸມໃຫຍ່ຄັ້ງທີ IX ​ເພື່ອ​ຕີ​ລາຄາ​ຄືນ​ການ​ເຄື່ອນ​ໄຫວ​ວຽກ​ງານ​ໃນ​ໄລຍະ​ຜ່ານ​ມາ ໃນຕົ້ນເດືອນ  ພຶດສະພາ 2019 ນີ້ ທີ່​ສະ​ໂມ​ສອນ​ໂຮງຮຽນ​ດັ່ງກ່າວ, ພາຍໃຕ້ການເປັນປະທານຂອງທານ ນາງ ອ່ອນຈັນ ອຸດດາວົງ ຮັກສາການປະທານ ສຍ ໂຮງຮຽນ,ເຂົ້າຮ່ວມກອງປະຊຸມມີ ທ່ານ ນາງ ຄຳສອນ ປອນຄຳດີ ຮອງປະທານ ສຍ ແຂວງ, ທ່ານ ນາງ ສຸກສົມພອນ ສີບຸນເຮືອງ ປະທານ ສຍ ພະແນກສຶກສາທິການ ແລະ ກິລາ ແຂວງ, ທ່ານ ຄຳສິງ ເພັດສີຄຳ ຮອງຜູ່ອຳນວຍການໂຮງຮຽນ ຜູ່ຊີ້ນຳວຽກງານອົງການຈັດຕັ້ງມະຫາຊົນ ຕະຫຼອດ​ຮອດ​ສະມາຊິກ ສຍ ​ພາຍ​ໃນໂຮງຮຽນ ​ແລະ ​ແຂກ​ທີ່​ຖືກ​ເຊີນ 100 ກວ່າຄົນ.

           ກອງປະຊຸມໄດ້ຮັບຟັງການ​ຜ່ານບົດລາຍງານການເມືອງທັງສອງພາກ ແລະ ແຜນພັດທະນາໜ່ວຍສະຫະພັນແມ່ ຍິງໂຮງຮຽນ​ເປັນ​ໄລຍະ​ເວລາ 5 ປີ(2019 – 2024), ຕີ​ລາຄາ​ຄືນບົດສະຫຼຸບການຈັດ​ຕັ້ງນໍາພາຂອງໜ່ວຍ ສຍ ​ໂຮງຮຽນ​ໃນ​ໄລຍະ​ຜ່ານ​ມາ ມີ​ຜົນງານ​ຫຼາຍ​ດ້ານ​ທີ່​ປະຕິບັດ​ໄດ້ ​ແລະ ປະສົບ​ຜົນ​ສໍາ​ເລັດ ​ເປັນ​ຕົ້ນໄດ້ເອົາໃຈໃສ່ຕໍ່ວຽກງານສຶກສາອົບຮົມການເມືອງ – ແນວຄິດໃຫ້​ແກ່ສະມາຊິກ, ປັບປຸງກົງຈັກການຈັດຕັ້ງໃຫ້ມີຄວາມເຂັ້ມແຂງ, ເຮັດໜ້າທີ່ປົກປ້ອງສິດ ຜົນປະໂຫຍດຂອງແມ່ຍິງ ແລະ ເດັກນ້ອຍເວົ້າລວມ ເວົ້າສະເພາະແມ່ນ ສຍ ພາຍໃນໂຮງຮຽນ, ປຸກລະດົມເອື້ອຍນ້ອງແມ່ ຍິງປະກອບສ່ວນ​ເຂົ້າໃນທຸກຂົງເຂດວຽກງານ, ເປັນເຈົ້າການໃນການປະຕິບັດຂໍ້ແຂ່ງຂັນ 3 ດີ ຂອງ ສຍ ລາວຢ່າງມີຜົນສຳ ເລັດ, ເຮັດໃຫ້ຊີວິດການເປັນຢູ່ຂອງແມ່ຍິງດີຂຶ້ນເທື່ອລະກ້າວ, ໃນກອງປະຊຸມຍັງໄດ້ມອບໃບຍ້ອງຍໍໃຫ້ແກ່ ສຍ ພາຍໃນໂຮງຮຽນຜູ່​ທີ່​ມີ​ຜົນງານ​ດີ​ເດັ່ນ ເຊິ່ງໃນນັ້ນ ມີດີເດັ່ນປະເພດ 01 ມີ 82 ຄົນ, ດີເດັ່ນປະເພດ 2 ມີ 78 ຄົນ, ​ເຊິ່ງ​ໃຫ້ກຽດກ່າວ​ມອບ​ໂດຍທ່ານ ນາງ ຄຳສອນ ປອນຄຳດີ ຮອງປະທານ ສຍ ແຂວງ, ນອກຈາກ​ນັ້ນ ກອງປະຊຸມຍັງໄດ້ປ່ອນບັດຄັດເລືອກເອົາຄະນະ ສຍ ໂຮງຮຽນຊຸດໃໝ່ ຜົນປາກົດ​ວ່າ: ທ່ານ ນາງ ອ່ອນຈັນ ອຸດດາວົງ ເປັນປະທານ, ທ່ານ ນາງ ສີວັນຄຳ ສິນທະວົງ ເປັນຮອງປະທານ ທັງເປັນປະທານກວດກາ, ທ່ານ ນາງ ວິໄລວັນ ຜອງມະໄລຄຳ ເປັນຮອງປະທານ, ທ່ານ ນາງ ສຸດາວຽງ ສຸພັນທອງ ເປັນ ຄະນະ, ທ່ານ ນາງ ແສງ ຈັນ ອິນທະວົງ ເປັນຄະນະ ​ແລະ ທ່ານ ນາງ ບົວຄຳ ບຸນທະວົງ ເປັນຮອງປະທານກວດກາ.

 

(​ໂດຍ: ນາງ ຄໍາ​ກູດ ​ໂຮງຮຽນ ມສພ ຊຽງ​ຂວາງ)

(ກວດ ​ແລະ ດັດ​ແກ້​ຂ່າວ​ຄືນ: ຄານ​ສີສະ​ຫວັນ)