ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສະຫາຍ ບຸນຍັງ ວໍລະຈິດ, ເລຂາທິການໃຫຍ່, ປະທານປະເທດແຫ່ງ ສປປ ລາວ ສົນທະນາທາງໄກ ກັບສະຫາຍ ຫງວຽນ ຟູ ຈ້ອງ, ເລຂາທິການໃຫຍ່, ປະທານປະເທດແຫ່ງ ສສ ຫວຽດນາມ.

ຕອນບ່າຍວັນທີ 13 ສິງຫາ 2020 ສະຫາຍ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ໄດ້ສົນທະນາທາງໄກ ກັບ ສະຫາຍ ຫງວຽນ ຟູ ຈ້ອງ, ເລຂາທິການໃຫຍ່ຄະນະບໍລະຫານງານສູນກາງພັກ ກອມມູນິດຫວຽດນາມ, ປະທານປະເທດແຫ່ງ ສສ ຫວຽດນາມ.
ໃນການສົນທະນາຄັ້ງນີ້, ສະຫາຍ ບຸນຍັງ ວໍລະຈິດ ໄດ້ສະແດງຄວາມປິຕິຊົມຊຶ່ນ ທີ່ໄດ້ມີໂອກາດສົນທະນາທາງໄກກັບສະຫາຍ ຫງວຽນ ຟູ ຈ້ອງ ແລະ ຖືໂອກາດດັ່ງກ່າວແດງຄວາມເສົ້າໂສກເສຍໃຈ ແລະ ອາໄລອາວອນຢ່າງສຸດຊຶ້ງຮ່ວມກັບ ພັກ, ລັດ ແລະ ປະຊາຊົນຫວຽດນາມອ້າຍນ້ອງ ຕໍ່ການຈາກໄປຂອງ ສະຫາຍ ເລຂາຟຽວ, ອະດີດເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ. ການຈາກໄປຂອງສະຫາຍ ເລ ຂາ ຟຽວ ເປັນການສູນເສຍທີ່ໃຫຍ່ຫລວງຂອງພັກ, ລັດ ແລະ ປະຊາຊົນ ຫວຽດນາມ ອ້າຍນ້ອງ, ສູນເສຍຜູ້ນຳປະຕິວັດ ທີ່ກ້າແກ່ນ, ເດັດດ່ຽວໜຽວແໜ້ນຂອງປະຊາຊົນ ຫວຽດນາມ.
ສະຫາຍ ບຸນຍັງ ວໍລະຈິດ ຍັງໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນສຳເລັດອັນໃຫຍ່ຫຼວງ, ຮອບດ້ານ ທີ່ປະຊາຊົນ ຫວຽດນາມ ອ້າຍນ້ອງ ຍາດມາໄດ້ໄລຍະຜ່ານມາກໍ່ຄືຕີລາຄາຜົນສຳເລັດໃນການຮັບມື, ສະກັດກັ້ນ ແລະ ຄວບຄຸມການແຜ່ລະບາດ ຂອງພະຍາດ ໂຄວິດ-19ໃນຮອບທີ 1 ຜ່ານມາ ແລະ ສະແດງຄວາມເຊື່ອໝັ້ນວ່າພັກ, ລັດຖະບານ ຫວຽດນາມ ຈະສືບຕໍ່ຍາດໄດ້ໄຊຊະນະໃນການຕ້ານ, ຄວບຄຸມພະຍາດດັ່ງກ່າວທີ່ພວມລະບາດຮອບສອງຢູ່ຫວຽດນາມ, ສະແດງຄວາມຊົມເຊີຍ ຕໍ່ຜົນສຳເລັດຂອງ ສສ ຫວຽດນາມ ໃນການເປັນປະທານອາຊຽນ ໃນປີ 2020 ນີ້ ແລະ ຍັງໄດ້ອວຍພອນໃຫ້ປະຊາຊົນ ຫວຽດນາມ ອ້າຍນ້ອງ ພາຍໃຕ້ການນຳພາຂອງພັກກອມມູນິດຫວຽດນາມ ຈະສືບຕໍ່ຍາດໄດ້ຜົນສຳເລັດໃໝ່ໃຫຍ່ຫລວງກວ່າເກົ່າ ໃນພາລະກິດແຫ່ງການປ່ຽນແປງໃໝ່, ສືບຕໍ່ປະຕິບັດມະຕິກອງປະຊຸມໃຫຍ່ຂອງ ຄັ້ງທີ 12 ຂອງພັກວາງອອກໃຫ້ປະກົດເປັນຈິງ ເພື່ອກ້າວໄປສູ່ການດຳເນີນກອງປະຊຸມໃຫຍ່ຄັ້ງທີ 13 ຂອງພັກໃນຕໍ່ໜ້າ.
