ໃນວັນທີ 6 ກໍລະກົດ 2021 ນີ້, ສະຫາຍ ບຸນທອງ ຈິດມະນີ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດແຫ່ງ ສປປ ລາວ ໄດ້ນໍາພາຄະນະຜູ້ແທນ ພັກ ປປ ລາວ, ບັນດາພະນັກງານນຳພາ-ຄຸ້ມຄອງ, ບັນດານັກຄົ້ນຄວ້າ, ຄັງປັນຍາຂອງ ພັກ ປປ ລາວ, ຄະນະສັນ ຕິພາບ ແລະ ສາມັກຄີຂອງລາວ ເຂົ້າຮ່ວມກອງປະຊຸມ ສຸດຍອດການນຳພັກກອມ ມູນິດຈີນ ກັບ ພັກການເມືອງໃນໂລກ ຜ່ານວີດີໂອທາງໄກ, ເຊິ່ງໄດ້ຈັດຂຶ້ນຢູ່ນະຄອນຫລວງປັກກິ່ງ, ສປ ຈີນ ໂດຍການເປັນເຈົ້າພາບ ຂອງສູນກາງພັກກອມມູນິດຈີນ ພາຍໃຕ້ຫົວຂໍ້: “ສ້າງຄວາມຜາສຸກໃຫ້ແກ່ປະຊາຊົນ: ພາລະໜ້າທີ່ຂອງພັກການເມືອງ”. ໂດຍມີບັນດາຜູ້ແທນ ລະດັບການນໍາຂອງພັກ ຫລາຍກວ່າ 500 ສະຫາຍ ແລະ ຜູ້ເຂົ້າຮ່ວມໃນລະດັບອື່ນໆ ຫລາຍກວ່າ 10.000 ສະຫາຍ ຈາກພັກການເມືອງ ແລະ ອົງການຈັດຕັ້ງການເມືອງຕ່າງໆຈາກ 160 ປະເທດ ເຂົ້າຮ່ວມ.
ໃນໂອກາດດັ່ງກ່າວ, ສະຫາຍ ບຸນທອງ ຈິດມະນີ ໄດ້ປະກອບຄໍາເຫັນຕໍ່ກອງປະຊຸມ ໂດຍໄດ້ສະແດງຄວາມຊົມເຊີຍ ວັນສ້າງຕັ້ງພັກກອມມູນິດຈີນ ຄົບຮອບ 100 ປີ, ຕີລາຄາສູງຕໍ່ການເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ ແລະ ໄຊຊະນະອັນໃຫຍ່ຫລວງເປັນກ້າວໆມາຂອງພັກກອມມູນິດຈີນ ໃນໄລຍະ 1 ສະຕະວັດທີ່ຜ່ານມາ ໃນການນໍາພາປະຊາຊົນຈີນເຮັດສໍາເລັດການປະຕິວັດປົດປ່ອຍຊາດ ແລະ ສະຖາປະນາ ສປ ຈີນ ຢ່າງສະຫງ່າຜ່າເຜີຍ ໃນປີ 1949, ດໍາເນີນພາລະກິດປະຕິຮູບເປີດປະຕູສູ່ໂລກພາຍນອກຂອງພັກຢ່າງກ້າຫານ, ສ້າງການຫັັນປ່ຽນຢ່າງໃຫຍ່ຫລວງ ໃຫ້ແກ່ການພັດທະນາຢ່າງກ້າວກະໂດດຂັ້ນ ແລະ ມະ ຫັດສະຈັນ ບົນເສັ້ນທາງແຫ່ງການສ້າງສັງຄົມນິຍົມທີ່ມີສີສັນພິເສດຂອງຈີນ; ນັບແຕ່ໄລຍະທີ່ມີ ສະຫາຍເລຂາທິການໃຫຍ່, ປະທານປະເທດ ສີ ຈິ້ນຜິງ ເປັນແກນກາງນໍາພານັ້ນ, ພັກກອມມູນິດຈີນ ກໍຄື ສປ ຈີນ ສືບຕໍ່ມີຜົນສໍາເລັດໃຫຍ່ຫລວງ, ຮອບດ້ານ ແລະ ໜັກແໜ້ນ, ອັນພົ້ນເດັ່ນແມ່ນການເຮັດສໍາເລັດເປົ້າໝາຍສູ້ຊົນ 100 ປີທໍາອິດ ໃນການສ້າງສໍາເລັດສັງຄົມອີ່ມໜໍາສໍາລານຢ່າງຮອບດ້ານ ອັນໄດ້ເຮັດໃຫ້ປະຊາຊົນຈີນ 800 ລ້ານຄົນ ຫລຸດພົ້ນອອກຈາກຄວາມທຸກຍາກພຽງໃນເວລາອັນສັ້ນ, ເຊິ່ງເປັນຕົວແບບທີ່ໂດດເດັ່ນທີ່ບໍ່ເຄີຍມີມາກ່ອນໃນປະຫວັດສາດຂອງມວນມະນຸດ, ເປັນການປະກອບສ່ວນສໍາຄັນເຂົ້າໃນການບັນລຸເປົ້າໝາຍພັດທະນາແບບຍືນຍົງ ຂອງອົງການສະຫະປະຊາຊາດ; ສະແດງຄວາມເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນໍາພາອັນເຂັ້ມແຂງຂອງພັກກອມມູນິດຈີນ ໂດຍມີສະຫາຍ ສີ ຈິ້ນຜິງ ເປັນແກນກາງນັ້ນ ສປ ຈີນ ຈະສືບຕໍ່ຍາດໄດ້ໄຊຊະນະໃໝ່ໃຫຍ່ຫລວງກວ່າເກົ່າໃນການບັນລຸຄວາມມຸ່ງມາດປາຖະໜາ ແລະ ພາລະກິດອັນເປັນຮາກເຫງົ້າຂອງພັກ ເພື່ອຄວາມຜາສຸກຂອງປະຊາຊົນຈີນ, ບັນລຸການສ້າງສັງຄົມນິຍົມທີ່ທັນສະໄໝ ແລະ ເຂັ້ມແຂງຢ່າງຮອບດ້ານ ແລະ ການຟື້ນຟູຄວາມຈະເລີນຮຸ່ງເຮືອງຂອງຊາດຈີນ.
