ວັນທີ 14 ມິຖຸນາ 2024, ທີ່ສູນການຄ້າລາວໄອເຕັກມໍ ນະຄອນຫລວງວຽງຈັນ ໄດ້ຈັດງານສະເຫລີມສະຫລອງວັນຜູ້ບໍລິຈາກເລືອດໂລກ 14 ມິຖຸນາ ໂດຍການເຂົ້າ ຮ່ວມເປັນປະທານຂອງ ທ່ານ ກິແກ້ວ ໄຂຄໍາພິທູນ, ຮອງນາຍົກລັດຖະມົນຕີ, ຜູ້ຊີ້ ນໍາຂົງເຂດວຽກງານວັດທະນະທຳ-ສັງຄົມ, ມີ ທ່ານ ຄໍາລາວັນ ຈັນທະລາວັນ, ປະທານ ອົງການກາແດງແຫ່ງຊາດລາວ, ທັງເປັນຮອງປະທານ ຄະນະກໍາມະການ ສົ່ງເສີມການບໍລິຈາກເລືອດ-ສົ່ງເລືອດແຫ່ງຊາດ. ພ້ອມດ້ວຍ ພະນັກງານ, ທະຫານ, ຕໍາຫລວດ, ນັກຮຽນນັກສືກສາ ແລະ ມວນຊົນທົ່ວໄປໃນນະຄອນຫລວງວຽງຈັນເຂົ້າຮ່ວມ ປະມານ 1,500 ຄົນ.
ການຈັດງານຄັ້ງນີ້ ຄາດວ່າຈະໄດ້ຮັບບໍລິຈາກເລືອດຫລາຍກວ່າ 500 ຖົງ. ນອກນັ້ນ ຍັງມີການມອບໃບຍ້ອງຍໍໃຫ້ແກ່ ຜູ້ບໍລິຈາກເລືອດຫລາຍຄັ້ງ, ກົມກອງ-ການຈັດຕັ້ງທີ່ດີເດັ່ນໃນການປຸກລະ ດົມບໍລິຈາກເລືອດ, ບໍລິສັດ-ຫົວຫນ່ວຍທຸລະກິດທີ່ໄດ້ປະກອບສວ່ນສະຫນັບສະຫນູນໃນການຈັດງານ ນໍາອີກ.
ວັນທີ 14 ມິຖຸນາ ຂອງທຸກໆປີ ແມ່ນວັນຜູ້ບໍລິຈາກເລືອດໂລກ (World Blood Donor Day) ຊຶ່ງຢູ່ປະເທດຕ່າງໆໃນທົ່ວໂລກໄດ້ພ້ອມກັນຈັດຕັ້ງສະເຫຼີມສະຫຼອງ ເພື່ອເປັນການສະ ແດງຄວາມຂອບໃຈຕໍ່ຜູ້ບໍລິ ຈາກເລືອດ ທີ່ເຂົາເຈົ້າໄດ້ມອບຂອງ ຂວັນ ທີ່ມີຄ່າທີ່ສຸດຕໍ່ຊີວິດ ນັ້ນຄືຄືການບໍລິຈາກເລືອດ ດ້ວຍຄວາມສະໝັກໃຈ ເພື່ອຊ່ວຍຄົນເຈັບ ແລະ ສ້າງຄວາມສໍານຶກໃນເລື່ອງຄວາມຈໍາເປັນຂອງການບໍລິຈາກເລືອດທີ່ປະຈໍາ ແລະ ສະໝໍ່າສະເໝີ. ເລືອດ ແລະ ຜະລິດຕະພັນເລືອດ ທີ່ໄດ້ຮັບບໍລິ ຈາກໃນແຕ່ລະປີ ຢູ່ທົວໂລກສາມາດຊ່ວຍຊີວິດຄົນເຈັບໄດ້ນັບລ້ານ.
