ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສະຫາຍ ສີ ຈິ້ນຜິງ, ເລຂາທິການໃຫຍ່, ຄະນະກໍາມະການສູນກາງພັກກອມມູນິດຈີນ, ປະທານປະເທດ ສປ ຈີນ ເລີ່ມຕົ້ນການຢ້ຽມຢາມທາງລັດຖະກິດ ສປປ ລາວ

ໂດຍຕອ​ບ​ສະ​ໜອງຕາມການ​ເຊື້ອ​ເຊີນ​ຂອງ ສະຫາຍ ບຸນ​ຍັງ ວໍ​ລະ​ຈິດ, ເລ​ຂາ​ທິ​ການ​ໃຫຍ່ຄະ​ນະ​ບໍ​ລິ​ຫານ​ງານ​ສູນ​ກາງ​ພັກປະ​ຊາ​ຊົນ ປະ​ຕິ​ວັດ​ລາວ, ປະ​ທານ​ປະ​ເທດ ​ແຫ່ງ ສາ​ທາ​ລະ​ນະ​ລັດ ປະ​ຊາ​ທິປະ​ໄຕ ປະ​ຊາ​ຊົນ​ລາວ, ສະຫາຍ ສີ ຈິ້ນຜິງ, ​ເລ​ຂາ​ທິ​ການ​ໃຫຍ່ຄະ​ນະກໍາມະການ​ສູນ​ກາງ​ພັກກອມ​ມູ​ນິດ​ຈີນ , ປະທານປະເທດ ແຫ່ງ ສປ ຈີນ, ພ້ອມດ້ວຍ ​ຄະ​ນະ​ຜູ້​ແທນ​ຂັ້ນ​ສູງ​​ພັກ, ລັດ ແຫ່ງ ສາ​ທາ​ລະ​ນະ​ລັດ ປະຊາຊົນຈີນ ໄດ້ເດີນທາງມາເຖິງນະຄອນຫລວງວຽງຈັນ ເພື່ອດໍາເນີນການຢ້ຽມ​ຢາມທາງລັດຖະກິດ  ສປປ ​ລາວ  ໃນລະຫວ່າງວັນ​ທີ 13-14 ພະຈິກ 2017.

​​          ອອກ​ຮັບ ສະຫາຍ​ເລ​ຂາ​ທິ​ການ​ໃຫຍ່  ສີ ຈິ້ນຜິງ ແລະ ​ຄະ​ນະ, ໃນຕອນບ່າຍຂອງວັນທີ 13 ພະຈິກ ທີ່​ສະ  ​ໜາມ​ບິນ​ສາ​ກົນ​ວັດ​ໄຕ, ມີສະ​ຫາຍ ພັນຄໍາ ວິພາວັນ, ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ຜູ້ປະຈໍາການຄະນະເລຂາທິການສູງກາງພັກ, ຮອງປະທານປະເທດ ແຫ່ງ ສປປ ລາວ; ສະຫາຍ ສິນລະວົງ ຄຸດໄພທູນ, ກໍາມະການກົມການເມືອງສູນກາງພັກ,ເລຂາຄະນະພັກນະຄອນຫລວງ, ເຈົ້າຄອງນະຄອນຫລວງວຽງຈັນ; ສະຫາຍ ສອນໄຊ ສີພັນດອນ, ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ; ສະຫາຍ ນາງ ສູນທອນ ໄຊຍະຈັກ, ກໍາມະການສູນກາງພັກ, ຫົວຫນ້າຄະນະພົວພັນຕ່າງປະເທດສູນກາງພັກ, ພ້ອມ​ດ້ວຍບັນ​ດາ​ສະ​ຫາຍໃນຄະນະຕ້ອນຮັບຂອງຝ່າຍລາວ; ​ເອກອັກຄະລັດຖະທູດ ສປ ຈີນ ແລະ ພະ​ນັກ​ງານ​ສະ​ຖານ​ທູດ ສປ ຈີນ ປະຈໍາລາວ ແລະ ມີຊາວ​ໜຸ່ມ, ເຍົາວະຊົນ, ​ນັກ​ສຶ​ກ​ສາລາວ ແລະ ມວນ​ຊົນ​ຊາວ​ນະ​ຄອນຫຼວງວຽງ​ຈັນ ແລະ ຊາວຈີນ ​ຈຳ​ນວນຫຼວງຫຼາຍ, ໄດ້ຢືນໂບກ​ທຸງຊາດຂອງ​ສອງປະ​ເທດ ​ເພື່ອ​ຂ່ຳ​ນັບ​ຊົມ​ເຊີຍ​ການ​ເດີນ​ທາງ​ມາ​ເຖິງ​ນະ​ຄອນຫຼວງວຽງ​ຈັນ​ຂອງ​ຄະ​ນະ​ຢ່າງຄຶກ​ຄື້ນຕາມເສັ້ນທາງ ຈາກສະຫນາມບິນຫາໂຮງແຮມແລນມາກ.