ສະຫາຍ ບຸນຍັງ ວໍລະຈິດ ຍັງໄດ້ສະແດງຄວາມຂອບໃຈ ທີ່ຫວຽດນາມ ໄດ້ບິແບ່ງບົດຮຽນ ແລະ ໃຫ້ການຊ່ວຍເຫລືອລາວ ເພື່ອຮັບມືກັບການແຜ່ລະບາດຂອງພະຍາດ ໂຄວິດ-19 ຢ່າງທັນການເຊິ່ງເປັນການປະກອບສ່ວນ ຊ່ວຍເຫລືອ ສປປ ລາວ ໃນການສະກັດກັ້ນ ຕ້ານການແຜ່ລະບາດຂອງເຊື້ອພະຍາດ ໂຄວິດ-19 ຢ່າງມີປະສິດທິຜົນໃນໄລຍະຜ່ານມາ.
ສະຫາຍ ຫງວຽນ ຟູ ຈ້ອງ ໄດ້ຕີລາຄາສູງຕໍ່ການສົນທະນາທາງໄກກັບສະຫາຍ ບຸນຍັງ ວໍລະຈິດ ໃນຄັ້ງນີ້ ໂດຍໄດ້ສະແດງຄວາມຂອບໃຈມາຍັງ ພັກ, ລັດຖະບານ, ສະພາແຫ່ງຊາດ, ສູນກາງແນວລາວສ້າງຊາດ ແລະ ອົງການຕ່າງໆ ທີ່ໄດ້ສົ່ງໂທລະເລກແບ່ງເບົາຄວາມທຸກໂສກ ຕໍ່ການຈາກໄປຂອງສະຫາຍ ເລ ຂາ ຟຽວ, ອະດີດເລຂາທິການໃຫຍ່ ພັກກອມມູນິດຫວຽດນາມ ທັງຈະມີຄະນະຜູ້ແທນຂັ້ນສູງພັກ-ລັດ ລາວໄປໄຫວ້ອາໄລຕື່ມອີກ, ເຊິ່ງເປັນການສະແດງໃຫ້ເຫັນເຖິງ ມູນເຊື້ອສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ ສອງລັດ ແລະ ປະຊາຊົນສອງຊາດ. ສະຫາຍໄດ້ສະແດງຄວາມຊົມເຊີຍຕໍ່ຜົນສຳເລັດທີ່ປະຊາຊົນລາວ ຍາດມາໄດ້ໄລຍະຜ່ານມາ ແລະ ສະແດງຄວາມເຊື່ອໝັ້ນວ່າພາຍໃຕ້ການນຳພາຂອງພັກ ປະຊາຊົນ ປະຕິວັດລາວ, ປະຊາຊົນລາວ ບັນດາເຜົ່າຈະສືບຕໍ່ຍາດໄດ້ຜົນສຳເລັດໃໝ່ ໃຫຍ່ຫລວງກວ່າເກົ່າ, ປະຕິບັດສຳເລັດບັນດາເປົ້າໝາຍທີ່ມະຕິກອງປະຊຸມໃຫຍ່ຄັ້ງທີ 10 ຂອງພັກ ວາງອອກ, ກ້າວສູ່ການກະກຽມດຳເນີນກອງປະຊຸມໃຫຍ່ຄັ້ງທີ 11 ຂອງພັກຢ່າງມີໄຊ.
