ຄະນະກໍາມະການຄຸ້ມຄອງອິນເຕີເນັດແຫ່ງຊາດ ໄດ້ສະຫຼຸບການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2024 ໃນວັນທີ 25 ມິຖຸນາ 2024 ເປັນປະທານໂດຍ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງ ປກສ ທັງເປັນປະທານຄະນະກໍາມະການຄຸ້ມຄອງອິນເຕີເນັດ ແຫ່ງຊາດ, ທ່ານ ບໍ່ວຽງຄໍາ ວົງດາລາ ລັດຖະມົນຕີກະຊວງເຕັກໂນໂລຊີ ແລະ ການສື່ສານ ຮອງປະທານ -ຜູ້ປະຈຳການຄະນະກຳມະການຄຸ້ມຄອງອິນເຕີເນັດ ແຫ່ງຊາດ, ມີຮອງລັດຖະມົນຕີ, ຮອງເຈົ້າແຂວງ-ນະຄອນຫຼວງ ແລະ ຄະນະກຳມະການຄຸ້ມຄອງອິນເຕີເນັດແຫ່ງຊາດເຂົ້າຮ່ວມຜ່ານລະບົບກອງປະຊຸມທາງໄກຈາກທົ່ວປະເທດ.
ທ່ານ ມີນາໄຊ ພິລາວົງ ຫົວໜ້າສູນອິນເຕີເນັດແຫ່ງຊາດ ຫົວໜ້າຫ້ອງການກອງເລຂາຄະນະກໍາມະການຄຸ້ມຄອງອິນເຕີເນັດ ແຫ່ງຊາດ ກ່າວວ່າ: ໃນ 6 ເດືອນຕົ້ນປີ ວຽກງານການຄຸ້ມຄອງ ແລະ ພັດທະນາໂຄງລ່າງພື້ນຖານ ໂທລະຄົມມະນາຄົມ ແລະ ອິນເຕີເນັດ ການລວມສູນສັນຍານໂທລະສັບ ແມ່ນສຳເລັດການລວມສູນໂທລະສັບພາຍໃນປະເທດຂ້າມເຄືອຂ່າຍ, ຂໍ້ຄວາມສັ້ນພາຍໃນປະເທດຂ້າມເຄືອຂ່າຍ ແລະ ໂທລະສັບຕ່າງປະເທດຂາເຂົ້າຜ່ານສູນອິນເຕີເນັດແຫ່ງຊາດ, ສືບຕໍ່ຈັດຕັ້ງປະຕິບັດການລວມສູນໂທລະສັບຕ່າງປະເທດ ຂາອອກ ແລະ ຂໍ້ຄວາມສັ້ນຕ່າງປະເທດຜ່ານສູນອິນເຕີເນັດແຫ່ງຊາດ ການລວມສູນສັນຍານອິນເຕີເນັດ ແມ່ນສຳເລັດການລວມສູນອິນເຕີເນັດ ແບບ IP Transit ຜ່ານສູນອິນເຕີເນັດ ແຫ່ງຊາດ ທີ່ນະຄອນຫຼວງວຽງຈັນ.
ທ່ານ ມີນາໄຊ ພິລາວົງ ໃຫ້ຮູ້ອີກວ່າ: ສໍາລັບອິນເຕີເນັດ ແບບ IPLC ໂດຍສະບົບສາຍສົ່ງ, ບໍລິສັດ ISP ປະເພດ 1 ໃໝ່ ຄື SLT ແລະ ມັງກອນ, ການເຊື່ອມຕໍ່ອິນເຕີເນັດເຂົ້າອອກ ຢູ່ຕ່າງແຂວງ ແມ່ນຍັງບໍ່ທັນສໍາເລັດ. ສະນັ້ນ ຈຶ່ງຕ້ອງມີສູນອິນເຕີເນັດ ແຫ່ງຊາດ ຢູ່ພາກເໜືອ ແລະ ພາກໃຕ້ ເພື່ອລວມສູນທຸກການສື່ສານ ເຂົ້າ-ອອກ ປະເທດໃຫ້ສົມບູນ ແລະ ເລັ່ງສ້າງຈຸດເຊື່ອມຕໍ່ຢູ່ຕາມຊາຍແດນຈຶ່ງສາມາດຄຸ້ມຄອງ ແລະ ແກ້ໄຂບັນຫາຕ່າງໆໄດ້.
