ມື້ວານນີ້, ທີ່ນະຄອນຫລວງວຽງຈັນ, ອົງການຢູນິເຊບປະຈຳລາວໄດ້ສະໜອງລະບົບໂທລະໂຄ່ງຊຸມຊົນລວມມີໂທລະໂຄງ,ເຄື່ອງຂະ ຫຍາຍສຽງແລະໄມໂຄໂຟນໃຫ້ສູນກາງສະຫະພັນແມ່ ຍິງລາວຈໍານວນ 50 ຊຸດ ເພື່ອນໍາໃຊ້ໃນການໂຄສະນາໃຫ້ຄວາມຮູ້ໃຫ້ແກ່ຊຸມຊົນກ່ຽວກັບພະຍາດໂຄວິດ19 ແລະ ມາດຕະການປ້ອງກັນຄວາມປອດໄພຕ່າງໆເພື່ອປ້ອງກັນການຕິດເຊື້ອພະຍາດໂຄວິດ19. ງົບປະມານ ການຈັດຊື້ອຸປະກອນດັ່ງກ່າວໄດ້ຮັບການສະຫນັບສະຫນູນຈາກລັດຖະບານຂອງສະຫະລັດອາເມລິກາໂດຍຜ່ານອົງການພັດທະນາສາກົນສະຫະລັດອາເມລິກາ (USAID).

ທ່ານນາງ ບົວຈັນ ສີຫານາດ, ຮອງປະທານສູນກາງສະຫະພັນແມ່ຍິງລາວ ມີຄຳເຫັນກ່ຽວກັບໂຄງ ການນີ້ວ່າ: ລາວສາມາດຄວມຄຸມການແຜ່ລະບາດຂອງພະຍາດໂຄວິດ19 ມາຮອດທຸກມື້ນີ້ ຍ້ອນໄດ້ຮັບການສະຫນັບສະຫນູນຈາກບັນດາຄູ່ຮ່ວມງານ, ແຕ່ການສືບຕໍ່ປະຕິບັດບັນດາມາດຕະການເພື່ອກຽມພ້ອມຕໍ່ສູ້ກັບພະຍາດໂຄວິດ19ແມ່ນມີຄວາມຈໍາເປັນຫລາຍທີ່ສຸດ. ໃນການປະຕິບັດວຽກງານ ນີ້, ພວກເຮົາຕ້ອງສືບຕໍ່ເຜີຍແຜ່ຄວາມຮູ້ເພື່ອແຈ້ງໃຫ້ປະຊາຊົນຮັບຊາບກ່ຽວກັບມາດຕະການປ້ອງກັນຕ່າງໆ ເພື່ອໃຫ້ ເຂົາເຈົ້າຮູ້ຈັກຮັກສາຕົນເອງໃຫ້ປອດໄພ ໃນກໍລະນີທີ່ເກີດການແຜ່ລະບາດອີກຮອບໃຫມ່, ໂດຍສະເພາະແມ່ຍິງ ແລະ ເດັກນ້ອຍທີ່ມີຄວາມສ່ຽງຫລາຍທີ່ສຸດ. ລະບົບໂທລະໂຄ່ງຊຸມຊົນຈະສະໜອງໃຫ້ແກ່ 50 ບ້ານຢູ່ໃນແຂວງສະຫວັນນະເຂດ, ສາລະວັນ, ເຊກອງ, ແລະ ເມືອງສັງທອງນະຄອນຫລວງວຽງຈັນ ເພື່ອປົກປ້ອງແມ່ຍິງ ແລະ ເດັກນ້ອຍຈາກເຊື້ອໄວຣັດໂຄວິດ19, ເພຶ່ອເປັນການສົ່ງເສີມສິດທິຂອງເຂົາເຈົ້າໃນຂັ້່ນບ້ານ. ສ່ວນຫນື່ງຂອງທືນຊ່ວຍເຫລືອລ້າຄັ້ງນີ້,ສູນກາງສະຫະພັນແມ່ຍິງລາວຈະໄດ້ຈັດເຝີກອົບຮົມກ່ຽວກັບການນຳໃຊ້ອຸປະກອນດັ່ງກ່າວຕື່ມອີກ.

