ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສະຫາຍ ກອງແກ້ວ ໄຊສົງຄາມ ໄດ້ເປັນເລຂາຄະນະບໍລິຫານງານພັກແຂວງບໍລິຄໍາໄຊ ອີກສະໄຫມ

ກອງປະຊຸມໃຫຍ່ ຄັ້ງທີ VII ອົງຄະນະພັກແຂວງ ໄດ້ໄຂຂຶ້ນໃນລະຫວ່າງວັນທີ 24-25 ກັນຍາ 2020 ຢູ່ສະໂມ ສອນໃຫຍ່ຂອງແຂວງພາຍໃຕ້ເປັນປະທານຂອງສະຫາຍ ກອງແກ້ວ ໄຊສົງຄາມ ກຳມະການສູນກາງພັກ ເລຂາຄະນະບໍລິຫານງານພັກແຂວງ ແລະ ເປັນກຽດເຂົ້າຮ່ວມຂອງສະຫາຍ ບຸນທອງ ຈິດມະນີ ກໍາມະການກົມການເມືອງສູນກາງພັກ ຄະນະເລຂາທິການສູນກາງພັກ ປະທານຄະນະກວດກາສູນກາງພັກ. ມີບັນດາການນໍາຂັ້ນສູນກາງ, ພະນັກງານປະຕິວັດອາວຸໂສ ແລະ ຜູ້ແທນສົມບູນ 237 ສະຫາຍ, ຍິງ 26 ສະຫາຍ ທີ່ເປັນຕົວແທນ ໃຫ້ແກ່ສະມາ ຊິກພັກທົ່ວແຂວງ 13.467 ສະຫາຍ, ຍິງ 3.295 ສະຫາຍ.

ກອງປະຊຸມໄດ້ດຳເນີນໄປເປັນເວລາ 2 ວັນ, ຜູ້ແທນສົມບູນໄດ້ຕີລາຄາ ແລະ ຮັບຮອງເອົາບົດລາຍງານການເມືອງໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ໃນໄລຍະ 5 ປີຜ່ານມາ ກໍຄືແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IV ເຫັນໄດ້ວ່າ ມີການຂະຫຍາຍຕົວຢ່າງຕໍ່ເນື່ອງ ສະເລ່ຍ 6,5%, ປີ 2020 ລວມຍອດຜະລິດຕະພັນພາຍໃນບັນລຸ 5.878 ຕື້ກີບ, ລາຍຮັບຕໍ່ຫົວຄົນ 18 ລ້ານກວ່າກີບ ຫຼື 2.000 ກວ່າໂດລາ ແລະ ກອງປະຊຸມຍັງໄດ້ຮັບຮອງເອົາທິດທາງແຜນການ ພັດທະນາເສດຖະກິດ-ສັງຄົມ 5 ປີ 2020-2024 ຂອງຄະນະບໍລິຫານງານພັກແຂວງ ສະໄໝທີ VII ແລະ ຜ່ານບົດສໍາຫຼວດການນໍາພາລວມຂອງຄະນະບໍລິຫານງານພັກແຂວງຊຸດເກົ່າສະໄໝທີ VI.

