ທ່ານ ນາງ ແຮັດເຕີ ວາເຣຍອາວາ ເອກອັກຄະລັດຖະທູດ ສະຫະລັດອາເມລິກາ ປະຈຳລາວ ໃຫ້ສຳພາດຕໍ່ສື່ມວນຊົນລາວໃນໂອກາດມາດຳລົງຕຳແໜ່ງເປັນ ເອກອັກຄະລັດຖະທູດປະຈຳລາວ ຄົນໃໝ່ ໃນວັນທີ 14 ພຶດສະພາ 2024 ນີ້ວ່າ: ສະຫະລັດ ອາເມລິກາ ມີຄວາມປະທັບໃຈຫລາຍທີ່ໄດ້ມີໂອກາດເຮັດວຽກຮ່ວມກັບບັນດາປະເທດອາຊຽນ ແລະ ໄດ້ມີສ່ວນຮ່ວມໃນການສະໜັບສະໜູນ ສປປ ລາວ ເປັນປະທານອາຊຽນ ໃນປີ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງຂອງອາຊຽນ”
ໂດຍລັດຖະບານ ສະຫະລັດອາເມລິກາ ໄດ້ມອບຄອມພິວເຕີຈຳນວນ 50 ໜ່ວຍ, ມູນຄ່າຫລາຍກວ່າ 145.000 ໂດລາສະຫະລັດ ໃຫ້ກະຊວງການຕ່າງປະເທດຂອງລາວ ເພື່ອຊຸກຍູ້ສົ່ງເສີມການເປັນປະທານອາຊຽນຂອງ ສປປ ລາວ, ທັງປະກອບສ່ວນຊ່ວຍພັດທະນາດ້ານຊັບພະຍາກອນມະນຸດ ແລະ ອື່ນໆ.
ພ້ອມກັນນີ້, ຍັງໄດ້ດໍາເນີນໂຄງການຮຽນພາສາອັງກິດໄລຍະພັກແລ້ງ ເປັນເວລາ 3-4 ອາທິດ ສໍາລັບນັກຮຽນທີ່ມີອາຍຸລະຫວ່າງ 15 -17 ປີ ຢູ່ສູນອາເມລິກາທາດດຳ ຕື່ມອີກ.
