ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 16 ທັນວາ 2023 ນີ້ ກະຊວງແຮງງານ ແລະ ສະຫວັດດີການສັງຄົມ, ອົງການພັດທະນາສາກົນ ປະເທດສະຫະລັດອາເມລິກາ (USAID) ແລະ ອົງການ ສະຫະປະຊາຊາດ ປະຈໍາລາວ (UNDP) ໄດ້ຈັດພິທີສະເຫຼີມສະຫຼອງວັນຄົນພິການ ແຫ່ງຊາດ ແລະ ສາກົນ. ພາຍໃຕ້ຫົວຂໍ້ “ສາມັກຄີຮ່ວມກັນປະຕິບັດງານເພື່ອຊ່ວຍເຫຼືອ ແລະ ບັນລຸເປົ້າຫມາຍພັດທະນາແບບຍືນຍົງເພື່ອຄົນທີ່ມີຄວາມພິການ, ຮ່ວມກັບຄົນທີ່ມີຄວາມພິການ ແລະ ດ້ວຍຄົນທີ່ມີຄວາມພິການເອງ” ໂດຍ ການສະໜັບສະໜູນ ຈາກ ອົງການ USAID ແລະ UNDP ພ້ອມດ້ວຍ ສູນບໍລິການຄົນທີ່ມີຄວາມພິການ, ສະມາຄົມຄົນພິການຕາລາວ, ສູນມືແຫ່ງຄວາມຫວັງ, ສະມາຄົມເພື່ອຄົນໂອທິສຕິກ, ສູນບໍລິການເພື່ອການພັດທະນາແບບມີສ່ວນຮ່ວມຂອງຄົນພິການ (ສູນ ດີມາສ໌), ສະມາຄົມແມ່ຍິງພິການ, ສູນການແພດຟື້ນຟູໜ້າທີ່ການ, ນາກາ ເມເນຈີເມັ້ນ ແອນເຊີວິສ໌ ຈໍາກັດຜູ້ດຽວ, ອົງການເພື່ອມະນຸດສະທໍາ ແລະ ການມີສ່ວນຮ່ວມ, ອົງການ ເວີລດ໌ເອດຢູເຄຊັນ ແລະ ອົງການຈັດຕັ້ງເພື່ອຄົນທີ່ມີຄວາມພິການອື່ນໆ.
ກິດຈະກໍາໃນງານຄັ້ງນີ້ ມີແຂ່ງຂັນກິລາປະເພດຕ່າງໆ ເປັນຕົ້ນ: ການແຂ່ງຂັນກິລາບານບ້ວງລໍ້ເລື່ອນ, ບານເຕະຄົນພິການຕາ, ບອກເຊ່ຍ, ໂກນບານ ແລະ ເປຕັງ. ນອກຈາກນັ້ນຍັງມີງານວາງສະແດງຈາກຫຼາຍອົງການຈັດຕັ້ງເພື່ອຄົນທີ່ມີຄວາມພິການ, ເພື່ອສະແດງໃຫ້ເຫັນຄວາມພະຍາຍາມຂອງຄົນທີ່ມີຄວາມພິການຢູ່ລາວ ໃນການປັບປຸງຊີວິດ ແລະ ຄວາມເປັນຢູ່. ນອກນັ້ນ ຍັງມີການສະແດງອີກຫຼາຍປະເພດເຊັ່ນ: ການສະແດງຟ້ອນລໍ້ເລື່ອນ, ການຮ້ອງເພງ, ການຫຼິ້ນເກມ, ການເຕັ້ນພາສາມື, ການເຕັ້ນ K-pop, ແລະ ເວທີສົນທະນາກ່ຽວກັບການຈ້າງງານແບບມີສ່ວນຮ່ວມ.