ສະເຫລີມສະຫລອງປີໃໝ່ລາວຢ່າງມີສະຕິ ເພື່ອປ້ອງກັນອຸບັດຕິ ເຫດທີ່ອາດຈະເກີດຂຶ້ນ

ການສະເຫລີມສະຫລອງສົ່ງທ້າຍປີເກົ່າ ແລະ ຕ້ອນຮັບປີ ໃໝ່ລາວ ພສ 2567 ທີ່ຈະມາເຖີງນີ້ ແມ່ນກົງກັບວັນທີ 13,14, 15 ແລະ 16 ເມສາ ຄສ 2024, ແຕ່ເນື່ອງຈາກວັນທີ 13 ແລະ 14 ເມສາ ກົງກັບວັນພັກລັດຖະການ, ລັດຖະບານຈິ່ງຕົກລົງເອົາວັນພຸດ ວັນທີ 17 ແລະ 18 ເມສາ ເປັນມື້ພັກຊົດເຊີຍ ເຮັດໃຫ້ການສະເຫລີມສະ ຫລອງກວມເອົາເວລາຫລາຍວັນ.

ເນື່ອງຈາກປີນີ້, ເປັນປີທ່ອງທ່ຽວລາວ 2024 ເຮັດຫລາຍທ້ອງຖິ່ນ, ທັງລະດັບແຂວງ, ເມືອງ ແລະ ບ້ານ ກະກຽມຫລາຍກິດຈະກໍາ ໂດຍສະເພາະທີ່ຕິດພັນກັບບຸນປີໃໝ່ລາວ ເພື່ອສົ່ງເສີມການທ່ອງທ່ຽວ ເຮັດໃຫ້ຫລາຍຄົນ ຫລື ຫລາຍຄອບຄົວວາງ ແຜນໄປຫລີ້ນໄປທ່ຽວສະຖານທີ່ສຳຄັນຕ່າງໆ, ລວມເຖີງການ ເດີນທາງກັບຄືນບ້ານເກີດເມືອງນອນຂອງຕົນຢູ່ຕ່າງແຂວງ ເພື່ອຮ່ວມສະເຫລີມສະຫລອງປີໃໝ່ລາວກັບຄອບຄົວ ແລະ ຍາດພີ່ ນ້ອງ.

ໃນການສະເຫລີມສະຫລອງປີໃໝ່ລາວທຸກໆ ປີ ບັນຫາໜຶ່ງທີ່ສັງຄົມໃຫ້ຄວາມສົນ ໃຈເປັນພິເສດ ແລະ ຖືເປັນສິ່ງທີ່ແກ້ໄຂບໍ່ຕົກ ແມ່ນບັນຫາອຸບັດຕິເຫດທີ່ເກີດຂຶ້ນຕາມທ້ອງຖະໜົນ ເຊິ່ງມີສາ ເຫດຕົ້ນຕໍມາຈາກການດື່ມສິ່ງມຶນເມົາແລ້ວຂັບຂີ່ພາຫະນະ.

ອີງຕາມຂໍ້ມູນຈາກກົມຕໍາຫລວດຈະລາຈອນ, ກົມໃຫຍ່ຕໍາຫລວດ, ກະຊວງ ປ້ອງກັນຄວາມສະຫງົບໃຫ້ຮູ້ວ່າ: ໃນໄລຍະປີໃໝ່ລາວ ພສ 2566 ຜ່ານມາ, ທົ່ວປະເທດມີອຸປະຕິເຫດເກີດຂຶ້ນ 342 ລາຍ, ພາຫະນະເປ່ເພ 589 ຄັນ ຄົນໄດ້ຮັບບາດເຈັບ 611 ຄົນ, ເສຍຊີວິດ 35 ຄົນ, ສ້າງຜົນເສຍຫາຍທາງດ້ານສຸຂະພາບ, ຊີວິດ ແລະ ຊັບສິນຂອງລັດ, ຂອງລວມໜູ່ ແລະ ຂອງພໍ່ແມ່, ປະ ຊາຊົນບັນດາເຜົ່າຢ່າງຫຼວງຫຼາຍ ເຊິ່ງສາຍເຫດຂອງການເກີດອຸບັດຕິເຫດ ຫລາຍກວ່າໝູ່ ຍັງແມ່ນດື່ມສີ່ງມືນເມົາ 112 ກໍລະ ນີ, ເສຍຊີວິດ 5 ຄົນ.