ທ່ານ ປີເຕີ້ ເຮມອນ, ເອກອັກຄະລັດຖະທູດ ສ. ອາເມລິກາ ປະຈໍາ ລາວ ກ່າວວ່າ: ພວກເຮົາມີຄວາມພາກພູມໃຈທີ່ໄດ້ຮ່ວມງານ ແລະສະຫນັບສະຫນູນລັດຖະບານລາວ ຮັບປະກັນດ້ານສຸຂະພາບ ແລະ ຄວາມເປັນຢູ່ທີ່ດີຂອງປະຊາຊົນລາວໃນ ເວລາທີ່ມີການລະບາດຂອງພະຍາດໂຄວິດ19 ຢູ່ໃນທົ່ວໂລກ. ຂໍຊົມເຊີຍລັດຖະບານລາວໃນການນຳພາ ແລະ ປະສົບຜົນສຳເລັດມາຮອດທຸກມື້ນີ້ ໃນການແບ່ງປັນຂໍ້ມູນຄວາມກ່ຽວກັບການປ້ອງກັນ ແລະ ຮັກສາຄວາມປອດໄພຂອງປະຊາຊົນ. ທ່ານນາງ ເພຍຣີເບລໂລບຣິດໂຕ, ຜູ້ຕາງຫນ້າອົງການຢູນິເຊບ ປະຈຳ ລາວ ກ່າວວ່າ: ການເຜີຍແຜ່ຂໍ້ມູນຂ່າວສານທີ່ບໍ່ຖືກຕ້ອງໃນໄລຍະການລະບາດຂອງພະຍາດໂຄວິດ-19 ໄດ້ກາຍເປັນອຸປະສັກທີ່ໃຫຍ່ຫລວງ. ອົງການຢູນິເຊບໄດ້ເຮັດວຽກຢ່າງໄກ້ສິດກັບລັດຖະບານລາວ, ຜະລິດ ແລະ ເຜີຍແຜ່ຂໍ້ມູນຂ່າວສານທີ່ມີການອ້າງອີງທາງດ້ານວິທະຍາສາດກ່ຽວກັບການຮັກສາຕົນເອງໃຫ້ປອດໄພແລະສົ່ງເສີມການລ້າງມືດ້ວຍສະບູ, ການນຳໃຊ້ຜ້າອັດປາກ-ອັດດັງແລະການຮັກສາໄລຍະຫ່າງ. ພວກເຮົາໄດ້ສ້າງຄູ່ມືແລະສະປ໋ອດໂຄສະນາທີ່ສາມາດໃຫ້ຂໍ້ມູນກະຈາຍສຽງໂດຍຜ່ານລຳໂພງທີ່ໄດ້ມອບຮັບໃນຄັ້ງນີ້. ຄວາມພະຍາຍາມທັງໝົດນີ້ ເພຶ່ອຈະເອົາຊະນະ ພະຍາດໂຄວິດ19 ອົງການຢູນິເຊບ ໃຫ້ຄໍາໝັ້ນສັນຍາຢ່າງໜັກແໜ້ນໃນການເສີມສ້າງຄວາມເຂັ້ມແຂງເຮັດວຽກຮ່ວມກັບລັດຖະບານລາວ ເພື່ອແກ້ໄຂຜົນກະທົບທີ່ເກີດຈາກການແຜ່ລະບາດຂອງພະຍາດໂຄວິດ-19 ແລະ ໃຫ້ການສະຫນັບສະຫນູນການຕອບໂຕ້ຕໍ່ການລະບາດຂອງພະຍາດດັ່ງກ່າວຢູ່ລາວ.

 

Loading...