 

ພິ​ທີ​ຕ້ອນ​ຮັບ ສະ​ຫາຍ ສີ ຈິ້ນຜິງ ພ້ອມດ້ວຍຄະນະຜູ້ແທນຂັ້ນສູງພັກ, ລັດ ສປ ຈີນ ​ຢ່າງ​ເປັນ​ທາງ​ການ ໄດ້​ຈັດ​ຂຶ້ນ​ຢ່າງ​ສົມ​ກຽດ ທີ່​​ທຳ​ນຽບ​ປະ​ທານ​ປະ​ເທດ ໃນຕອນບ່າຍຂອງວັນທີ 13 ພະຈິກ 2017, ໂດຍ​ສະຫາຍ​ເລຂາທິການໃຫຍ່ ບຸນ​ຍັງ ວໍລະ​ຈິດ, ຊຶ່ງມີບັນ​ດາ​ສະ​ຫາຍ​ການ​ນຳ​ຂັ້ນ​ສູງ​ ພັກ-ລັດ ຂອງ ສປປ ​ລາວ ​ເຂົ້າ​ຮ່ວມ​ຢ່າງ​ພ້ອມ​ພຽງ. ສະຫາຍ ​ບຸນ​ຍັງ​ ວໍລະ​ຈິດ ໄດ້​ນຳ​ພາສະ​ຫາຍ​ເລ​ຂາ​ທິ​ການ​ໃຫຍ່ ​ສີ ຈິ້ນຜິງ ໄປ​ຍັງ​ແທ່ນ​ກຽດ​ຕິ​ຍົດ ​ເພື່ອ​ເຄົາ​ລົບ​ທຸງ​ຊາດຈີນ, ລາວ ຕາມ​ລຳ​ດັບ; ຕໍ່ຈາກນັ້ນ, ສະ​ຫາຍ​ ບຸນ​ຍັງ ວໍ​ລະ​ຈິດ ແລະ ສະ​ຫາຍ  ສີ ຈິ້ນຜິງ ຍ່າງ​ກວດ​ແຖວທະ​ຫານ​ກອງ​ກຽດ​ຕິ​ຍົດກອງ​ທັບ​ປະ​ຊາ​ຊົນ​ລາວ ແລະ ຜູ້ນໍາທັງສອງສະຫາຍໄດ້ຮັບການແນະ​ນໍາຕໍ່ ຄະນະຕ້ອນ​ຮັບ​ທາງ​ການ​ຝ່າຍ ສປປ ​ລາວ ແລະ ຄະນະ​ຜູ້​ແທນຂັ້ນສູງຂອງ ສປ ຈີນ ໃນພິທີດັ່ງກ່າວ. ພາຍຫຼັງ​ສໍາ​ເລັດ​ພິທີ​ຕ້ອນຮັບ​ຢ່າງ​ເປັນ​ທາງ​ການ, ສະຫາຍ ບຸນ​ຍັງ​ ວໍລະ​ຈິດ ແລະ  ສະຫາຍ​​ ສີ ຈິ້ນຜິງ ໄດ້ນໍາພາຄະ​ນະ​​ຜູ້​ແທນ​ຂັ້ນ​ສູງ​ພົບປະສອງຝ່າຍ, ຊຶ່ງຈັດຂຶ້ນຢູ່ຫ້ອງປະຊຸມ ທີ່​ທຳ​ນຽບ​ປະທານ​ປະ​ເດ. ການຢ້ຽມຢາມທາງລັດຖະກິດ ສປປ ລາວ ຂອງສະຫາຍເລຂາທິການໃຫຍ່ ສີ ຈິ້ນຜິ້ງ ໃນຄັ້ງນີ້, ເປັນຂີດຫມາຍປະຫວັດສາດສໍາຄັນແຫ່ງການຮັດແຫນ້ນສາຍພົວພັນ ແລະ ເສີມຂະຫຍາຍການເປັນຄູ່ຮ່ວມຍຸດທະສາດຮອບດ້ານຫມັ້ນຄົງຍາວນານຕາມທິດ 4 ດີ ທີ່ມີມູນເຊື້ອແຫ່ງມິດຕະພາບ ແລະ ການຮ່ວມມືອັນຫນັກແຫນ້ນຍາວນານມາແລ້ວນັ້ນໃຫ້ສືບຕໍ່ຂະຫຍາຍຕົວຢ່າງບໍ່ຢຸດຢັ້ງ.