ກອງປະຊຸມ ຍັງໄດ້ມີການປ່ອນບັດເລືອກຕັ້ງເອົາຄະ ນະບໍລິຫານງານພັກແຂວງຊຸດໃໝ່ ເຊິ່ງມີບຸກຄະລາກອນ ທີ່ຄົບມາດຖານເງື່ອນໄຂລົງສະໝັກທັງໝົດ 38 ສະຫາຍ ຍິງ 2 ສະຫາຍ, ໃນນີ້ກອງປະຊຸມ ໄດ້ຄົ້ນຄວ້າປ່ອນບັດຄັດເລືອກໄດ້ 33 ສະຫາຍ ຍິງ 2 ສະຫາຍ ແລະ ກອງປະຊຸມຄັ້ງປະຖົມມະລືກຂອງ ຄະນະບໍລິຫານງານພັກແຂວງ ຄັ້ງທີ VII ໄດ້ເລືອກຕັ້ງເອົາຄະນະປະຈຳພັກແຂວງ 11 ສະຫາຍ ໂດຍໄດ້ເຫັນດີເປັນເອກະພາບເລືອກເອົາ ສະຫາຍ ກອງແກ້ວ ໄຊສົງຄາມ ເປັນເລຂາຄະນະບໍລິຫານງານພັກແຂວງ, ສະຫາຍ ສຸວັນນີ ໄຊຊະນະ, ສະຫາຍ ວັນວີໄລ ແດນພູຫຼວງ ເປັນຮອງເລຂາ ແລະ ໄດ້ເລືອກຕັ້ງເອົາສະຫາຍ ດວງຕາ ມໍລະຄາສຸກ ເປັນປະທານຄະນະກວດກາ, ສະຫາຍ ແສງເດືອນ ບໍລິຈັກ, ສະຫາຍ ບຸນທະວີ ດວງປັນຍາ, ສະຫາຍ ນາງ ແກ້ວວິໄລ ບຸນໂຮມ ແລະ ສະຫາຍ ຄໍາຕັນ ສີສົມຈິດ ເປັນຮອງປະທານຄະນະກວດກາ. ກອງປະຊຸມຍັງໄດ້ປ່ອນບັດເລືອກເອົາຜູ້ແທນສົມບູນ ໄປເຂົ້າ ຮ່ວມກອງປະຊຸມໃຫຍ່ ຄັ້ງທີ XI ຂອງສູນກາງພັກ ທີ່ຈະຈັດຂຶ້ນໃນຕໍ່ໜ້າ ຈໍານວນ 22 ສະຫາຍ, ຍິງ 1 ສະຫາຍ ແລະ ຜູ້ແທນສຳຮອງ 3 ສະຫາຍ.

ໂອກາດດັ່ງກ່າວນີ້ສະຫາຍ ບຸນທອງ ຈິດມະນີ ຍັງໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳຕໍ່ກອງປະຊຸມໃນຄັ້ງນີ້, ເຊິ່ງທ່ານ ໄດ້ເນັ້ນໜັກໃຫ້ຄະນະບໍລິຫານງານພັກແຂວງຊຸດໃໝ່ ເອົາໃຈໃສ່ສືບຕໍ່ນໍາພາ-ຊີ້ນໍາການຈັດຕັ້ງຜັນຂະຫຍາຍເນື້ອໃນ ມະຕິກອງປະຊຸມໃຫຍ່ຄັ້ງນີ້ ໃຫ້ເປັນແຜນງານ, ໂຄງການ ແລະ ສ້າງເປັນນິຕິກໍາລະອຽດ ເລີ່ມຕັ້ງແຕ່ການຈັດຕັ້ງເຜີຍແຜ່, ເຊື່ອມຊຶມ ໃນຄະນະບໍລິຫານງານພັກແຂວງ ລົງໄປເຖິງຄະນະພັກແຕ່ລະຂັ້ນ, ສະມາຊິກພັກ, ພະນັກງານ ຢູ່ບັນດາເມືອງ, ຂະແໜງການ ແລະ ຮາກຖານຕ່າງໆ ກໍຄືປະຊາຊົນບັນດາເຜົ່າໃຫ້ເລິກເຊິ່ງ ແລະ ທົ່ວເຖິງ, ເພື່ອສ້າງຄວາມຮັບຮູ້ເຂົ້າໃຈ ແລະ ເປັນເອກະພາບກັນທາງດ້ານທັດສະນະ ແລະ ການກະທໍາຕົວຈິງ, ເຮັດໃຫ້ສະມາຊິກພັກ, ພະນັກງານ ແລະ ປະຊາຊົນມີຄວາມຮັບຮູ້, ເຂົ້າໃຈ ແລະ ເຊື່ອມຊຶ່ມ, ກໍາແໜ້ນຕໍ່ທິດທາງ, ແຜນນະໂຍບາຍ, ຄາດໝາຍສູ້ຊົນຕ່າງໆ ແລະ ມີຄວາມຕື່ນຕົວເປັນເຈົ້າການເຂົ້າຮ່ວມໃນການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ ຢ່າງເປັນຂະບວນການທີ່ແຂງແຮງ ຕໍ່ເນື່ອງມີປະສິດທິຜົນ.

Cr: ຫນັງສຶພິມບໍລິຄໍາໄຊ