ຈຳນວນຄົນເຈັບທີ່ຕ້ອງການນໍາໃຊ້ເລືອດ ມາຈາກ ແມ່ຍິງ ທີ່ໄດ້ຮັບຜົນກະທົບຈາກການເກີດລູກ, ເດັກນ້ອຍທີ່ເປັນພະ ຍາດເລືອດຈາງຂັ້ນຮ້າຍແຮງ, ຈາກພະຍາດໄຂ້ຍຸງ(Malaria), ໄຂ້ເລືອດອອກ, ຜູ້ໄດ້ຮັບຜົນກະທົບຈາກອຸບັດເຫດພາວະສຸກເສີນ, ໄພທາງທໍາມະຊາດ ລວມເຖິງການຜ່າຕັດຊະນິດຕ່າງໆ. ຢ່າງໃດກໍ່ຕາມ ເຖີງວ່າຄວາມຕ້ອງການເລືອດຢູ່ທົ່ວໂລກເປັນສິ່ງສໍາຄັນກໍ່ຕາມ ແຕ່ການໄດ້ຮັບເລືອດ ແລະຜະລິດ ຕະພັນເລືອດ ຈາກເລືອດທີ່ມີຄຸນນະພາບ ແລະປອດໄພ ຍັງເຮັດໄດ້ພຽງໃນບາງປະ ເທດເທົ່ານັ້ນ ແຕ່ຍັງມີອີກຫຼາຍປະເທດ ຍັງຄົງປະສົບກັບບັນຫາ ແລະຍັງເປັນຄວາມທ້າທາຍໃນດ້ານການຈັດຫາເລືອດ ແລະ ຜະລິດຕະພັນເລືອດທີ່ມີຄຸນນະພາບປອດໄພ.
ສໍາລັບແນວຄວາມຄິດຂອງວັນຜູ້ບໍລິຈາກເລືອດໂລກໃນປີ 2024 ຄື ການປຸກລະດົມໃຫ້ມີການບໍລິຈາກເລືອດ, ການບໍລິການເລືອດ ແລະຜະລິດຕະພັນຂອງເລືອດທີ່ປອດໄພ ເພື່ອເປັນການຊ່ວຍຊີວິດຂອງຄົນເຈັບໃຫ້ປອດໄພ ພ້ອມທັງເປັນການປູກຈິດສໍານຶກໃຫ້ສັງຄົມປະກອບໃນການບໍລິຈາກເລືອດຫລາຍຂື້ນ ເພື່ອຊ່ວຍຊີວິດ ໃຫ້ສັງຄົມມີຄວາມສະຫງົບ ເປັນສັງຄົມທີ່ມີຈິດໃຈເອື້ອເຟື້ອເພື່ອແຜ່ ມີຄວາມສາ ມັກຄີ ແລະ ມີສຸຂະພາບທີ່ດີ ແລະ ແນວຄວາມຄິດຂອງປີນີ້ໄດ້ແກ່:
“20 ແຫ່ງການສະເຫລີມສະຫລອງການໃຫ້: ໃຫ້ເລືອດ ໃຫ້ຊີວິດ, ຂອບໃຈຜູ້ບໍລິຈາກເລືອດທຸກທ່ານ” “ 20 years of celebrating of giving: Thanks blood donors”
ວັນຜູ້ບໍລິຈາກເລືອດປີນີ້ ແມ່ນເນັ້ນເຖິງຜູ້ຄົນໃນທົ່ວໂລກໄດ້ເລີ່ມຕົ້ນເປັນຜູ້ບໍລິຈາກເລືອດ ແລະເປັນຜູ້ບໍລິຈາກເລືອດຢ່າງປະຈໍາ. ເພື່ອສະເຫຼີມສະຫຼອງວັນທີ 14 ມິຖຸນາ ວັນຜູ້ບໍລິຈາກເລືອດໂລກໃຫ້ກວ້າງຂວາງ ຢູ່ສູນກາງ ແລະ ບັນດາແຂວງອື່ນໆ ໃນທົ່ວປະເທດ ກໍ່ຈະມີກິດຈະກໍາແບບນີ້ຕາມເວລາທີ່ເໝາະສົມເຊັ່ນກັນ.
ໃນໂອກາດນີ້ ທ່ານ ກິແກ້ວ ໄຂຄໍາພິທູນ, ຮອງນາຍົກລັດຖະ ມົນຕີ ໄດ້ຕາງຫນ້າລັດຖະບານ ຮຽກຮ້ອງ ມາຍັງການຈັດຕັ້ງ ແລະ ທຸກຊັ້ນຄົນ ໃນທົ່ວສັງຄົມ ເອົາໃຈໃສ່ເປັນເຈົ້າການ ບາງຈຸດສຸມດັ່ງນີ້:
1. ຂໍໃຫ້ທຸກໆການຈັດຕັ້ງ ແລະ ທຸກໆຊັ້ນຄົນ ແຕ່ສູນກາງລົງຮອດທ້ອງຖິ່ນຈົ່ງສືບຕໍ່ສ້າງຄວາມຮັບຮູ້ເຂົ້າໃຈ ກ່ຽວກັບຄວາມ ສຳຄັນ ແລະ ຄວາມຈຳເປັນຂອງການບໍລິ ຈາກເລືອດ ເພື່ອຊ່ວຍ ເຫຼືອເພື່ອນມະນຸດດ້ວຍກັນໃຫ້ສູງຂື້ນ;
2. ຮຽກຮ້ອງມາຍັງຜູ້ທີ່ເຄີຍບໍລິຈາກເລືອດມາກ່ອນແລ້ວ ຈົ່ງສືບຕໍ່ປະກອບສ່ວນເຂົ້າຮ່ວມຂະບວນການບໍລິຈາກເລືອດຢ່າງຕໍ່ເນື່ອງ ພ້ອມທັງຮັກສາດູແລຮັກສາສຸຂະ ພາບຂອງຕົນເອງ ຢ່າງສະໝໍ່າສະເໝີ ເພື່ອສືບຕໍ່ບໍລິຈາກເລືອດ; ສໍາລັບຜູ້ທີ່ຍັງບໍ່ເຄີຍບໍລິຈາກເລືອດ ກໍ່ຂໍໃຫ້ປະກອບສວ່ນເຂົ້າໃນຂະບວນການອັນສຳຄັນນີ້, ສ້າງຄວາມເຂົ້າໃຈໃຫ້ຫລາຍຂື້ນ ແລ້ວໃຫ້ກາຍເປັນຜຸ້ສະຫມັກໃຈບໍລິຈາກເລືອດ.
3. ສະເໜີໃຫ້ສື່ມວນຊົນທຸກຂະແໜງການ ຈົ່ງສືບຕໍ່ໂຄສະນາ ໃຫ້ສັງຄົມມີຄວາມຮັບຮູ້ເຂົ້າໃຈຕໍ່ວຽກງານເລືອດຫຼາຍຂື້ນ ໂດຍຜ່ານບົດຂຽນ,ບົດປະພັນ ແລະ ວຽກດີຄົນເດັ່ນດັ່ງທີ່ໄດ້ປະຕິບັດມາ;
4. ຮຽກຮ້ອງມາຍັງ ຜູ້ປຸກລະດົມບໍລິຈາກເລືອດຕາມສະຖານທີ່ຕ່າງໆ ຈົ່ງໄດ້ສືບຕໍ່ເອົາໃຈໃສ່ປຸກລະດົມ ພະນັກງານ ສະມາຊິກໃນການຈັດຕັ້ງຂອງຕົນ ໃນການເຂົ້າຮ່ວມຂະບວນການ ແລະ ບໍລິຈາກເລືອດຢ່າງເປັນປະຈໍາ ແລະ ຕໍ່ເນື່ອງ.
5. ຮຽກຮ້ອງຄະນະພັກ, ຄະນະນໍາທຸກຂັ້ນແຕ່ສູນກາງຮອດທ້ອງ ຖີ່ນ ຈົ່ງໄດ້ເປັນເຈົ້າການປະກອບສວ່ນຊຸກຍູ້ຂະບວນການບໍລິຈາກເລືອດແບບສະຫມັກໃຈບໍ່ຮຽກ ຮ້ອງສີ່ງຕອບແທນຢູ່ພາຍໃນກົມກອງຂອງຕົນໃຫ້ຫລາຍຂື້ນ.
6. ສະເໜີໃຫ້ວິຊາການທີ່ກ່ຽວຂ້ອງທຸກຂັ້ນ ຈົ່ງເອົາໃຈໃສ່ຕໍ່ການ ສ້າງຄວາມເພິ່ງ ພໍໃຈ, ຄວາມປະທັບໃຈໃຫ້ແກ່ຜູ້ບໍລິຈາກເລືອດ ດ້ວຍຄວາມເປັນມິດ, ຄວາມເປັນກັນເອງ ໃນການເຮັດວຽກຮ່ວມ ກັນ;
7. ສະເໜີແພດໝໍຜູ້ນຳໃຊ້ເລືອດ ຈົ່ງໄດ້ເຂົ້າໃຈເຖິງຄວາມໝາຍທີ່ວ່າ ເລືອດປອດໄພ ແລະ ພຽງພໍ, ໂດຍນຳໃຊ້ເລືອດຢ່າງເໝາະສົມ ແລະສົມເຫດສົມຜົນ, ບໍ່ຟູມເຟືອຍ. ພ້ອມດຽວກັນນີ້ກໍເປັນເຈົ້າ ການເຂົ້າຮ່ວມໃນການປຸກລະດົມບໍລິຈາກເລືອດຮ່ວມກັບໜ່ວຍງານເລືອດຢູ່ຕາມສະຖານທີ່ຕ່າງໆ ພ້ອມທັງລະ ດົມໃຫ້ບັນດາແພດໝໍ ຮ່ວມບໍລິຈາກເລືອດນຳຕື່ມອີກເພື່ອເປັນແບບຢ່າງທີ່ດີຕໍ່ສັງຄົມ.
