ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສະຫາຍ ອໍາຄາ ລັດສະໝີ ໄດ້ຮັບເລືອກຕັ້ງໃຫ້ເປັນເລຂາຄະນະບໍລິຫານງານພັກ ເມືອງ ແກ່ນທ້າວ ສະໄໝທີ VII

ກອງປະຊຸມໃຫຍ່ຄັ້ງທີ VII ຂອງອົງຄະນະພັກ ເມືອງ ແກ່ນທ້າວ, ແຂວງ ໄຊຍະບູລີ ໄດ້ສໍາເລັດລົງຢ່າງເປັນທາງການ, ໃນຕອນບ່າຍວັນທີ 22 ມັງກອນ 2020, ທີ່ຫ້ອງປະຊຸມໃຫຍ່ຂອງເມືອງດັ່ງກ່າວ, ໂດຍການເປັນປະທານຂອງ ສະຫາຍ ອໍາຄາ ລັດສະໝີ, ວ່າການເລຂາພັກເມືອງ, ວ່າການເຈົ້າເມືອງ ແກ່ນທ້າວ, ເປັນກຽດເຂົ້າຮ່ວມມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງອ້ອມຂ້າງ ເຂົ້າຮ່ວມເກືອບ 200 ສະຫາຍ

ກອງປະຊຸມຄັ້ງນີ້ບັນດາຜູ້ແທນແມ່ນໄດ້ພ້ອມກັນ ທົບທວນຄືນຜົນງານ, ຈຸດອ່ອນຂໍ້ຄົງຄ້າງ ແລະ ສະຫຼຸບຖອດຖອນບົດຮຽນ, ຄົ້ນຄວ້າ ແລະ ເປັນເອກະພາບກັນຮັບຮອງເອົາບົດລາຍງານການເມືອງ, ແຜນ​ພັດທະນາ​ເສດຖະກິດ-ສັງຄົມ, ບົດ​ສໍາ​ຫຼວດການ​ນໍາພາ​ລວມ ແລະ ທິດທາງແຜນການ 5 ປີ 2020-2024, ໂດຍສູ້ຊົນ​ເຮັດໃຫ້ເສດຖະກິດມີການຂະຫຍາຍຕົວບໍ່ໃຫ້ຫຼຸດ 7,6% ຕໍ່ປີ, ລວມຍອດ​ລາຍຮັບໃຫ້​ບັນລຸ 1.534 ຕື້​ກີບ, ສະເລ່ຍຫົວຄົນໜຶ່ງ​ໃຫ້​​ໄດ້ 4.000 ໂດລາຕໍ່ຄົນຕໍ່ປີ, ສູ້ຊົນເກັບລາຍຮັບໃຫ້ໄດ້ 4,5% ຂຶ້ນໄປ, ຄຸ້ມຄອງລາຍຈ່າຍບໍ່ໃຫ້ເກີນ 4,5% ຂອງລາຍຮັບພາຍໃນ, ຜະລິດເຂົ້າໃຫ້ໄດ້ 32.969 ໂຕນ, ສະເລ່ຍ 720 ກິໂລກະລາມຕໍ່ຄົນຕໍ່ປີ, ຜະລິດພືດອຸດສາຫະກໍາເປັນສິນຄ້າ 512.547 ໂຕນ, ພືດສະບຽງອາຫານ ແລະ ໝາກໄມ້ 7.926 ໂຕນ, ສູ້ຊົນເຮັດໃຫ້ມູນຄ່າສົ່ງອອກສິນຄ້າເພີ່ມຂຶ້ນສະເລ່ຍ 15% ຕໍ່ປີ, ຄຸ້ມຄອງສິນຄ້ານໍາເຂົ້າໃນລະດັບ 10% ຕໍ່ປີ, ສ້າງຄອບຄົວພັດທະນາໃຫ້ກວມ 95%, ບ້ານພັດທະນາ 90% ຂຶ້ນໄປ, ສ້າງບ້ານສີຂຽວ, ສະອາດ ແລະ ສວຍງາມໃຫ້ໄດ້ 21,28%, ບ້ານກະສິກໍາແບບຢ່າງໃຫ້ໄດ້ 19,14%, ສົ່ງເສີມເດັກໃນເກນອາຍຸໃຫ້ໄດ້ເຂົ້າຮຽນ 95%, ຮັກສາອັດຕາການຊົມໃຊ້ນໍ້າສະອາດໃຫ້ຢູ່ໃນລະດັບ 100% ແລະ ອັດຕາການຊົມໃຊ້ວິດຖ່າຍໃຫ້ໄດ້ 100%, ກອງ​ປະຊຸມ​ໄດ້​ຟັງ​ການ​ປະກອບ​ຄໍາ​ເຫັນ​ຈາກ​ຜູ້ຕາງໜ້າ​ຫຼາຍ​ພາກສ່ວນ ແລະ ຄອບຄົວຕົວແບບແຕ່ລະດ້ານພາຍໃນເມືອງ, ​ເຊິ່ງສ່ວນ​ຫຼາຍ​ໄດ້​ລົງ​ເລິກ​ລາຍ​ງານ​ຜົນ​ສໍາ​ເລັດ​ແຫ່ງ​ການ​ຜັນ​ຂະຫຍາຍ ​ແລະ ຈັດ​ຕັ້ງ​ປະຕິບັດ​ມະຕິ​ກອງ​ປະຊຸມ​ໃຫຍ່ຄັ້ງຜ່ານມາ ​ເຂົ້າ​ໃນ​ແຕ່ລະ​ຂົງ​ເຂດ​ວຽກ​ງານ​ກົມ​ກອງ, ຂະ​ແໜງ​ການ​ຂອງ​ຕົນ​ເອງ, ​ອັນໄດ້​ເຮັດ​ໃຫ້​ກອງ​ປະຊຸມ​ມີ​ເນື້ອ​ໃນ​ສົມບູນຄົບຖ້ວນ​ ແລະ ​ໄດ້ດໍາເນີນການປ່ອນບ​ບັດ​ຄັດ​ເລືອກ​ເອົາ​ຄະນະ​ບໍລິຫານ​ງານ​ພັກ​ເມືອງ​ຊຸດ​ທີ VII ເຊິ່ງມີຜູ້ຮັບສະໝັກທັງໝົດ 31 ສະຫາຍ, ຍິງ 5 ສະຫາຍ, ໃນນີ້ເລືອກເອົາ 27 ສະຫາຍ, ອາຍຸສູງສຸດ 55 ປີ, ຕໍ່າສຸດ 37 ປີ, ອາຍຸສະເລ່ຍ 43 ປີ, ກອງປະຊຸມຄັ້ງປະຖົມມະລຶກ ເລືອກເອົາ ສະຫາຍ ອໍາຄາ ລັດສະໝີ  ເປັນເລຂາຄະນະບໍລິຫານງານພັກເມືອງ, ສະຫາຍ ປະ​ເສີດ  ອິນ​ວົງ​ຄຳ ເປັນຮອງເລຂາ, ສະຫາຍ ບຸນ​ສົງ ລາດ​ຊະ​ວົງ  ເປັນຮອງເລຂາ ທັງເປັນປະທານຄະນະກວດກາພັກເມືອງ, ເລືອກເອົາສະຫາຍ  ວຽງ​ໄຊ ຈັນທະ​ມາລີ ແລະ ສະ​ຫາຍ  ນາງ ​ເອື້ອງ​ຄຳ ພາ​ນະ​ວົງ ເປັນຮອງປະທານ.