ໃນໂອກາດນີ້, ສະຫາຍ ຫງວຽນ ຟູ ຈ້ອງ ໄດ້ສະແດງຄວາມຂອບໃຈຕໍ່ສະຫາຍ ບຸນຍັງ ວໍລະຈິດ ທີ່ໄດ້ ສະແດງຄວາມເປັນຫ່ວງເປັນໄຍ ຕໍ່ສະພາບການ ຕ້ານ ແລະ ສະກັດກັ້ນເຊື້ອພະຍາດ ໂຄວິດ -19 ຢູ່ ສສ ຫວຽດນາມ ໃນປະຈຸບັນ, ສະແດງຄວາມຂອບໃຈຕໍ່ຝ່າຍ ລາວ ໃນການປະສານສົມທົບກັບຫວຽດນາມ ໃນກອບການຮ່ວມມື ອາຊຽນ ເພື່ອຍາດເອົາໝາກຜົນອັນຕັ້ງໜ້າຂອງແຕ່ລະປະເທດ; ສະເໜີໃຫ້ສອງປະເທດ ສືບຕໍ່ຮວ່ມມືຢ່າງແໜ້ນແຟ້ນ, ຮ່ວມຈິດຮ່ວມໃຈ ຄຽງບ່າຄຽງໄຫລ່ກັນ ເອົາຊະນະໃນການຕ້ານເຊື້ອພະຍາດ ໂຄວິດ-19 ເພື່ອເຮັດໃຫ້ສອງປະເທດມີຄວາມສະຫງົບສຸກ ສືບຕໍ່ພັດທະນາເສດຖະກິດ-ສັງຄົມ ແລະ ຍົກສູງຊີວິດການເປັນຢູ່ຂອງປະຊາຊົນສອງປະເທດໃຫ້ດີຂຶ້ນເລື້ອຍໆ.
ສະຫາຍ ຫງວຽນ ຟູ ຈ້ອງ ແລະ ສະຫາຍ ບຸນຍັງ ວໍລະຈິດ ໄດ້ແຈ້ງໃຫ້ກັນຊາບກ່ຽວກັບສະພາບການພົ້ນເດັ່ນຂອງແຕ່ລະພັກ, ແຕ່ລະປະເທດ, ແລກປ່ຽນຄວາມຄິດຄວາມເຫັນກ່ຽວກັບການພົວພັນຮ່ວມມືລະຫວ່າງສອງປະເທດ, ແລກປ່ຽນສະພາບການໃນຂົງເຂດ ແລະ ສາກົນທີ່ຕ່າງຝ່າຍມີຄວາມສົນໃຈ, ໄດ້ຕີລາຄາສູງເຖິງການພົວພັນຮ່ວມມືລະຫວ່າງສອງພັກ, ສອງລັດໃນໄລຍະຜ່ານມາ ທີ່ໄດ້ຮັບການປັບປຸງ ແລະ ຂະຫຍາຍຕົວໃນທຸກຂົງເຂດວຽກງານ, ປະກອບສ່ວນເຂົ້າໃນການຮັກສາສະຖຽນລະພາບດ້ານການເມືອງ ແລະ ການພັດທະນາເສດຖະກິດສັງຄົມຢູ່ແຕ່ລະປະເທດ, ພ້ອມທັງຢືນຢັນຈະພ້ອມກັນສືບຕໍ່ປົກປັກຮັກສາ ແລະ ເພີ່ມພູນຄູນສ້າງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການພົວພັນຮ່ວມມືຮອບດ້ານລະຫວ່າງສອງຊາດ ລາວ-ຫວຽດນາມໃຫ້ຈະເລີນງອກງາມ ແລະ ຍືນຍົງຄົງຢູ່ຕະຫລອດໄປ.