ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 18ມັງກອນ 2024 ນີ້, ສະຫາຍ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນຄວາມສະຫງົບ ແລະ ສະຫາຍ ພົນຕີ ປະສິດ ທ່ຽງທຳ ຄະນະປະຈຳພັກ ກະຊວງປອ້ງກັນປະເທດ ຫົວໜ້າກົມໃຫຍ່ເຕັກນິກກອງທັບ ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມ ພົບປະໂອ້ລົມພະນັກງານ-ນັກຮົບ ກອງພົນທີ 4 ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວຄົບຮອບ 75 ປີ ( ວັນທີ 20 ມັງກອນ 1949-ວັນທີ 20 ມັງກອນ 2024 ) ໂດຍໃຫ້ກຽດ ຮັບຕ້ອນຮັບຂອງທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງ ສະຫວັນນະເຂດ ພອ້ມດວ້ຍຄະນະນໍາແຂວງ,ຄະນະນຳກະຊວງປ້ອງກັນປະເທດ,ຄະນະນຳຂອງສອງກຳລັງປກຊ-ປກສ ພ້ອມດວ້ຍ ຄະນະພັກ-ຄະນະບັນຊາ,ນາຍ ແລະ ພົນທະຫານ, ພະນັກງານປະຕິວັດອາວຸໂສ ແລະ ແຂກຖືກເຊີນເຂົ້າຮ່ວມ.
ສະຫາຍ ພົນຈັດຕະວາ ສົມຈິດ ກິດຕິຍະລາດ ຫົວໜ້າການເມືອງ ກອງພົນທີ 4 ໄດ້ລາຍງານໂດຍຫຍໍ້ສະພາບຈຸດພິເສດ, ທີ່ຕັ້ງ, ພາລະບົດບາດ ແລະ ໜ້າທີ່ການເມືອງຂອງກົມກອງລວມທັງຜົນງານທີ່ຍາດມາໄດ້ ໃນໄລຍະຜ່ານມາປະກອບສ່ວນຢ່າງຕັ້ງໜ້າເຂົ້າ ໃນການຈັດຕັ້ງປະຕິບັດມະຕິກອງກອງປະຊຸ່ມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງປ້ອງກັນປະເທດ ສາມາດປະຕິບັດບັນດາຄາດໝາຍສູ້ຊົນ ເຮັດໃຫ້ປະເທດຊາດມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ໂດຍສະເພາະການປ້ອງກັນບັນດາເປົ້າໝາຍສຳຄັນ, ວັນບຸນປະຫວັດສາດ ແລະ ກອງປະຊຸມຕ່າງໆລະດັບຊາດ ແລະ ສາກົນ ມີຄວາມສະຫງົບ ໄປ ຄຽງຄູ່ກັນນັ້ນ, ຄະນະພັກ-ຄະນະບັນຊາ ຍັງໄດ້ຖືເອົາວຽກງານປ້ອງກັນຊາດ-ປ້ອງກັນຄວາມສະຫງົບເປັນສໍາຄັນ, ຫັນເອົາກໍາລັງລົງກໍ່ສ້າງຮາກຖານການເມືອງ ພັດທະນາຊົນນະບົດຮອບ ດ້ານຕາມ 4 ເນື້ອໃນ 4 ຄາດໝາຍ, ສຸມໃສ່ສ້າງບ້ານປ້ອງກັນຊາດເຂັ້ມແຂງ, ກຸ່ມບ້ານປ້ອມໝັ້ນ ສູ້ຮົບເຂັ້ມແຂງໃຫ້ເພີ່ມຂຶ້ນທາງດ້ານຈໍານວນ ແລະ ຄຸນນະພາບ, ຍູ້ແຮງການອົບຮົມ-ຫັດແອບການເມືອງການ-ການທະຫານ, ພະລາທິການ, ເຕັກນິກ, ສິລະປະຍຸດ-ຍຸດທະວິທີຂອງທະຫານຮາບ ແລະ ເຫຼົ່າຮົບວິຊາສະເພາະໃຫ້ມີຄວາມຊໍານິຊໍານານ, ເປັນກໍາລັງຫຼັກແຫຼ່ງໃຫ້ກະຊວງປ້ອງກັນປະ ເທດທາງດ້ານວຽກງານຮັບປະກັນເຮັດໃຫ້ສະພາບໃນ 3 ແຂວງພາກກາງ ໃຫ້ມີຄວາມສະຫງົບ, ໄປຄວບຄູ່ກັບການຍົກສູງ ນໍ້າໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ຕາມເງື່ອນໄຂທ່າແຮງບົ່ມຊ້ອນຂອງກົມກອງ ນອກນັ້ນ, ຍັງເປັນເຈົ້າການປ້ອງກັນ, ກວດກາ, ຕິດຕາມເຂດຫຼັກໝາຍຊາຍແດນຕ່າງໆ ແລະ ສັງຄົມທົ່ວໄປ ຮັບປະກັນສ້າງເງື່ອນໄຂໃຫ້ແກ່ການພັດທະນາເສດຖະ ກິດ-ສັງຄົມແຫ່ງຊາດໄດ້ຂະຫຍາຍຕົວຢ່າງຕໍ່ເນື່ອງໄປພ້ອມກັນນັ້ນ ກອງພົນຍັງໄດ້ເອົາພະນັກງານລົງກໍ່ສ້າງຮາກຖານການເມືອງ 18 ກົມກອງ ແລະ ຮັບຜິດຊອບ113 ບ້ານ, ໃນນັ້ນມີ 1 ເມືອງຂອງແຂວງຄຳມວ່ນ ແລະ 7 ເມືອງຂອງແຂວງ ສະຫວັນນະເຂດ, ໃນນັ້ນໄດ້ໄດ້ຊີ້ນຳ-ນຳພາປະຊາຊົນສ້າງບ້ານວັດທະນາທຳ,ບ້ານອະນາໄມ ແລະ ຄອບຄົວອະນາໄມດີຢູ່ 113 ບ້ານ,ມີ 23.032 ຄອບຄົວ,ຄອບຄົວປານກາງ 7.173 ຄອບຄົວ,ຄອບຄົວພົ້ນທຸກ14.948 ຄອບຄົວ,ຄອບຄົວທີມີວິດຖ່າຍຖາວອນ ແລະ ນໍ້າສະອາດໃຊ້22.121 ຄອບຄົວ ແລະ ກົມກອງຍັງໄດ້ສ້າງພະລາທິການກັບທີ່ຕາມທິດນໍາເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໂດຍສຸມໃສ່ເພີ່ມພູນຜະລິດຜົນປູກຝັງ-ລ້ຽງສັດ ເພື່ອຮັບປະກັນການແກ້ໄຂຊີວິດການເປັນຢູ່ຂອງພະນັກງານ-ນັກຮົບ ນັບມື້ດີຂຶ້ນ, ໃນນັ້ນ 1 ປີຜ່ານມາກອງພົນໄດ້ປູກພຶດແລະ ຜັກຕ່າງໆໄດ້ 17 ເຮັກຕາ,ສາມາດເກັບກູ້ໄດ້193.555 ກິໂລ, ເຮັດນາ 177 ເຮັກຕາ,ເກັບກູ້ໄດ້184.000 ກິໂລ ,ມີງົວ-ຄວາຍ 706 ໂຕ,ໝູ ແລະ ແບ້ 348 ໂຕ,ສັດປີກ 6.533 ໂຕ ແລະ ມີປາລ້ຽງ42.300ໂຕ. ໄປຄຽງຄູ່ກັນນັ້ນ, ກໍໄດ້ເອົາໃຈໃສ່ຈັດຕັ້ງປະຕິບັດຂົງເຂດວຽກງານ ດ້ານຕ່າງໆທີ່ປິ່ນອ້ອມໜ້າທີ່ການເມືອງຂອງກົມກອງສາມາດຍາດ ໄດ້ຜົນສໍາເລັດທີ່ເປັນພື້ນຖານຫຼາຍດ້ານ.
ສະຫາຍ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີ ໄດ້ມີຄໍາເຫັນໂອ້ລົມ ແລະ ໄດ້ເນັ້ນໃຫ້ຄະນະພັກ-ຄະນະບັນຊາກອງພົນທີ 4, ພະນັກງານ-ນັກຮົບ ສືບຕໍ່ຮັກສາມູນເຊື້ອ,ທາດແທ້ປະຕິວັດຂອງກອງທັບ, ຕໍ່ສູ້ເດັດດ່ຽວ, ພິລະອາດຫານ, ບໍ່ຍອມຈໍານົນຍາກປານໃດກໍບຸກ, ທຸກປານໃດກໍສູ້, ເຖິງຈະເສຍສະຫຼະກໍບໍ່ຫວາດຫວັ່ນ, ຍາມໃດກໍສະໜອງຕາມຄວາມຮຽກຮ້ອງຕ້ອງການຂອງພັກ ດ້ວຍຄວາມຈົງຮັກພັກດີ, ບໍລິສຸດ ແລະ ເດັດດ່ຽວໜຽວແໜ້ນ, ກອງທັບເຮົາຍາມໃດກໍອີງໃສ່ປະຊາຊົນ, ເຮັດທຸກສິ່ງທຸກຢ່າງເພື່ອຜົນປະໂຫຍດຂອງປະຊາຊົນດ້ວຍຄວາມບໍລິສຸດໃຈ. ຍ້ອນແນວນັ້ນ ຈຶ່ງໄດ້ຮັບຄວາມເອົາໃຈໃສ່ເບິ່ງແຍງດູແລ, ຖະໜອນຫອມຮັກ ແລະ ອຸ້ມຊູຊ່ວຍເຫຼືອຈາກປະຊາຊົນບັນດາເຜົ່າ, ອັນໄດ້ເປັນບໍ່ເກີດຂອງກໍາລັງແຮງທີ່ບໍ່ເຫືອດແຫ້ງຈັກເທື່ອ ກອງທັບປະຊາຊົນລາວ ສົມແລ້ວທີ່ເປັນກອງທັບວິລະຊົນ ຂອງຊາດລາວ ຢ່າງແທ້ຈິງ. ໃນໂອກາດທີ່ ສະຫາຍ ພົນເອກ ວິໄລ ຫຼ້າຄຳຟອງ ພ້ອມດ້ວຍຄະນະ ໄດ້ລົງມາຢ້ຽມຢາມພະນັກງານ-ນັກຮົບ ຢູ່ກອງພັນນ້ອຍ 619,ກອງພັນນ້ອຍ634 ໂຮງງານນໍ້າ ມັງກອນຄຳ ຂອງກອງພົນ ພ້ອມທັງມອບວັດຖຸປັດໄຈຈຳນວນໜຶ່ງ ໃຫ້ກອງພົນທີ 4 ອີກດ້ວຍ.
ໂດຍ: ບົວລາ
May be an image of 1 person, tree and grass
May be an image of 10 people and aircraft
May be an image of 6 people
May be an image of 9 people and silo