ດັ່ງນັ້ນ, ເພື່ອເຮັດໃຫ້ການເຫຼີມສະຫຼອງສົ່ງທ້າຍປີເກົ່າ ແລະ ຕ້ອນຮັບປີໃໝ່ລາວ ພສ 2567 ໃຫ້ມີຄວາມສະຫງົບ, ປອດໄພ, ບັນຍາກາດເບີກບານມ່ວນຊື່ນ ແລະ ປາດ ສະຈາກຜົນເສຍຫາຍທາງສຸຂະພາບ, ຊີວິດ ແລະ ຊັບສີນທີ່ເກີດຈາກອຸບັດຕິເຫດຈະ ລາຈອນທາງບົກ, ກົມຕໍາຫຼວດຈະລາຈອນ ໄດ້ອອກແຈ້ງການເຖີ່ງ ພໍ່ແມ່ປະຊາຊົນ, ພະນັກງານ, ທະຫານ, ຕໍາຫຼວດ ແລະ ຜູ້ໃຊ້ລົດ -ໃຊ້ຖະໜົນກ່ຽວກັບການປ້ອງກັນ ສະກັດກັ້ນອຸບປະຕິເຫດຈະລາ ຈອນໂດຍກໍານົດ 14 ຂໍ້ສໍາຄັນ, ພ້ອມທັງ ໄດ້ອອກຄໍານະນໍາເຖີງພະແນກຕໍາຫຼວດຈະລາຈອນ ແຂວງ, ນະຄອນຫຼວງວຽງຈັນ ແລະ ເຂດເສດຖະກິດພິເສດສາມລ່ຽມຄໍາ ກ່ຽວກັບການເພີ່ມທະວີວຽກງານປ້ອງກັນ ແລະ ຈັດສັນຄວາມເປັນລະບຽບຮຽບຮ້ອຍໃນການສັນຈອນ ໄລຍະສະເຫຼີມສະຫຼອງຕ້ອນຮັບປີໃໝ່ລາວໃນປີນີ້.

ພ້ອມນີ້ ໄດ້ຮຽກຮ້ອງເຖີງພໍ່ແມ່ປະຊາຊົນ, ພົນລະເມືອງ, ຜູ້ ປົກຄອງ, ອໍານາດການປົກຄອງບ້ານ, ພະນັກງານ, ທະຫານ, ຕໍາຫຼວດ ເປັນເຈົ້າການໃນການສືກສາອົບຮົມ, ແນະນໍາລູກຫຼານ ແລະ ພະນັກງານທີ່ຢູ່ໃນຄວາມຮັບຜິດຊອບ ໃຫ້ເປັນເຈົ້າການປ້ອງກັນຕົນເອງ ເພື່ອປາດສະຈາກອຸບປະຕິເຫດ.

ອຸບັດຕິເຫດຕາມທ້ອງຖະໜົນ ໂດຍສະເພາະໃນໄລຍະບຸນປີ ໃໝ່ລາວ ຖືເປັນບັນຫາເກົ່າ ແລະ ເປັນບັນຫາຊໍ້າເຮື້ອທີ່ເກີດຂຶ້ນມາແຕ່ດົນນານ ແຕ່ບໍ່ສາມາດແກ້ໄຂໃຫ້ຕົກໄປ ຍ້ອນຫລາຍປັດ ໄຈ, ໃນນັ້ນ ບັນຫາສໍາຄັນກວ່າໝູ່ຍັງແມ່ນຜູ້ໃຊ້ລົດໃຊ້ຖະ ໜົນຈໍານວນບໍ່ຫນ້ອຍຖືເບົາຕໍ່ການປະຕິບັດຕາມກົດລະບຽບຈະລາ ຈອນຢ່າງເຂັ້ມງວດ ຫລື ບາງກໍລະນີຮູ້ແລ້ວຕ່າວພາໂລ.

