ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສະຫະລັດອາເມລິກາ ສົ່ງເສີມໂຄງການປ້ອງກັນພະຍາດ ໃນ ສປປ ລາວ

ດຣ ໂຣເບີດ ອາ ເຣດເຟວ (Robert R. Redfield) ອໍານວຍການ ສູນຄວບຄຸມ ແລະ ປ້ອງກັນພະຍາດຂອງສະຫະລັດອາເມລິກາ  ຫຼື (CDC) ໄດ້ພົບກັບ  ຮສ. ດຣ. ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ແລະ ເຈົ້າໜ້າທີ່ອະວຸໂສຄົນອື່ນໆ ເພື່ອປຶກສາຫາລືກ່ຽວກັບການຮ່ວມມຶືດ້ານສາທາລະນະສຸກ ລະຫວ່າງ ສະຫະລັດອາເມລິກາ ແລະ ສປປ ລາວ ທີ່ພວມສືບຕໍ່ ແລະ ຂະຫຍາຍຕົວ.  ສູນ CDC ຂອງສະຫະລັດອາເມລິກາ ກໍາລັງຮ່ວມເຮັດວຽກກັບບັນດາເຈົ້າໜ້າສາທາລະນະສຸກຂອງລາວ ໃນບັນດາໂຄງການຮ່ວມມືຕ້ານ ແລະ ສະກັດກັ້ນໄພຂົ່ມຂູ່ພະຍາດທີ່ກໍາລັງເກີດຂຶ້ນ ແລະ ເກີດຂຶ້ນໃໜ່ ລວມທັງ ພະຍາດໄຂ້ຫວັດສັດປີກ ແລະ ໄຂ້ຫວັດໃຫຍ່ສາຍພັນໃໝ່, ການຕ້ານ​ຕໍ່ຢາຂອງໄຂ້ມາເລເຣຍ, ໄຂ້ເລືອດອອກ ແລະ HIV/AIDS.

ວ່າການເອກອັກຄະລັດຖະທູດສະຫະລັດອາເມລິກາ ປະຈໍາ ລາວ ທ່ານ ຄໍລິນ ຄຼອສບີ ກ່າວວ່າ: ສປປ ລາວ ແລະ  ສະຫະລັດອາເມລິກາ ໄດ້ຮ່ວມມືກັນຢ່າງສະໝໍ່າສະເໝີ ໃນການຈັດຝຶກອົບຮົມຕ່າງໆດ້ານສາທາລະນະສຸກ ແລະ ເຮັດວຽກດ້ານການປ້ອງກັນພະຍາດ, ເຝົ້າລະວັງ ແລະ ຕອບ​ໂຕ້ຕໍ່ພະຍາດ, ຄວາມພະຍາຍາມຕ່າງໆ ເພື່ອປົກປ້ອງ ປະຊາຊົນລາວ ແລະ ສະຫະລັດອາເມລິກາ. ນອກນັ້ນ, ສະຫະລັດອາເມລິກາ ຍັງຮ່ວມມືກັບ ລັດຖະບານ ແລະ ປະຊາຊົນລາວ ໃນຫຼາຍໂຄງການດ້ານສາທາລະນະສຸກເພື່ອສົ່ງເສີມດ້ານໂພຊະນາການ, ນໍ້າ​ສະ​ອາດ, ວິດຖ່າຍ ແລະ ສຸຂະອານາໄມ, ສຸຂະພາບແມ່ ແລະ ເດັກ ສະໜັບສະໜູນຄົນພິການ ແລະ ໂຄງການອາຫານສຳລັບໂຮງຮຽນ ເຊິ່ງແມ່ນໂຄງການທີ່ນໍາຜົນປະໂຫຍດມາສູ່ບັນດາຄອບຄົວທົ່ວໄປຢູ່ ສປປ ລາວ.