ໃນ​ການພົບປະ​ຄັ້ງນີ້, ສະຫາຍ ບຸນ​ຍັງ​ ວໍລະ​ຈິດ ໄດ້ກ່າວ​ສະ​ແດງ​ຄວາມຍິນ​ດີ​ຕ້ອນຮັບ ສະຫາຍ ສີ ຈິ້ນຜິງ ພ້ອມດ້ວຍຄະນະຜູ້ແທນຂັ້ນສູງ ພັກ-ລັດ ສປ ຈີນ ດ້ວຍໄມຕີຈິດມິດຕະພາບອັນອົບອຸ່ນ ແລະ ສະແດງຄວາມປິຕິຊົມຊື່ນເປັນຢ່າງຍິ່ງທີ່ໄດ້ພົບປະກັບ ສະຫາຍເລຂາທິການໃຫຍ່, ປະທານປະເທດ ສປ ຈີນ, ທີ່ໄດ້ນໍາພາຄະນະຜູ້ແທນ​ຂັ້ນ​ສູງ​ ພັກ-ລັດ ​ມາຢ້ຽມຢາມທາງ​ລັດຖະກິດ ສປປ ລາວ ພາຍຫລັງທີ່ພັກກອມມູນິດຈີນ ຫາກໍ່ສໍາເລັດກອງປະຊຸມໃຫຍ່ຄັ້ງທີ 19 ຂອງພັກຢ່າງສະຫງ່າງາມ ແລະ ໃນບັນຍາກາດທີ່ການພົວພັນມິດຕະພາບທີ່ເປັນມູນເຊື້ອອັນດີງາມ ແລະ ແບບຄູ່ຮ່ວມຍຸດທະສາດຮອບດ້ານ ລາວ-ຈີນ ພວມຢູ່ໃນໄລຍະທີ່ໄດ້ຮັບການເສີມຂະຫຍາຍຢ່າງຕັ້ງຫນ້າ; ພ້ອມດຽວກັນນີ້, ສະຫາຍ ບຸນຍັງ ວໍລະຈິດ ກໍໄດ້ສະແດງຄວາມຊົມເຊີຍ ແລະ ອວຍພອນໄຊຢ່າງຈິງໃຈຕໍ່ ສະຫາຍ ສີ ຈິ້ນຜິງ ທີ່ໄດ້ຮັບການເລືອກຕັ້ງເປັນເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນອີກສະໄຫມຫນຶ່ງ, ເຊິ່ງເປັນການສະແດງໃຫ້ເຫັນຄວາມໄວ້ວາງໃຈ, ຄວາມເຊື່ອຫມັ້ນຢ່າງສູງຂອງທົ່ວພັກ ທີ່ມີຕໍ່ສະຫາຍເຊິ່ງເປັນຜູ້ມີປະສົບການໃນການນໍາພາອັນໂດດເດັ່ນໃນໄລຍະ 5 ປີທີ່ຜ່ານມາ ໃນການສ້າງສາພັດທະນາຕາມທິດສັງຄົມນິຍົມຕາມສີສັນພິເສດຂອງຈີນ ແລະ ໄດ້ຮັບຜົນສໍາເລັດຢ່າງສູງ ແລະ ແບບກະໂດດຂັ້ນເປັນທີ່ປະຈັກຕາຕໍ່ສາກົນ. ສະ​ຫາຍ ບຸນ​ຍັງ​ ວໍ​ລະ​ຈິດ ໄດ້​ຕີ​ລາ​ຄາ​ສູງຕໍ່ການ​ມາ​ຢ້ຽມ​ຢາມ ສປປ ລາວ ​ຂອງ ສະ​ຫາຍ ເລ​ຂາ​ທິ​ການ​ໃຫຍ່ ສີ ຈິ້ນຜິງ, ເຊິ່ງ​ເປັນ​​ການສະແດງເຖິງຄວາມເອົາໃຈໃສ່ ແລະ ໃຫ້ຄວາມສໍາຄັນຂອງພັກກອມມູນິດຈີນ, ລັດຖະບານຈີນ ຕໍ່ສາຍພົວພັນມິດຕະພາບທີ່ເປັນມູນເຊື້ອ ແລະ ແບບຄູ່ຮ່ວມຍຸດທະສາດ ຮອບດ້ານຫມັ້ນຄົງ ຍາວນານ ລະຫວ່າງ 2 ພັກ, 2 ລັດ ແລະ ປະຊາຊົນ 2 ຊາດ, ເຊິ່ງເປັນການນໍາເອົາສາຍພົວພັນດັ່ງກ່າວ ກ້າວສູ່ລະດັບສູງອັນໃຫມ່ ແລະ ສະແດງຄວາມເຊື່ອຫມັ້ນວ່າ ການຢ້ຽມຢາມຄັ້ງນີ້ຈະເປັນໂອກາດດີທີ່ສຸດໃຫ້ແກ່ການນໍາຂັ້ນສູງຂອງ 2 ປະເທດ ລາວ-ຈີນ ເພື່ອຮ່ວມກັນຕີລາຄາ ກ່ຽວກັບການພົວພັນຮ່ວມມືສອງຝ່າຍໃນໄລຍະຜ່ານມາ ແລະ ປືກສາຫາລືກ່ຽວກັບທິດທາງການຮ່ວມມືໃນຕໍ່ຫນ້າ ໃນການເປັນຄູ່ຮ່ວມຊາຕາກໍາລະຫວ່າງສອງພັກ, ສອງລັດຢູ່ໃນສະພາບການໃຫມ່.

ສະຫາຍ ບຸນຍັງ ວໍລະຈິດ ໄດ້ຕີລາຄາສູງຜົນສໍາເລັດຂອງການດໍາເນີນກອງປະຊຸມໃຫຍ່ຄັ້ງທີ 19 ຂອງພັກ, ເຊິ່ງໃນນັ້ນໄດ້ມີການກໍານົດເອົາແນວຄິດ ສີ ຈິ້ນຜິງ ກ່ຽວກັບສັງຄົມນິຍົມທີ່ມີສີສັນພິເສດຂອງຈີນເປັນແນວຄິດຊີ້ນໍາຂອງພັກກອມມູນິດຈີນ ແລະ ອວຍພອນໃຫ້ປະຊາຊົນຈີນພາຍໃຕ້ການນໍາພາອັນສະຫລາດສ່ອງໃສຂອງພັກຈົ່ງບັນລຸຜົນສໍາເລັດໃຫມ່ໃຫຍ່ຫລວງກວ່າເກົ່າໃນການສ້າງສັງຄົມນິຍົມທີ່ຮັ່ງມີ, ເຂັ້ມແຂງ, ຈະເລີນຮຸ່ງເຮືອງ, ກົມກຽວປອງດອງ, ປະຊາທິປະໄຕ, ສີວິໄລ ແລະ ສວຍງາມ.

