ໃນວັນທີ 5 ກັນຍາ 2024 ນີ້, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງວຽງຈັນ, ຮ່ວມກັບເມືອງໂພນໂຮງໄດ້ຈັດໃຫ້ມີການສະຫຼຸບ ແລະ ຖອດຖອນບົດຮຽນ ກ່ຽວກັບການຕິດຕາມກວດກາ ແລະ ຈັດຕັ້ງປະຕິບັດແຜນຄຸ້ມຄອງສິ່ງແວດລ້ອມ ຂອງໂຄງການລົງທຶນ ແລະ ກິດຈະການຕ່າງໆຢູ່ເມືອງໂພນໂຮງ ໂດຍມີ ທ່ານ ແກ້ວໃຈ ພົມມີ ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມ ແລະ ທ່ານ ບຸນມີ ອິນທະວົງ ຮອງເຈົ້າເມືອງໆໂພນໂຮງ ພ້ອມດ້ວຍບັນດາເຈົ້າຂອງໂຄງການ ແລະ ກິດຈະການຕ່າງໆພາຍໃນເມືອງໂພນໂຮງເຂົ້າຮ່ວມ.
ທ່ານ ແກ້ວໃຈ ພົມມີ ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງວຽງຈັນ ກ່າວວ່າ: ກອງປະຊຸມສະຫຼຸບ ແລະ ຖອດຖອນບົດຮຽນ ກ່ຽວກັບ ການຕິດຕາມກວດກາ ການຈັດຕັ້ງປະຕິບັດແຜນຄຸ້ມຄອງສິ່ງແວດລ້ອມ ຂອງໂຄງການລົງທຶນ ແລະ ກິດຈະການຕ່າງໆ ເປັນວຽກສໍາຄັນ ແລະ ຕ້ອງໄດ້ເອົາໃຈໃສ່ຈັດຕັ້ງປະຕິບັດໃນທຸກໆປີ ໂດຍມີຈຸດປະສົງຄື: ເຜີຍແຜ່ພາລະບົດບາດຂອງ ພະແນກຊັບພະຍາກອນທຳມະຊາດແລະສິ່ງແວດ ລ້ອມແຂວງວຽງຈັນ ໂດຍສະເພາະຂະແໜງກວດກາຊັບພະຍາກອນທໍາມະຊາດ ແລະ ສິ່ງແວດລ້ອມ ກ່ຽວກັບວຽກງານຕິດຕາມກວດກາສິ່ງແວດລ້ອມ ແລະ ບາງນິຕິກໍາທີ່ກ່ຽວຂ້ອງ, ພ້ອມນີ້ຍັງໄດ້ຈະແລກປ່ຽນບົດຮຽນ ກ່ຽວກັບການຕິດຕາມກວດກາ ການຈັດຕັ້ງປະຕິບັດແຜນຄຸ້ມຄອງສິ່ງແວດລ້ອມ ຂອງໂຄງການລົງທຶນ ແລະ ກິດຈະການຕ່າງໆ, ມອບຢັ້ງຢືນໂຄງການພັດທະນາສີຂຽວປະຈໍາປີ 2024 ແລະ ແນະນໍາບັນດາໂຄງການ ທີ່ຍັງຖືເບົາຕໍ່ວຽກງານຄຸ້ມຄອງສິ່ງແວດລ້ອມ ໃຫ້ເພີ່ມທະວີຄວາມເອົາໃຈໃສ່ສູງຂຶ້ນເພື່ອໃຫ້ສາມາດຜ່ານການປະເມີນ ເປັນໂຄງການພັດທະນາສີຂຽວ ໃນປີຕໍ່ໆໄປ.
ທ່ານ ແສງອຳພົນ ກົງພະວົງ, ຮອງຫົວໜ້າຂະແໜງກວດກາຊັບພະຍາກອນທໍາມະຊາດ ແລະ ສິ່ງແວດລ້ອມກ່າວວ່າ: ປະຈຸບັນ ຢູ່ພາຍໃນເມືອງໂພນໂຮງ ມີໂຄງການລົງທຶນທັງໝົດ ທີ່ໄດ້ຜ່ານຂະບວນການປະເມີນຜົນກະທົບຕໍ່ສິ່ງແວດລ້ອມ ແບບລະອຽດ ແລະ ສຶກສາເບື້ອງຕົ້ນກ່ຽວກັບຜົນກະທົບຕໍ່ສິ່ງແວດລ້ອມ ຈໍານວນ 46 ໂຄງການເຊິ່ງປະກອບມີ: ຂົງເຂດກະສິກໍາ-ປ່າໄມ້ 20 ໂຄງການ; ຂົງເຂດອຸດສາຫະກໍາ-ການຄ້າ 14 ໂຄງການ; ຂົງເຂດໂຍທາທິການ-ຂົນສົ່ງ 4 ໂຄງການ; ຂົງເຂດບໍລິການທ່ອງທ່ຽວ 2 ໂຄງການ, ຂົງເຂດພະລັງງານ ແລະ ບໍ່ແຮ່ 7 ໂຄງການເຊິ່ງຄະນະກໍາມະການ ໄດ້ເຄື່ອນໄຫວກວດກາ ແລະ ຊຸກຍູ້ ແນະນໍາ ບໍລິສັດເຈົ້າຂອງໂຄງການ ໄດ້ທັງໝົດ 28 ໂຄງການ ແລະ ຍັງຄົງຄ້າງ 18 ໂຄງການ.
ຜ່ານການເຄື່ອນໄຫວລົງກວດກາເບິ່ງພື້ນທີ່ຕົວຈິງ ແລະ ການລາຍງານຈາກອົງການປົກຄອງບ້ານ ແລະ ບັນດາບໍລິສັດ ເຈົ້າຂອງໂຄງການ ສາມາດສະຫຼຸບໄດ້ວ່າ: ໂດຍລວມແລ້ວ ບັນດາບໍລິສັດສ່ວນໃຫຍ່ ແມ່ນມີຄວາມເອົາໃຈໃສ່ໃນການປະຕິບັດກົດໝາຍ ແລະ ພັນທະດ້ານສິ່ງແວດລ້ອມ ເປັນຕົ້ນ: ການປະຕິບັດນິຕິກໍາທີ່ກ່ຽວຂ້ອງ, ການປະຕິບັດແຜນຄຸ້ມຄອງສິ່ງແວດລ້ອມ, ການມອບງົບປະມານຮ່ວງຕິດຕາມກວດກາສິ່ງແວດລ້ອມ ແລະ ການປະສານງານຮ່ວມມືກັບພາກສວ່ນລັດ ແລະ ອົງການປົກຄອງບ້ານ ໄດ້ດີພໍສົມຄວນແລະໃນຕໍ່ໜ້າຈະໄດ້ມີການສືບຕໍ່ຕິດຕາມກວດກາ ບັນດາກິດຈະການຕ່າງໆຢ່າງເປັນປົກກະຕິຕື່ມອີກ.
ໃນໂອກາດນີ້ຍັງໄດ້ຜ່ານນິຕິກຳຕ່າງໆກ່ຽວກັບສິ່ງແວດລ້ອມ ແລະ ມີການມອບໃບຢັ້ງຢືນໂຄງການພັດທະນາສີຂຽວ ປະຈຳປີ 2024 ໃຫ້ເຈົ້າຂອງກິດຈະການຕ່າງໆທີ່ຜ່ານການກວດກາອີກດ້ວຍ.
