ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສະຫາຍ ທອງລຸນ ສີສຸລິດ , ກໍາມະການກົມການເມືອງສູນກາງພັກ, ນາຍົກລັດຖະມົນຕີ ເຂົ້າຮ່ວມວາງພວງມາລາໄຫວ້ອາໄລ ສະຫາຍ ໂດ໊ ເມື່ອຍ, ອາດີດເລຂາທິການໃຫຍ່ ພັກກອມມູນິດຫວຽດນາມ ທີ່ນະຄອນຫລວງຮ່າໂນ້ຍ

ໃນວັນທີ 6-7 ຕຸລາ 2018 ນີ້, ສະຫາຍ ທອງລຸນ ສີສຸລິດ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ ຕາງໜ້າຄະນະບໍລິຫານງານສູນກາງພັກປະຊາຊົນປະຕິວັດລາວ, ສະພາແຫ່ງຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສູນກາງແນວລາວສ້າງຊາດ ພ້ອມດ້ວຍປະຊາຊົນລາວບັນດາເຜົ່າ ໄດ້ນຳພາຄະນະເຂົ້າຮ່ວມພິທີໄຫວ້ອາໄລ ເຖິງ ດວງວິນຍານຂອງສະຫາຍ ໂດ໊ ເມື່ອຍ, ອາດີດເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ທີ່ນະຄອນຫລວງຮ່າໂນ້ຍ.

ໃນຕອນແລງຂອງວັນທີ 6 ຕຸລາ 2018, ຄະນະໄດ້ໄປວາງພວງມາລາ ແລະ ເຊັນປຶ້ມໄຫວ້ອາໄລ ທີ່ຫໍຊາປະນະກິດສົບແຫ່ງຊາດ, ເຮືອນເລກທີ 5, ຖະໜົນ ເຈິ່ນ ແຖັງ ຕົງ, ນະຄອນຫລວງຮ່າໂນ້ຍ ເພື່ອສະແດງວາມໄຫວ້ອາໄລຕໍ່ການຈາກໄປຂອງ ສະຫາຍ ໂດ໊ ເມື່ອຍ, ອາດີດເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ, ລູກຜູ້ປະເສີດຂອງປະຊາຊົນຫວຽດນາມ, ນັກປະຕິວັດຜູ້ກ້າແກ່ນ, ຜູ້ນຳທີ່ເຄົາລົບຮັກຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ.

ການຈາກໄປໂດຍບໍ່ມີວັນກັບຄືນມາຂອງ ສະຫາຍ ໂດ໊ ເມື່ອຍ ເປັນການສູນເສຍອັນໃຫຍ່ຫລວງ ບໍ່ພຽງແຕ່ ຂອງພັກ-ລັດ ແລະ ປະຊາຊົນຫວຽດນາມອ້າຍນ້ອງ ແຕ່ຍັງເປັນການສູນເສຍເພື່ອນມິດສະຫາຍທີ່ໃກ້ຊິດ ແລະ ສະໜິດສະໜົມທີ່ສຸດຂອງພັກ, ລັດ ແລະ ປະຊາຊົນລາວອີກດ້ວຍ, ສະຫາຍໄດ້ມີການປະກອບສ່ວນຢ່າງໃຫຍ່ຫລວງເຂົ້າໃນການເສີມຂະຫຍາຍສາຍພົວພັນມິດຕະພາບທີ່ມີມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ.

ໃນວັນດຽວກັນນີ້, ສະຫາຍ ທອງລຸນ ສີສຸລິດ ພ້ອມດ້ວຍຄະນະ ໄດ້ເຂົ້າຢ້ຽມຂ່ຳນັບ ສະຫາຍ ຫງວຽນ ຟູຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ເພື່ອສະແດງຄວາມເສົ້າໂສກເສຍໃຈອາໄລຮັກຢ່າງສຸດຊຶ້ງຕໍ່ການຈາກໄປຂອງສະຫາຍ ໂດ໊ ເມື່ອຍ, ພ້ອມທັງນຳເອົາຄວາມຢື້ຢາມຖາມຂ່າວ ແລະ ຄວາມເສົ້າສະຫລົດໃຈຈາກ ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ ປປລາວ, ປະທານປະເທດ ແຫ່ງ ສປປ ລາວ ມາຍັງພັກ, ລັດ ແລະ ປະຊາຊົນຫວຽດນາມອ້າຍນ້ອງ ຕໍ່ການສູນເສຍອັນໃຫຍ່ຫລວງໃນຄັ້ງນີ້. ສະຫາຍເລຂາທິການໃຫຍ່ ຫງວຽນ ຟູຈ້ອງ ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ການເຂົ້າຮ່ວມພິທີໄຫວ້ອາໄລ ແລະ ພິທີຊາປະນະກິດສົບຂອງ ສະຫາຍ ໂດ໊ ເມື່ອຍ ຂອງຄະນະຜູ້ແທນຂັ້ນສູງພັກ, ລັດລາວ ເຊິ່ງເປັນການສະແດງໃຫ້ເຫັນເຖິງມິດຈິດມິດໃຈທີ່ດູດດື່ມ, ນ້ຳໃຈສາມັກຄີພິເສດຂອງພັກ, ລັດ ແລະ ປະຊາຊົນລາວອ້າຍນ້ອງທີ່ມີຕໍ່ພັກ, ລັດ ແລະ ປະຊາຊົນຫວຽດນາມ ໃນຍາມຄັບຂັນນີ້.

ໃນຕອນເຊົ້າຂອງວັນທີ 7 ຕຸລາ 2018, ຄະນະ ໄດ້ເຂົ້າຮ່ວມກັບການນຳຂັ້ນສູງພັກ-ລັດ ແຫ່ງ ສສ ຫວຽດນາມ ໄດ້ເຂົ້າຮ່ວມພິທີໄຫວ້ອາໄລຢ່າງເປັນທາງການໃຫ້ແກ່ສະຫາຍ ໂດ໊ ເມື່ອຍ ກ່ອນທີ່ຈະເຄື່ອນຍ້າຍສົບໄປຈັດພິທີສົ່ງສະການຕາມປະເພນີຢູ່ບ້ານເກີດຂອງເພິ່ນ ຢູ່ທີ່ເມືອງແທງຈີ່, ນະຄອນຫລວງຮ່າໂນ້ຍ.