ສະຫາຍ ບຸນທອງ ຈິດມະນີ ໄດ້ສະແດງຄວາມຊົມເຊີຍ ຕໍ່ການເປັນເຈົ້າພາບຈັດກອງປະຊຸມສຸດຍອດການນຳພັກກອມມູນິດຈີນ ກັບ ພັກການເມືອງໃນໂລກ ໃນຫົວຂໍ້ທີ່ສອດຄ່ອງກັບຄວາມຮຽກຮ້ອງຕ້ອງການຕົວຈິງ ແລະ ສະແດງຄວາມເປັນເອກະພາບຕໍ່ຖະແຫລ່ງການກອງປະຊຸມດັ່ງກ່າວ. ນອກຈາກນີ້, ສະຫາຍ ບຸນທອງ ຈິດມະນີ ຍັງໄດ້ຍົກໃຫ້ເຫັນບົດຮຽນ ແລະ ພຶດຕິກໍາຕົວຈິງແຫ່ງການນໍາພາຂອງພັກ ປປ ລາວໃນຫລາຍທົດສະວັດຜ່ານມາ ເຊິ່ງເວລາໃດ ພັກ ປປ ລາວ ກໍຢຶດໝັ້ນໃນມານະຈິດປະຕິວັດອັນແນ່ວແນ່ ແລະ ທັດສະນະຫລັກໝັ້ນຊົນຊັ້ນກໍາມະກອນຢ່າງສະເໝີຕົ້ນສະເໝີປາຍ ບົນພື້ນຖານສັດຈະທໍາຂອງລັດທິມາກ-ເລນິນ ທີ່ຍາມໃດກໍຈົງຮັກພັກດີຕໍ່ຜົນປະໂຫຍດຂອງຊາດ ແລະ ຄວາມມຸ່ງມາດປາຖະໜາອັນແຮງກ້າຂອງປະຊາຊົນລາວບັນດາເຜົ່າ ບົນເສັ້ນທາງແຫ່ງການກ້າວເດີນສູ່ສັງຄົມນິຍົມ.
ບັນດາຜູ້ແທນກອງປະຊຸມ ໄດ້ເປັນເອກະພາບຮັບຮອງເອົາຖະແຫລງການຮ່ວມຂອງກອງປະຊຸມ, ເຊິ່ງໄດ້ສະເໜີໃຫ້ບັນດາພັກການເມືອງຂອງທຸກປະເທດ ຈົ່ງເຊີດຊູມານະຈິດໃນການສ້າງທັດສະນະທີ່ເປັນເອກະພາບ ກ່ຽວກັບຄຸນຄ່າລວມຂອງມວນມະນຸດ; ສົ່ງເສີມການພັດທະນາຮ່ວມກັນ ເພື່ອພ້ອມກັນບັນລຸວາລະ 2030 ເພື່ອການພັດທະນາແບບຍືນຍົງຂອງອົງການສະຫະປະຊາຊາດ; ສ້າງໂລກໃຫ້ກາຍເປັນມາຕຸພູມແຫ່ງມິດໄມຕີ ໂດຍການບັນລຸ “ຄວາມສະເໝີພາບລະຫວ່າງຮຸ່ນຄົນ”; ຮ່ວມແຮງຮ່ວມໃຈກັນປົກປ້ອງຊີວິດ ແລະ ສຸຂະພາບຂອງປະຊາຊົນໂດຍສະເພາະ ການຕ້ານ ແລະ ແກ້ໄຂພະຍາດໂຄວິດ-19 ແລະ ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ; ອໍານວຍຄວາມສະດວກໃຫ້ແກ່ການແລກປ່ຽນ ແລະ ການຮຽນຮູ້ເຊິ່ງກັນ ແລະ ກັນລະຫວ່າງບັນດາອະລິຍະທໍາຕ່າງໆ; ຍົກສູງຄວາມສາມາດໃນການບໍລິຫານຂອງພັກ ໂດຍຜ່ານການກໍ່ສ້າງພັກ ໃຫ້ມີຄວາມທັນສະໄໝ, ສ້າງກົດລະບຽບການປົກຄອງສາກົນທີ່ດີກວ່າເກົ່າ ບົນພື້ນຖານຈຸດປະສົງ ແລະ ຫລັກການຂອງກົດບັດສະຫະປະຊາຊາດ.
Loading...