ຢ່າງໃດກໍຕາມ, ອຸບັດຕິເຫດບໍ່ມີໃຜປາດຖະໜາຢາກໃຫ້ມັນເກີດຂຶ້ນ, ແຕ່ມັນສາ ມາດເກີດຂຶ້ນໄດ້ທຸກເວລາຖ້າຫາກພວກເຮົາຂາດສະຕິໃນຂະນະຂັບຂີ່. ດັ່ງນັ້ນ ໃນໂອ ກາດສະເຫລີມສະຫລອງສົ່ງທ້າຍປີເກົ່າ ແລະ ຕ້ອນຮັບປີໃໝ່ລາວ ພສ 2567 ທີ່ຈະມາເຖີງນີ້ ຮຽກຮ້ອງມາຍັງຜູ້ຂັບຂີ່ພາຫະນະ ກໍຄື ຜູ້ໃຊ້ລົດໃຊ້ຖະໜົນທຸກຄົນ ຈົ່ງມີສະຕິປະຕິບັດຕາມກົດລະບຽບຈະລາຈອນໃຫ້ເຂັ້ມ ງວດທີ່ສຸດ, ເມື່ອດື່ມສິ່ງມຶນເມົາແລ້ວບໍ່ຄວນຂັບຂີ່ພາຫະນະ, ຄວນໃຫ້ກຽດເຊິ່ງກັນ ແລະ ກັນໃນເວລາຂັບຂີ່, ກ່ອນອອກເດີນ ທາງແຕ່ລະຄັ້ງຕ້ອງກວດກາສະພາບເຕັກນິກພາຫະນະຂອງຕົນໃຫ້ຮັບປະ ກັນ ແລະ ຄ່ອຍໄປຄ່ອຍມາ ເພື່ອປ້ອງກັນອຸບັດຕິ ເຫດທີ່ອາດຈະເກີດຂຶ້ນ ຊຶ່ງຈະນຳ ມາສູ່ການສູນເສຍທັງຊີວິດ ແລະ ຊັບສິນ.

ການສະເຫລີມສະຫລອງປີໃໝ່ລາວປີນີ້ ຂໍໃຫ້ທຸກຄົນ, ທຸກຄອບຄົວ ຈົ່ງມີໂຊກໄຊ, ມີຄວາມສຸກທີ່ເຕັມໄປດ້ວຍຮອຍຍີ້ມ ແລະ ສຽງຫົວທີ່ເບີກບານມ່ວນຊື່ນກັບຄອບຄົວ, ຍາດພີ່ນ້ອງ, ໝູ່ຄູ່ ແລະ ຄົນຮັກແພງ, ແຕ່ຖ້າສະເຫລີມສະຫລອງຢ່າງຂາດສະຕິ ແລະ ເກີນຄວາມພໍດີ ອາດຈະນຳມາຊຶ່ງການສູນເສຍ ຫລື ສຽງຮ້ອງໃຫ້, ນ້ຳຕາ ແລະ ຄວາມໂສກເສົ້າທີ່ບໍ່ສາມາດຫວນເອົາຄືນມາໄດ້ຕະຫລອດຊີວິດ.

ທຸກຄັ້ງທີ່ຂັບຂີ່ພາຫະນະ ຕ້ອງຄິດໃນໃຈສະເໝີວ່າ: “ໄປຊ້າ 5 ນາທີ ດີກ່ວາຕາຍເປັນຜີເຝົ້າຖະໜົນ”.