ສະຫາຍເລຂາທິການໃຫຍ່ ບຸນຍັງ ວໍລະຈິດ ໄດ້ຕາງຫນ້າໃຫ້ພັກ-ລັດ ແລະ ປະຊາຊົນລາວບັນດາເຜົ່າສະແດງຄວາມຮູ້ບຸນຄຸນ ແລະ ຂອບອົກຂອບໃຈຕໍ່ພັກ-ລັດ ແລະ ປະຊາຊົນຈີນ ທີ່ໄດ້ໃຫ້ການຊ່ວຍເຫລືອອັນລໍ້າຄ່າ, ໃຫ້ການສະຫນັບສະຫນູນອັນໃຫຍ່ຫລວງແກ່ປະຊາຊົນລາວໃນພາລະກິດຕໍ່ສູ້ ເພື່ອຍາດເອົາເອກະລາດແຫ່ງຊາດ ແລະ ໃນການປົກປັກຮັກສາ ແລະ ສ້າງສາ ສປປ ລາວໃນປະຈຸບັນ.

ໂອກາດດຽວກັນນີ້, ສະ​ຫາຍເລ​ຂາ​ທິ​ການ​ໃຫຍ່ ​ສີ ຈິ້ນຜິງ ໄດ້ກ່າວສະແດງຄວາມຂອບອົກຂອບໃຈຕໍ່ການຕ້ອນຮັບຄະນະຜູ້ແທນຂັ້ນສູງພັກ-ລັດ ສປ ຈີນ ຢ່າງອັນອົບອຸ່ນ ເຕັມໄປດ້ວຍໄມຕີຈິດມິດຕະພາບທີ່ສະຫນິດສະຫນົມຂອງສະຫາຍ ບຸນຍັງ ວໍລະຈິດ ແລະ ການນໍາຂັ້ນສູງຂອງລາວ ພ້ອມດ້ວຍມວນຊົນຊາວນະຄອນຫລວງວຽງຈັນຢ່າງຫລວງ ຫລາຍ ແລະ ໄດ້ກ່າວ​ສະ​ແດງ​ຄວາມ​ປິ​ຕິ​ຍິນ​ດີ​ເປັນ​ຢ່າງ​ຍິ່ງ ທີ່​ໄດ້​ນຳ​ພາ​ຄະ​ນະ​ຜູ້​ແທນ​ຂັ້ນ​ສູງ ​ພັກ-ລັດ ສປ ຈີນ ເດີນ​ທາງ​ມາ​ຢ້ຽມ​ຢາມທາງ​ລັດຖະກິດ ສ​ປ​ປ ລາວ ເປັນ​ຄັ້ງ​ທຳ​ອິດ​ ໃນຖານະ​ເປັນ​ເລ​ຂາ​ທິ​ການ​ໃຫຍ່​ອີກ​ຄັ້ງ​ໃໝ່​ໃນ​ກອງ​ປະ​ຊຸມ​ໃຫຍ່ຄັ້ງ​ທີ 19 ຂອງ​ພັກ​ກອມ​ມູ​ນິດ​ຈີນ, ​ເຊິ່ງ​ເປັນການສະແດງໃຫ້ເຫັນເຖິງການໃຫ້ຄວາມສໍາຄັນ ແລະ ເອົາໃຈໃສ່ຕໍ່ການຊຸກຍູ້ສົ່ງເສີມ​ສາຍ​ພົວ​ພັນ​ມິດ​ຕະ​ພາບ​ອັນ​ເປັນ​ມູນ​ເຊື້ອ ແລະ ແບບຄູ່ຮ່ວມຍຸດທະສາດ ຮອບດ້ານ ຫມັ້ນຄົງ ຍາວນານ ຕາມທິດ 4 ດີ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຈີນ ທີ່ນັບມື້ນັບໄດ້ຮັບການເສີມຂະຫຍາຍ, ແຕກດອກອອກຜົນຍິ່ງໆຂຶ້ນຕະຫລອດມາ. ພ້ອມດຽວກັນນັ້ນ, ສະ​ຫາຍ ສີ ຈິ້ນຜິງ ກໍໄດ້ຊົມເຊີຍປະຊາຊົນລາວອ້າຍນ້ອງ ພາຍ​ໃຕ້​ການ​ນຳ​ພາ​ຂອງ​ພັກ​ປະ​ຊາ​ຊົນ ປະ​ຕິ​ວັດ​ລາວ ໂດຍມີສະຫາຍ ບຸນຍັງ ວໍລະຈິດ ເປັນຜູ້ນໍາຫນ້າທີ່ຍາດໄດ້​ຜົນສໍາເລັດອັນໃຫຍ່ໃນການພັດທະນາເສດຖະກິດ-ສັງຄົມ ໃນໄລຍະຜ່ານມາ ແລະ ໄດ້ຢືນຢັນວ່າ ສປ ຈີນ ຈະຮ່ວມກັບ ສປປ ລາວ ສືບຕໍ່ເພີ່ມພູນຄູນສ້າງສາຍພົວພັນ ແລະ ຮ່ວມມືດັ່ງກ່າວ ໃຫ້ນັບມື້ເກີດດອກອອກຜົນຢ່າງບໍ່ຢຸດຢັ້ງ.

ສອງຝ່າຍໄດ້ຮ່ວມກັນທົບທວນຄືນ ແລະ ຕີລາຄາສູງກ່ຽວກັບການພົວພັນຮ່ວມມືສອງຝ່າຍໃນໄລຍະຜ່ານມາ, ເຊິ່ງໄດ້ຮັບການເສີມຂະຫຍາຍທັງທາງກວ້າງ ແລະ ລວງເລິກ. ປະເທດບ້ານໃກ້ເຮືອນຄຽງທີ່ດີ, ລາວ-ຈີນ ລ້ວນແຕ່ເປັນປະເທດສັງຄົມນິຍົມທີ່ມີພັກກອມມູນິດນໍາພາ, ມີອຸດົມການ, ລະບອບການເມືອງ, ເສັ້ນທາງແຫ່ງການພັດທະນາທີ່ຄ້າຍກັນ, ສອງຝ່າຍ ໄດ້ຢຶດຫມັ້ນທິດທາງການພົວພັນແບບຄູ່ຮ່ວມຍຸດທະສາດ ຮອບດ້ານ ຫມັ້ນຄົງ ຍາວນານ ຕາມທິດ 4 ດີ, ເປັນຄູ່ຮ່ວມຊາຕາກໍາສັງຄົມນິຍົມ ລາວ-ຈີນ ທີ່ບໍ່ສາມາດຕັດແຍກອອກຈາກກັນໄດ້. ການພົວພັນດ້ານການເມືອງໄດ້ມີການເສີມຂະຫຍາຍເປັນຢ່າງດີ ແລະ ໄດ້ເປັນພື້ນຖານອັນດີໃຫ້ແກ່ການເສີມຂະຫຍາຍສາຍພົວພັນສອງຝ່າຍໃນດ້ານຕ່າງໆ. ການພົວພັນຮ່ວມມືດ້ານທິດສະດີ, ບົດຮຽນການປົກຄອງລັດ-ບໍລິຫານປະເທດ, ການກໍ່ສ້າງພັກ, ການຮ່ວມມືດ້ານເສດຖະກິດ, ການຄ້າ-ການລົງທຶນ ແລະ ອື່ນໆ ນັບມື້ມີບາດກ້າວຂະຫຍາຍຕົວໄປສູ່ຄຸນນະພາບໃຫມ່, ພວມນໍາຜົນປະໂຫຍດຕົວຈິງໃຫ້ແກ່ປະຊາຊົນສອງຊາດລາວ-ຈີນ. ພ້ອມດຽວກັນນີ້, ທັງສອງຝ່າຍເຫັນດີສືບຕໍ່ຮັກສາກົນໄກ ການແລກປ່ຽນການຢ້ຽມຢາມ ລະຫວ່າງ ການນໍາຂັ້ນສູງ ລະຫວ່າງ 2 ພັກ ແລະ 2 ລັດຢ່າງເປັນປົກກະຕິ; ເອົາໃນໃສ່ເສີມຂະຫຍາຍກົນໄກການຮ່ວມມືຂອງສອງຝ່າຍທີ່ມີໃນປັດຈຸບັນ ໃຫ້ມີປະສິດທິຜົນກວ່າເກົ່າ; ສືບຕໍ່ສ້າງຄູ່ຮ່ວມຊາຕາກໍາທີ່ຕັດແຍກອອກຈາກກັນບໍ່ໄດ້; ສືບຕໍ່ຈັດຕັ້ງຜັນຂະຫຍາຍແຜນການຮ່ວມມື 2 ພັກ ໄລຍະສົກປີ 2016-2020 ໃນການກໍ່ສ້າງພະນັກງານນໍາພາຄູ້ມຄອງ ຂອງພັກ-ລັດລາວ ຢູ່ຈີນ; ສືບຕໍ່ເພີ່ມທະວີການຮ່ວມມື ເພື່ອເຊື່ອມໂຍງຍຸດທະສາດ “ການຫັນປະເທດບໍ່ມີຊາຍແດນຕິດກັບທະເລເປັນປະເທດທາງຜ່ານເຊື່ອມໂຍງເຊື່ອມຈອດ” ຂອງລາວ ເຂົ້າກັບຍຸດທະສາດ“; ຫນື່ງແລວ ຫນຶ່ງເສັ້ນທາງ” ຂອງຈີນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນ 2 ຊາດ.

