ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນໂອກາດການເຂົ້າຮ່ວມກອງປະຊຸມເວທີສົນທະນາ ລະດັບສູງ ໜຶ່ງແລວໜຶ່ງເສັ້ນທາງ ຄັ້ງທີ 3 ທີ່ ນະຄອນຫຼວງປັກກິງ, ສປ ຈີນ, ໃນຕອນເຊົ້າຂອງວັນທີ 19 ຕຸລາ 2023, ສະຫາຍ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ໄດ້ພົບປະກັບ ທ່ານ ຫວໍ ວັນເທືອງ, ປະທານປະເທດ ແຫ່ງ ສສ ຫວຽດນາມ, ໄດ້ສະແດງຄວາມດີໃຈທີ່ໄດ້ພົບກັນອີກຄັ້ງໜຶ່ງໃນເທື່ອນີ້ ພາຍຫຼັງທີ່ໄດ້ພົບກັນໃນ ຕົ້ນເດືອນ ກັນຍາ 2023 ຜ່ານມາ ໃນໂອກາດເຂົ້າຮ່ວກອງປະຊຸມຜູ້ນຳ 3 ພັກ ຢູ່ ຮ່າໂນ້ຍ. ພ້ອມກັນນີ້ກໍ່ໄດ້ຝາກຄວາມຢື້ຢາມຖາມຂ່າວອັນອົບອຸ່ນ ເຖິງສະຫາຍ ເລຂາທິການໃຫຍ່ ຫງວຽນ ຝູ ຈ້ອງ, ສະຫາຍ ນາຍົກລັດຖະມົນຕີ, ສະຫາຍ ປະທານສະພາແຫ່ງຊາດ ແລະ ບັນດາສະຫາຍການນຳພັກ-ລັດ ຫວຽດນາມ.
ສອງຝ່າຍໄດ້ແຈ້ງສະພາບຂອງແຕ່ລະປະເທດໃຫ້ກັນຊາບສະພາບການພາຍໃນຂອງແຕ່ລະປະເທດ, ໄດ້ຕີລາຄາສູງຕໍ່ການພົວພັນຮ່ວມມື ລາວ-ຫວຽດນາມ ໃນປີຜ່ານມາ ເຊິ່ງໄດ້ມີຄວາມຄືບຫນ້າຫຼາຍດ້ານ ແລະ ນັບມື້ນັບເຂົ້າສູ່ລວງເລິກ. ການພົວພັນດ້ານການເມືອງສືບຕໍ່ມີຄວານໃກ້ຊິດ ແລະ ອົບອຸ່ນທີ່ສຸດ, ສະເພາະໃນປີນີ້ການນໍາຂັ້ນສູງຂອງສອງປະເທດກໍ່ໄດ້ພົບປະກັນຫຼາຍຄັ້ງ, ການນຳບັນດາຂະແໜງການຂັ້ນສູນກາງ ແລະ ທ້ອງຖິ່ນ ກໍ່ໄດ້ພົບປະແລກປ່ຽນບົດຮຽນກັນເປັນປະຈຳ; ການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບມີຄວາມສະໜິດແໜ້ນ ແລະ ນັບມື້ນັບມີປະສິດທິຜົນ; ການຮ່ວມມືດ້ານການຄ້າ ແລະ ການລົງທຶນ ສືບຕໍ່ມີການຂະຫຍາຍຕົວ; ດ້ານການຕ່າງປະເທດ, ສອງຝ່າຍໄດ້ສະໜັບສະໜູນເຊິ່ງກັນຢ່າງເປັນປົກກະຕິຢູ່ເວທີສາກົນຕ່າງໆ. ຕໍ່ໜ້າສະພາບການຂອງພາກພື້ນ ແລະ ສາກົນກຳລັງຜັນແປໄປຢ່າງໄວວາ, ສັບສົນ ແລະ ຫຼໍ່ແຫຼມ, ສອງປະເທດຍິ່ງຕ້ອງໄດ້ຈັບມືກັນແໜ້ນ, ພ້ອມກັນປົກປັກຮັກສາພາບແວດລ້ອມ ແຫ່ງສັນຕິພາບ, ສະຖຽນລະພາບ ເພື່ອເອື້ອອຳນວຍໃຫ້ແກ່ການພັດທະນາ, ນຳເອົາຜົນປະໂຫຍດຕົວຈິງມາສູ່ປະຊາຊົນ ລາວ-ຫວຽດນາມ.