ສໍາລັບວຽກການເຊື່ອມຕໍ່ພິເສດ ປກຊ-ປກສ ກະຊວງປ້ອງກັນປະເທດ, ສູນຄຸ້ມຄອງຂໍ້ມູນຂ່າວສານກອງທັບ (206) ໄດ້ຈັດຕັ້ງເຄື່ອນໄຫວຕິດຕາມເປັນປົກກະຕິ ການນໍາໃຊ້ອິນເຕີເນັດຜ່ານສື່ຕ່າງໆ ພາຍໃນກອງທັບໃນການເຂົ້າເຖິງແຫຼ່ງຂໍ້ມູນຂ່າວສານຕ່າງໆ; ກະຊວງປ້ອງກັນຄວາມຫງົບ ໄດ້ສຳເລັດການເຊື່ອມຕໍ່ພິເສດກັບ ສູນອິນເຕີເນັດແຫ່ງຊາດ ແລະ ບັນດາບໍລິສັດຜູ້ໃຫ້ບໍລິການດ້ານໂທລະຄົມມະນາຄົມ ແລະ ອິນເຕີເນັດ ປະເພດ 1 ແລະ ເລີ່ມຈັດຕັ້ງປະຕິບັດວຽກງານປ້ອງກັນຄວາມສະຫງົບ ໃນຂົງເຂດໂທລະຄົມມະນາຄົມ ແລະ ອິນເຕີເນັດ.
ສ່ວນການຂຶ້ນທະບຽນເລກໝາຍໂທລະສັບ (ຊິມຄາດ) ສະຖິຕິປະຈຳເດືອນພຶດສະພາ 2024 ເຫັນວ່າມີຜູ້ລົງທະບຽນນໍາໃຊ້ໂທລະສັບມືຖື 6,113,455 ເລກໝາຍ, ລົງທະບຽນນໍາໃຊ້ອິນເຕີເນັດ, ລະບົບມີສາຍ ແລະ ຜ່ານລະບົບມືຖືທັງໝົດ 4,614,752 ຄັ້ງ.
ສ່ວນທິດທາງແຜນການ 6 ເດືອນທ້າຍປີ 2024 ຈະສືບຕໍ່ຊຸກຍູ້ສົ່ງເສີມວຽກງານຄຸ້ມຄອງ, ຕິດຕາມກວດກາ, ເຝົ້າລະວັງ ແລະ ຕອບຕ້ານຫາງສຽງບໍ່ດີ, ຂໍ້ມູນຂ່າວສານບໍ່ຖືກຕ້ອງ ແລະ ຂ່າວປອມເທິງອິນເຕີເນັດ ເປັນຕົ້ນ ເພີ່ມທະວີຄົ້ນຄວ້າຮູບແບບການຕິດຕາມກວດກາ, ເພີ່ມທະວີຂອດການປະສານງານ ລະຫວ່າງພາກສ່ວນທີ່ກ່ຽວຂ້ອງ ໃນການຕອບໂຕ້-ຕອບຕ້ານຫາງສຽງບໍ່ດີໃນສັງຄົມ ແລະ ຂ່າວບິດເບືອນໃສ່ຮ້າຍປ້າຍສີ ສປປ ລາວ ໃຫ້ມີຄວາມກົມກຽວ, ວ່ອງໄວ ແລະ ທັນກັບສະພາບການ, ສ້າງກົນໄກທີ່ວ່ອງໄວ ແລະ ສາມາດເປັນເອກະພາບກັນໃນທຸກກະຊວງ, ແຂວງ ແລະ ຂະແໜງການ, ໂດຍປະສານສົມທົບກັບ ປກຊ-ປກສ.