ພາຍຫຼັງ​ການ​ພົບ​ປະ​ສອງ​ຝ່າຍ, ສະ​ຫາຍ​ເລ​ຂາ​ທິ​ການ​ໃຫ​ຍ່ ບຸນ​ຍັງ ວໍ​ລະ​ຈິດ ແລະ ສະ​ຫາຍເລ​ຂາ​ທິ​ການ​ໃຫຍ່ ສີ ຈິ້ນຜິງ ໄດ້​ເປັນ​ສັກ​ຂີ​ພິ​ຍານ​ໃນ​ການ​ລົງ​ນາມບັນ​ດາ​ເອ​ກະ​ສານການ​​ຮ່ວມ​ມື ຈຳ​ນວນ 17  ສະ​ບັບຄື: ສັນຍາການຮ່ວມມື ລະຫວ່າງ ກະຊວງການຕ່າງປະເທດ ສປປ ລາວ ແລະ ກະຊວງການຕ່າງປະເທດ ສປ ຈີນ ກ່ຽວກັບການເພີ່ມທະວີການຮ່ວມມືໃນສະພາບການໃຫມ່; ບົດບັນທຶກຄວາມເຂົ້າໃຈ ວ່າດ້ວຍການຮ່ວມກັນກໍ່ສ້າງແລວທາງເສດຖະກິດລາວ-ຈີນ; ບົດບັນທຶກຄວາມເຂົ້າໃຈ ວ່າດ້ວຍການເພີ່ມທະວີການພັດທະນາເສັ້ນທາງສາຍໄຫມດີຈີຕອນຂໍ້ມູນຂ່າວສານ ເພື່ອຊຸກຍູ້ການເຊື່ອມຈອດຂໍ້ມູນຂ່າວສານ; ສັນຍາ ວ່າດ້ວຍການຮ່ວມມືດ້ານວິິທະຍາສາດ ແລະ ເຕັກໂນໂລຊີ; ບົດບັນທຶກຄວາມເຂົ້າໃຈ ວ່າດ້ວຍການຈັດຕັ້ງປະຕິບັດຮ່ວມໂຄງການໂຕແບບ ໃນການສ້າງສູນຂໍ້ມູນຂ່າວສານຊັບພະຍາກອນນໍ້າແຫ່ງຊາດ ແລະ ການສ້າງແຜນແມ່ບົດການຄຸ້ມຄອງອ່າງຮັບນໍ້າອູ ແລະ ນໍ້າເທີນ-ນໍ້າກະດິງ; ບົດບັນທຶກຄວາມເຂົ້າໃຈວ່າດ້ວຍການຮ່ວມກັນຊຸກຍູ້ສ້າງເຂດຕົວແບບພັດທະນາກະສິກໍາຄົບວົງຈອນທີ່ທັນສະໄຫມ; ບົດບັນທຶກຄວາມເຂົ້າໃຈກ່ຽວກັບການເພີ່ມທະວີການຮ່ວມມືໃນຂົງເຂດພື້ນຖານໂຄ່ງລ່າງ; ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານການຊ່ວຍເຫລືອໃນ 3 ປີຕໍ່ຫນ້າ; ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານພັດທະນາຊັບພະຍາກອນມະນຸດ; ສານແລກປ່ຽນວ່າດ້ວຍຝ່າຍຈີນເຫັນດີກໍານົດເອົາໂຄງການປັບປຸງ ແລະ ຍົກລະດັບລະບົບ ICT ຂອງກະຊວງອຸດສາຫະກໍາ ແລະ ການຄ້າ ສປປ ລາວ; ສັນຍາຂອບ ສະຫນອງເງິນກູ້ພິເສດໃຫ້ແກ່ ສປປ ລາວ ເພື່ອຈັດຕັ້ງປະຕິບັດໂຄງການເຂື່ອນໄຟຟ້າຫ້ວຍປາຫລາຍ; ບົດບັນທຶກຄວາມເຂົ້າໃຈ ການສ້າງຄູ່ຮ່ວມມືຍຸດທະສາດ ດ້ານການຮ່ວມມືໄຟຟ້າ; ບົດບັນທຶກຄວາມເຂົ້າໃຈ ວ່າດ້ວຍການຮ່ວມມືທາງດ້ານການເງິນ ເພື່ອສົ່ງເສີມວິສາຫະກິດຂະຫນາດນ້ອຍ ແລະ ກາງໃນ ສປປ ລາວ; ສັນຍາເງິນກູ້ພິເສດດອກເບ້ຍຕໍ່າໂຄງການເຂື່ອນໄຟຟ້າຫ້ວຍປາຫລາຍ; ສັນຍາເງິນກູ້ທຸລະກິດໂຄງການສາຍສົ່ງ 115 (ກິໂລໂວນ) ຊຽງຮ່ອນ-ຫົງສາ; ສັນຍາຮ່ວມທຶນສ້າງໂຄງການກໍ່ສ້າງທາງດ່ວນນະຄອນຫລວງວຽງຈັນ ຫາບໍ່ເຕັນຕອນທີ I ນະຄອນຫລວງວຽງຈັນ ຫາ ວັງວຽງ; ສັນຍາເງິນກູ້ທຸລະກິດໂຄງການສາຍສົ່ງ 500/230 KV ອ້ອມນະຄອນຫລວງວຽງຈັນ.

ສປ ຈີນ ແຈ້ງໃຫ້ການຊ່ວຍເຫຼືອ ສປປ ລາວ 4 ຕື້ຢວນ ໃນໄລຍະ 3 ປີ ຕໍ່ໜ້າ ພ້ອມທັງໃຫ້ການຊ່ວຍເຫຼືອປັບປຸງຊີວິດການເປັນຢູ່ຂອງ ປະຊາຊົນລາວ ໃນ 8 ໂຄງການໃໝ່. ພ້ອມດຽວກັນນີ້, ສະຫາຍ ສີ ຈິ້ນຜິງ ໄດ້ເຊື້ອເຊີນ ສະຫາຍ ບຸນຍັງ ວໍລະຈິດ ຢ້ຽມຢາມ ສປ ຈີນ ໃນເວລາເໝາະສົມ ໃນປີໜ້າ.

ໃນ​ຕອນ​ຄໍ່າຂອງວັນດຽວກັນ, ສະ​ຫາຍເລ​ຂາ​ທິ​ການ​ໃຫຍ່ ບຸນ​ຍັງ​ ວໍ​ລະ​ຈິດ ໄດ້ເປັນເຈົ້າ​ພາບ​ຈັດ​ງານ​ລ້ຽງ​ຕ້ອນ​ຮັບເປັນ​ກຽດ​​ແດ່​ ສະ​ຫາຍເລ​ຂາ​ທິ​ການ​ໃຫຍ່ ສີ ຈິ້ນຜິງ ພ້ອມ​ດ້ວຍ​ຄະ​ນະ​ຜູ້​ແທນ​ຂັ້ນ​ສູງ​​ພັກ, ລັດ ຈີນ ທີ່​​ທ​ໍ​າ​ນຽບ​ປະ​ທານ​ປະ​ເທດ, ໂດຍມີບັນດາການນໍາຂັ້ນສູງພັກ-ລັດ ສປ ຈີນ ແລະ  ສປປ ລາວ ເຂົ້າຮ່ວມຢ່າງພ້ອມພຽງ.