ສະຫາຍ ປະທານປະເທດ ຫວໍ ວັນ ເຖືອງ ໄດ້ ສະແດງຄວາມຊົມເຊີຍ ສປປ ລາວ ທີ່ໄດ້ຮັບຫນ້າທີ່ເປັນປະທານອາຊຽນ ແລະ ໄອປາ ໃນປີ 2024 ທັງເປັນເຈົ້າພາບກອງປະຊຸມ ປະທານສະພາແຫ່ງຊາດ ລາວ-ຫວຽດນາມ-ກຳປູເຈຍ ໃນທ້າຍປີ 2023 ນີ້. ຫວຽດນາມ ມີຄວາມຍິນດີ ຈະຮ່ວມມື, ແບ່ງປັນບົດຮຽນ ແລະ ໃຫ້ການສະຫນັບສະໜູນ ສປປ ລາວ ໃນການປະຕິບັດບົດບາດດັ່ງກ່າວໃຫ້ສຳເລັດດ້ວຍດີ.
ສອງຝ່າຍຍິນດີສືບຕໍ່ຮັກສາການໄປມາຫາສູ່ກັນຂອງການນຳຂັ້ນສູງສອງຝ່າຍ ໃນແຕ່ລະຂັ້ນ, ສອງຝ່າຍໄດ້ເປັນເອກະພາບຊຸກຍູ້ບັນດາຂະແໜງການ ແລະ ທ້ອງຖິ່ນໃນການຈັດຕັ້ງຜັນຂະຫຍາຍບັນດາການຕົກລົງຂອງການນຳ, ບັນດາເອກະສານຮ່ວມມືທີ່ສອງຝ່າຍໄດ້ລົງນາມ ກໍ່ຄືບັນດາໂຄງການຮ່ວມມືທີ່ສຳຄັນ ໃຫ້ມີຜົນສຳເລັດເປັນຮູບປະທຳ. ພ້ອມກັນນັ້ນ ກໍ່ຮ່ວມກັນປຶກສາຫາລືຢ່າງຈິງໃຈ ເພື່ອແກ້ໄຂບັນຫາຄົງຄ້າງຕ່າງໆ, ກວດກາຄືນບັນດາກົນໄກການຮ່ວມມືສອງຝ່າຍ ເພື່ອປັບປຸງໃຫ້ສອດຄ່ອງ ແລະ ມີປະສິດທິຜົນຍິ່ງຂຶ້ນ.
ຜູ້ນຳທັງສອງໄດ້ຂອບໃຈເຊິ່ງກັນຕໍ່ການຮ່ວມມື ແລະ ການຊ່ວຍເຫຼືອເຊິ່ງກັນ ແລະ ກັນ ໃນຕະຫຼອດໄລຍະຜ່ານມາ, ເສີມຂະຫຍາຍມູນເຊື້ອອັນດີງາມຂອງສາຍພົວພັນຮ່ວມສຳພັນສູ້ຮົບຕ້ານສັດຕູຕົວດຽວກັນເພື່ອປົດປ່ອຍປະເທດຊາດໃນເມື່ອກ່ອນ, ສືບຕໍ່ຄຽງບ່າຄຽງໄຫຼ່ກັນ, ຈັບມືກັນແໜ້ນພ້ອມກັນພັດທະນາ ແລະ ໄດ້ຢືນຢັນນະໂຍບາຍອັນສະເໝີຕົ້ນສະເໜີປາຍຂອງສອງປະເທດໃນການສືບຕໍ່ປົກປັກຮັກສາ ແລະ ເພີ່ມພູນຄູນສ້າງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ນັບມື້ນັບຈະເລີນງອກງາມ ແລະ ໝັ້ນຄົງຂະໜົງແກ່ນຕະຫຼອດໄປ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