ໃນໂອກາດການເຄື່ອນໄຫວຢ້ຽມຢາມ ສປ ຈີນ ໂດຍພາຍຫລັງສຳເລັດການຢ້ຽມຢາມ ຢູ່ແຂວງຢຸນນານ, ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ແລະ ຄະນະຜູ້ແທນຂັ້ນສູງຂອງພັກ, ລັດລາວ ໄດ້ສືບຕໍ່ຢ້ຽມຢາມ ເຂດປົກຄອງຕົນເອງເຜົ່າຈ້ວງກວາງຊີ ແລະ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງ ສະຫາຍ ຫຼິວ ໜິງ, ກຳມະການສູນ ກາງພັກ, ເລຂາຄະນະພັກເຂດ, ປະທານສະພາປະຊາຊົນເຂດປົກຄອງຕົນເອງເຜົ່າຈ້ວງກວາງຊີ ທີ່ນະຄອນຫນານນິງ ໃນວັນທີ 18 ມິຖຸນາ 2023.
ໃນການພົບປະ, ສະຫາຍ ທອງລຸນ ສີສຸລິດ ໄດ້ຕີລາຄາສູງ ຕໍ່ຜົນສໍາເລັດ ທີ່ປະ ຊາຊົນເຂດກວາງຊີ ຍາດມາໄດ້ໃນພາລະກິດແຫ່ງການສ້າງສາພັດທະນາເສດຖະ ກິດ -ສັງຄົມ ໃນຊຸມປີຜ່ານມາ, ໂດຍສະເພາະແມ່ນຜົນສໍາເລັດໃນການລົບລ້າງຄວາມທຸກຍາກ ແລະ ພັດທະນາພື້ນຖານໂຄງລ່າງທີ່ທັນສະໄໝ ກໍຄື ການຈັດງານວາງສະແດງສິນຄ້າ ຈີນ-ອາຊີໃຕ້ ແລະ ເວທີສຳມະນາສາກົນຕ່າງໆ ທີ່ພົ້ນເດັ່ນ ແລະ ມີບົດບາດສຳຄັນ ໃນການຊຸກຍູ້ການຮ່ວມມືຂອງພາກພື້ນ; ໄດ້ຕີລາຄາສູງ ຕໍ່ການພົວ ພັນຮ່ວມມື ແລະ ໄປມາຫາສູ່ເຊິ່ງກັນແລະກັນ ໃນລະດັບຕ່າງໆ ລະຫວ່າງ ສປປ ລາວ-ເຂດປົກຄອງຕົນເອງເຜົ່າຈ້ວງກວາງຊີ ໃນໄລຍະຜ່ານມາ, ໂດຍສະເພາະ ແມ່ນການຮ່ວມມືແລກປ່ຽນບົດຮຽນທາງດ້ານທິດສະດີ ແລະ ພຶດຕິກຳຕົວຈິງ ລະຫວ່າງ ພັກປະຊາຊົນປະຕິວັດລາວ ກັບ ຄະນະ ພັກກອມມູນິດຈີນ ເຂດປົກຄອງຕົນເອງເຜົ່າຈ້ວງກວາງຊີ, ການຮ່ວມມືດ້ານເສດ ຖະກິດ-ການຄ້າ, ການສົ່ງເສີມໃຫ້ນັກທຸ ລະກິດຈີນ ໄປລົງທຶນຢູ່ ສປປ ລາວ, ຕະ ຫລອດຮອດດ້ານວັດທະນະທຳ-ສັງຄົມ, ການສຶກສາ, ສາທາລະນະສຸກ ແລະ ການຊ່ວຍເຫຼືອບຳລຸງກໍ່ສ້າງພະນັກງານ-ບຸກຄະລາກອນ ກໍຄື ໃຫ້ທຶນຮອນແກ່ນັກສຶກສາລາວ ໄປສຶກສາຢູ່ກວາງຊີ, ເຊິ່ງເປັນການປະກອບສ່ວນອັນສໍາຄັນເຂົ້າໃນວຽກງານການສ້າງຖັນແຖວພະນັກງານ-ບຸກຄະລາກອນ ທີ່ມີຄຸນນະພາບໃຫ້ແກ່ ສປປ ລາວ.
