ປະຕິຕາມສັນຍາການຮ່ວມມືລະຫວ່າງ ຄະນະໂຄສະນາອົບຮົມສູນກາງພັກ ປະຊາຊົນ ປະຕິວັດລາວ (ຄອສພ) ກັບຄະນະໂຄສະນາສຶກສາສູນກາງພັກກອມມູນິດ ຫວຽດນາມ ໃນໄລຍະປີ 2022-2026 ແລະ ການເຊື້ອເຊີນຂອງ ສະຫາຍ ວັນໄຊ ຕະວິນຍານ ຮອງຫົວໜ້າ ຄອສພ ຫົວໜ້າບັນນາທິການໃຫຍ່ ໜັງສືພິມ ປະຊາຊົນ, ສະຫາຍ ເລ ກວັກ ມິງ ກໍາມະການສູນກາງພັກ ຫົວໜ້າບັນນາທິການໃຫຍ່ ໜັງສືພິມ ເຢີນເຢີນ, ຮອງຫົວໜ້າຄະນະໂຄສະນາສຶກສາ ພ້ອມຄະນະ ໄດ້ເດີນທາງເຖິງສະໜາມບິນສາກົນວັດໄຕ ນະຄອນຫຼວງວຽງຈັນ ໃນຕອນເຊົ້າວັນທີ 6 ມິຖຸນານີ້ ເພື່ອມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 6-10 ມິຖຸນາ 2024.
ການມາເຖິງຄັ້ງນີ້, ສະຫາຍ ວັນໄຊ ຕະວິນຍານ ພ້ອມຄະນະ ໄດ້ຕ້ອນຮັບຢ່າງອົບອຸ່ນ ແລະ ຕີລາຄາສູງຕໍ່ ສະຫາຍ ເລ ກວັກ ມິງ ພ້ອມຄະນະ ທີ່ເດີນທາງມາຄັ້ງນີ້ ຊຶ່ງສອງຝ່າຍ ກໍຄືໜັງສືພິມ ປະຊາຊົນ ສຽງຂອງສູນກາງພັກປະຊາຊົນ ປະຕິວັດລາວ ແລະ ໜັງສືພິມ ເຍິນເຢີນ ສຽງຂອງສູນກາງພັກ-ລັດ ແລະ ປະຊາຊົນ ຫວຽດນາມ ຈະໄດ້ມີການພົບປະ ເພື່ອທົບທວນການຮ່ວມມືໃນໄລຍະຜ່ານມາ ແລະ ປຶກສາຫາລື, ແລກປ່ຽນບົດຮຽນຊຶ່ງກັນ ແລະ ກັນ, ລວມເຖິງແລກປ່ຽນຂໍ້ມູນຂ່າວສານຂອງແຕ່ລະປະເທດ ເພື່ອໝູນໃຊ້ເຂົ້າໃນການປະຕິບັດໜ້າທີ່ວຽກງານໃຫ້ສອດຄ່ອງກັບສະພາບຄວາມເປັນຈິງ ຂອງແຕ່ລະປະເທດ. ພ້ອມນີ້, ຈະຍັງປຶກສາຫາລືບາງວຽກງານ ແລະ ບາງກິດຈະກໍາ ເພື່ອຮັດແໜ້ນ ແລະ ເສີມຂະຫຍາຍຄວາມສາມັກຄີ ລະຫວ່າງສອງໜັງສືພິມ.
ພິເສດ, ແມ່ນຈະໄດ້ມີພິທີ ມອບ-ຮັບ ແລະ ເປີດການນໍາໃຊ້ເວັບໄຊ ຂອງໜັງສືພິມປະຊາຊົນ ທີ່ໄດ້ຮັບການຊ່ວຍເຫຼືອຈາກໜັງສືພິມເຍິນເຢີນ ໃນການປັບປຸງໃຫ້ໜັງສືພິມປະຊາຊົນ ມີເວັບໄຊທີ່ມີຄວາມໝັ້ນຄົງ, ປອດໄພ, ກ້າວທັນຍຸກສະໄໝ ແຫ່ງການປະຕິວັດອຸດສາຫະກຳ 4.0, ຫັນເປັນທັນສະໄໝ, ຫັນເປັນດີຈີຕອນ ໃຫ້ເປັນລະບົບຈະແຈ້ງ ແລະ ໜັກແໜ້ນ ຕາມທິດທາງການນໍາພາຂອງພັກປະຊາຊົນ ປະຕິວັດລາວ ປະກອບສ່ວນໃນການສ້າງການຫັນປ່ຽນຢ່າງແຂງແຮງ, ເລິກເຊິ່ງ ໃນການເຄື່ອນໄຫວວຽກງານໂຄສະນາອົບຮົມ ໄປສູ່ຄຸນນະພາບໃໝ່.
ນອກຈາກນີ້, ສະຫາຍ ເລ ກວັກ ມິງ ພ້ອມຄະນະ ຍັງຈະໄດ້ເຂົ້າຢ້ຽມຂໍ່ານັບ, ພົບປະກັບບັນດາສະຫາຍ ການນໍາຂອງ ສປປ ລາວ ແລະ ຢ້ຽມຊົມສະຖານທີ່ຕ່າງໆ ທີ່ມີຊື່ສຽງຂອງ ສປປ ລາວ ອີກດ້ວຍ.
(ຂ່າວ-ພາບ: ສຸກສະຫວັນ)
