ວັນທີ 12 ກໍລະກົດ 2024, ສະຖານເອກອັກຄະລັດຖະທູດລາວ ປະຈຳ ສສ ຫວຽດນາມ ໄດ້ຈັດກອງປະຊຸມ ສະຫຼຸບວຽກງານການຄຸ້ມຄອງການສຶກສາລາວ ສົກປີ 2023-2024 ແລະ ວາງທິດທາງແຜນການ ສົກປີ 2024-2025 ຂຶ້ນທີ່ໂຮງຮຽນມະຫາວິທະຍາໄລ ກິວ ລອງ, ແຂວງ ຫວິງ ລອງ, ສສ ຫວຽດນາມ.
ເຂົ້າຮ່ວມໃນກອງປະຊຸມດັ່ງກ່າວ, ຝ່າຍລາວມີ: ທ່ານ ປອ. ສຳລານ ພັນຄະວົງ, ຮອງລັດຖະມົນຕີກະຊວງສຶກສາທິການ ແລະ ກິລາ; ທ່ານ ປອ. ຄຳຕັນ ສົມວົງ, ທີ່ປຶກສາສຶກສາ-ວັດທະນະທຳ ສະຖານທູດລາວປະຈຳ ສສ ຫວຽດນາມ ພ້ອມດ້ວຍບັນ ດາທ່ານຫົວໜ້າກົງສູນໃຫຍ່ລາວປະຈຳນະຄອນ ໂຮ່ຈີມິນ, ນະຄອນດາໜັງ; ຜູ້ຕາງໜ້າຈາກບັນດາຂອງກະຊວງສຶກສາທິການ ແລະ ກິລາ ແລະ ຕາງໜ້າພະແນກສຶກສາ ແລະ ກິລາແຂວງຂອງລາວ ພ້ອມດ້ວຍບັນດາຜູ້ຕາງໜ້ານັກສຶກສາລາວທີ່ກຳລັງຮ່ຳຮຽນຄົ້ນຄວ້າຢູ່ ສສ ຫວຽດນາມເຂົ້າຮ່ວມຈຳນວນ 100 ກວ່າຄົນ. ຝ່າຍຫວຽດນາມມີ: ທ່ານ ຮສຈ.ປອ ຫງວຽນ ວັນຟຸກ, ຮອງລັດຖະມົນຕີກະຊວງສຶກສາ ແລະ ກໍ່ສ້າງພະນັກງານຫວຽດນາມ; ປອ. ຫງວຽນ ທິກວຽນແທັກ, ຮອງປະທານສະພາປະຊາຊົນແຂວງ ຫວິງ ລອງ; ຜູ້ອຳນວຍການໂຮງຮຽນມະຫາວິທະຍາໄລ ກິວ ລອງ; ຜູ້ຕາງໜ້າສະຖານທູດຫວຽດນາມປະຈຳ ສປປ ລາວ ເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ແມ່ນເພື່ອສະຫຼຸບ, ຕີລາຄາຄືນສະພາບການຄຸ້ມຄອງ, ການເຄື່ອນໄຫວ ແລະ ການຮໍ່າຮຽນຂອງນັກສຶກສາລາວ ທີ່ກຳລັງສຶກສາຮ່ຳຮຽນຢູ່ຕາມສະຖານການສຶກສາຕ່າງໆ ໃນທົ່ວປະເທດຂອງ ຫວຽດນາມ ໃນສົກປີ 2023-2024 ທີ່ຜ່ານມາ ແລະ ກຳນົດທິດທາງແຜນການເຄື່ອນໄຫວໃນສົກປີ 2024-2025, ຊຶ່ງເປັນສົກຮຽນທີ່ມີຄວາມໝາຍສຳຄັນເພື່ອສືບຕໍ່ຈັດຕັ້ງຜັນຂະຫຍາຍໂຄງການຍົກສູງຄຸນນະພາບ ແລະ ປະສິດທິຜົນ ໃນການຮ່ວມມື ລາວ-ຫວຽດນາມ, ຫວຽດນາມ-ລາວ ໃນຂົງເຂດການສຶກສາ ແລະ ພັດທະນາຊັບພະຍາກອນມະນຸດ ໃນແຕ່ໄລຍະຂອງກະຊວງສຶກສາທິການ ແລະ ກິລາ ຂອງລາວ ແລະ ກະຊວງສຶກສາ ແລະ ກໍ່ສ້າງພະນັກງານ ຂອງ ຫວຽດນາມ.
ໃນສົກປີ 2023-2024 ມີນັກຮຽນ, ນັກສຶກສາລາວທີ່ກຳລັງສຶກສາຮ່ຳຮຽນຢູ່ ສສ ຫວຽດນາມ ມີທັງໝົດ: 10,190 ຄົນ (ຍິງ 4,277 ຄົນ) ໃນນັ້ນສາຍປົກຄອງມີ 8,478 ຄົນ (ຍິງ 3,911 ຄົນ), ສາຍປ້ອງກັນຄວາມສະຫງົບ 827 ຄົນ (ຍິງ 335 ຄົນ) ແລະ ປ້ອງກັນຊາດ 885 ຄົນ (ຍິງ 31 ຄົນ). ທຶນລັດຖະບານມີ 3,417 ຄົນ (ຍິງ 1,431 ຄົນ), ທຶນຮ່ວມມືລະຫວ່າງແຂວງ 4,244 ຄົນ (ຍິງ 2,221 ຄົນ), ທຶນສ່ວນຕົວ 1,058 ຄົນ (ຍິງ 561 ຄົນ) ແລະ ຜູ້ໃຫ້ທຶນອື່ນໆ 141 ຄົນ (ຍິງ 64 ຄົນ). ສຳເລັດການສຶກສາ ແລະ ກັບຄືນປະເທດທັງໝົດ 476 ຄົນ (ຍິງ 256 ຄົນ).
ຂ່າວ, ພາບ: ສະຖານທູດລາວປະຈຳຫວຽດນາມ.