ສະຫາຍ ທອງລຸນ ສີສຸລິດ ຍັງໄດ້ລົງເລິກແລກປ່ຽນ ກ່ຽວກັບ ທິດທາງໃນການເສີມຂະຫຍາຍສາຍພົວພັນສອງຝ່າຍ ໃນຕໍ່ຫນ້າ ໃຫ້ມີບາດກ້າວໃໝ່ທີ່ເລິກເຊິ່ງກວ່າເກົ່າ, ສືບຕໍ່ລົງເລິກການແລກປ່ຽນບົດ ຮຽນດ້ານການພັດທະນາຊົນບົດ ແລະ ການລຶບລ້າງຄວາມທຸກຍາກ; ສະຫາຍ ຍັງໄດ້ຊີ້ນໍາໃຫ້ ສອງຝ່າຍສືບຕໍ່ຮັດແຫນ້ນການໄປມາຫາສູ່ກັນ ຢ່າງໃກ້ຊິດ, ຍູ້ແຮງການພົວພັນດ້ານການທູດປະຊາຊົນໃຫ້ກວ້າງຂວາງ ແລະ ມີປະສິດທິຜົນກວ່າເກົ່າ, ນຳໃຊ້ເສັ້ນທາງລົດໄຟລາວ-ຈີນ ໃຫ້ດີ, ປະກອບສ່ວນຊຸກຍູ້ການພົວພັນຮ່ວມມືດ້ານເສດຖະກິດ-ການຄ້າ, ການທ່ອງທ່ຽວ ແລະ ເປີດກວ້າງເສັ້ນທາງການເຊື່ອມໂຍງ ເຊື່ອມຈອດກັນຂອງສອງຝ່າຍ ດ້ວຍຫລາຍຮູບແບບ, ຫລາຍຊ່ອງທາງ ແລະ ກວ້າງຂວາງຍິ່ງຂຶ້ນ.
ສະຫາຍ ຫຼິວ ໜິງ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການຢ້ຽມ ຢາມ ສປ ຈີນ ຂອງ ສະຫາຍ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ ໃນຄັ້ງນີ້ ແລະ ໄດ້ແຈ້ງສະພາບການພັດທະນາເສດຖະ ກິດ-ສັງ ຄົມ ຂອງ ເຂດປົກຄອງຕົນເອງເຜົ່າຈ້ວງກວາງຊີ ໃຫ້ຝ່າຍລາວຊາບ ແລະ ຍັງໄດ້ ສະແດງຄວາມຍິນດີ ທີ່ຈະສືບຕໍ່ຮັດແຫນ້ນການໄປມາຫາສູ່ກັນ, ພົວພັນຮ່ວມມື ແລະ ແລກປ່ຽນບົດຮຽນນຳກັນກັບຝ່າຍລາວ; ເອົາໃຈໃສ່ໃນການປະກອບສ່ວນເຂົ້າໃນການຈັດຕັ້ງຜັນຂະຫຍາຍເນື້ອໃນຈິດໃຈທີ່ການນໍາຂອງສອງພັກ, ສອງປະເທດ ໄດ້ເຫັນດີເປັນເອກະພາບນຳກັນ ເພື່ອປະກອບສ່ວນຢ່າງຕັ້ງຫນ້າ ເຂົ້າໃນການເສີມຂະຫຍາຍສາຍພົວພັນມິຄູ່ຮ່ວມມືຍຸດທະສາດຮອບດ້ານ ຫມັ້ນຄົງຍາວນານ ຕາມທິດ 4 ດີ ລະຫວ່າງ ສອງພັກ, ສອງລັດ ລາວ-ຈີນ ກໍ່ຄື ການປະ ກອບສ່ວນ ສ້າງຄູ່ຮ່ວມຊະຕາກໍາ ລາວ -ຈີນ ໃຫ້ກ້າວເຂົ້າສູ່ລວງເລິກ.
ໃນໂອກາດຢ້ຽມຢາມ ເຂດປົກຄອງຕົນເອງເຜົ່າຈ້ວງກວາງຊີ, ສະຫາຍ ທອງລຸນ ສີສຸລິດ ຍັງໄດ້ຢ້ຽມຢາມ ມະຫາວິທະຍາ ໄລຊົນເຜົ່າກວາງຊີ ແລະ ໄດ້ກ່າວປາໄສ ໃນຫົວຂໍ້ “ສືບສານມູນເຊື້ອມິດຕະພາບ, ສືບຕໍ່ສ້າງຄູ່ຮ່ວມຊະຕາກຳລາວ-ຈີນ ໃຫ້ເຂົ້າສູ່ລວງເລິກ, ພ້ອມກັນກ້າວເດີນໄປຫນ້າ ສູ່ອະນາຄົດ”; ນອກຈາກນັ້ນ, ຍັງຢ້ຽມຢາມບ້ານຊົນນະບົດ ທີ່ເປັນຕົວແບບການພັດທະນາຊົນນະບົດ-ລຶບລ້າງຄວາມທຸກຍາກ ແລະ ຢ້ຽມຢາມສະຖານທີ່ສຳຄັນທາງດ້າວັດທະນະທຳ-ທຳມະຊາດ ຈຳນວນຫນຶ່ງ ຂອງນະຄອນຫນານນິງ ຕື່ມອີກ.