ການຢ້ຽມຢາມຂອງ ດຣ ໂຣເບີດ ລວມມີ ຫ້ອງວິ​ເຄາະ​ການ​ແພດ ແລະ ຫ້ອງການສາທາລະນະສຸກຕ່າງໆ ເພື່ອເບິ່ງ ໂຄງການຝຶກອົບຮົມທີ່ສະໜັບສະໜູນໂດຍລັດຖະບານສະຫະລັດອາເມລິກາ ຈັດຂຶ້ນ ສໍາລັບວິຊາການດ້ານສາທາລະນະສຸກ.  ທ່ານໄດ້ຢ້ຽມຢາມ ໂຄງການສັກຢາກັນພະຍາດແຫ່ງຊາດ ເຊິ່ງແມ່ນສູນເກັບມ້ຽນ ແລະ ຈໍາໜ່າຍວັກແຊັງທັງໝົດ ຢູ່ໃນ ລາວ ເພື່ອຮຽນຮູ້ກ່ຽວກັບການລົງທຶນຂອງ CDC ເຊິ່ງໄດ້ປັບປຸງການຈັດສົ່ງວັກແຊັງ ແລະ ການກຽມພ້ອມຕໍ່ພະຍາດລະບາດ ຢູ່ ສປປ ລາວ.  ການນໍາໃຊ້ວັກແຊັງ ຕ້ານພະຍາດໄຂ້ຫວັດສັດປີກ ເປັນເວລາດົນນານ ແມ່ນພື້ນຖານຂອງໂຄງການດ້ານສາທາລະນະສຸກ ເພື່ອປ້ອງກັນພະຍາດໄຂ້ຫວັດສັດປີກຕາມລະດູການ ແລະ ແມ່ນພາກສ່ວນສໍາຄັນຂອງການຕອບໂຕ້ພະຍາດລະບາດ.  ນອກນັ້ນ, ດຣ ໂຣເບີດ ຍັງໄດ້ສົນທະນາກ່ຽວກັບ ໂຄງການ “ສຸຂະພາບໜຶ່ງດຽວ” ຢູ່ທີ່ຫ້ອງວິ​ເຄາະ​ການ​ແພດແຫ່ງຊາດ ເຊິ່ງແມ່ນແນວຄວາມຄິດຂອງ CDC ທີ່ເນັ້ນຍໍ້າການເຊື່ອມຕໍ່ລະຫວ່າງສຸຂະພາບຂອງປະຊາຊົນ, ສັດ ແລະ ສິ່ງແວດລ້ອມ.

ທັງສອງຝ່າຍໄດ້ສົນທະນາກ່ຽວກັບກອງປະຊຸມລະດັບລັດຖະມົນຕີ ວຽກ​ງານຄວາມໝັ້ນຄົງດ້ານສຸຂະພາບໂລກຄັ້ງທີ່ 5 (the Global Health Security Agenda  ຫຼື GHSA  ເຊິ່ງແມ່ນໂຄງການລິເລີ່ມໂດຍ  ທ່ານ ອີຣິກ ຮາແກນ, ຮອງລັດຖະມົນຕີກະຊວງສາທາລະນະສຸກ ຂອງສະຫະລັດອາເມລິກາ ທີ່ມາຢ້ຽມຢາມ ສປປ ລາວ ໃນວັນທີ 9 ພະຈິກ 2018. GHSA ແມ່ນຄວາມພະຍາຍາມລະດັບສາກົນໃນການສ້າງຄວາມອາດສາມາດໃຫ້ບັນດາປະເທດ ເພື່ອຊ່ວຍໃຫ້ໂລກ ມີຄວາມປອດໄພ ແລະ ປາດສະຈາກໄພຂົ່ມຂູ່ຈາກພະຍາດຊຶມເຊື້ອ ແລະ ຍົກລະດັບຄວາມໝັ້ນຄົງດ້ານສຸຂະພາບໂລກ ໃຫ້ກາຍເປັນບຸລີມະສິດແຫ່ງຊາດ ແລະ ສາກົນ.  ເມື່ອມໍ່ມານີ້, ສະຫະລັດອາເມລິກາ ຕົກລົງໃຫ້ການສະໜັບສະໜູນ 150 ລ້ານໂດລາ  ສະຫະລັດ ແກ່ GHSA.

ໃນການຢ້ຽມຢາມລະດັບສູງຄັ້ງນີ້ ແລະ ການສະໜັບສະໜູນຂອງ ສະຫະລັດອາເມລິກາ ຕໍ່ ຂະແໜງສາທາລະນະສຸກ ຂອງ ສປປ ລາວ ແມ່ນຄວາມສໍາຄັນຂອງຂອງຍຸດທະສາດ ອິນໂດ-ປາຊິຟິກ ຂອງສະຫະລັດອາເມລິກາ ໄດ້ປະກອບສ່ວນດ້ານ ວິຊາການ ແລະ ການຊ່ວຍເຫຼືອ ເພື່ອສ້າງຄວາມເຂັ້ມແຂງໃຫ້ຂະແໜງສາທາລະນະສຸກ ຂອງບັນດາຄູ່ຮ່ວມງານໃນທົ່ວພາກພື້ນ.