ການດໍາເນີນກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ໃນຕອນເຊົ້າວັນທີ 18 ມິຖຸນາ ນີ້ ພາຍໃຕ້ການເປັນປະທານຂອງ ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ. ທ່ານ ວິໄລວັນ ບຸດດາຄໍາ ຮອງປະທານອົງການກວດກາລັດຖະບານ ຮອງຫົວໜ້າອົງການຕ້ານການສໍ້ລາດບັງຫຼວງ ແຫ່ງ ສປປ ລາວ ໄດ້ຂຶ້ນສະເໜີກ່ຽວກັບການປັບປຸງກົດໝາຍ ວ່າດ້ວຍການຕ້ານການສໍ້ລາດບັງຫຼວງ ເຊິ່ງຮ່າງກົດໝາຍດັ່ງກ່າວ ຖືກສ້າງຂຶ້ນ, ຮັບຮອງ ແລະ ປະກາດໃຊ້ນັບແຕ່ປີ 2005 ເປັນຕົ້ນມາ ແລະ ໄດ້ມີການປັບປຸງເທື່ອທີ 1 ໃນປີ 2012.
ນີ້ເປັນການປັບປຸງເທື່ອທີ 2 ເພື່ອໃຊ້ເປັນບ່ອນອີງໃຫ້ແກ່ການເຄື່ອນໄຫວວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ, ການກໍ່ສ້າງ-ປັບປຸງກົງຈັກການຈັດຕັ້ງ ແລະ ການເຄື່ອນໄຫວຂອງອົງການຕ້ານການສໍ້ລາດບັງຫຼວງແຕ່ລະຂັ້ນ. ຜ່ານການຈັດຕັ້ງປະຕິບັດຕົວຈິງໃນໄລຍະຜ່ານມາ, ສາມາດເຫັນໄດ້ດ້ານດີຕັ້ງໜ້າ ແລະ ດ້ານອ່ອນຄົງຄ້າງ, ປະກົດການລ່ວງລະເມີດກົດໝາຍ ແລະ ລະບຽບການຕ່າງໆ ເປັນຕົ້ນການຍັກຍອກ-ສໍ້ໂກງ, ການໃຫ້-ຮັບສິນບົນ, ການສວຍໃຊ້ຖານະຕໍາແໜ່ງ-ໜ້າທີ່, ການຟອກເງິນ ທີ່ຕິດພັນກັບການສໍ້ລາດບັງຫຼວງ ແລະ ອື່ນໆ.
ການປັບປຸງກົດໝາຍສະບັບດັ່ງກ່າວ, ເພື່ອເຮັດໃຫ້ເນື້ອໃນຂອງກົດໝາຍຄົບຖ້ວນ, ຊັດເຈນ, ສອດຄ່ອງກັບສະພາບການໃໝ່, ຈັດຕັ້ງປະຕິບັດມີປະສິດທິຜົນ ແລະ ເພື່ອລວບລວມເອົາບາງເນື້ອໃນທີ່ກ່ຽວຂ້ອງກັບວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ ທີ່ໄດ້ກໍານົດຢູ່ໃນກົດໝາຍ, ລະບຽບການ ແລະ ນິຕິກໍາອື່ນໆ ມາໄວ້ໃນກົດໝາຍວ່າ ດ້ວຍການຕ້ານການສໍ້ລາດບັງຫຼວງ ເຮັດໃຫ້ກົດໝາຍດັ່ງກ່າວ ມີລັກສະນະກວມລວມ, ການຈັດຕັ້ງປະຕິບັດຕົວຈິງມີຄວາມເປັນເອກະພາບ, ການເຄື່ອນໄຫວວຽກງານດັ່ງກ່າວ ມີຄວາມສັກສິດ, ໜັກແໜ້ນ, ເຂັ້ມແຂງ.
ຜ່ານການປະເມີນ ແລະ ຖອດຖອນບົດຮຽນໃນການຈັດຕັ້ງປະຕິບັດກົດໝາຍສະບັບດັ່ງກ່າວນີ້ ເຫັນວ່າຍັງມີບາງໝວດ, ບາງມາດຕາ, ບາງເນື້ອໃນທີ່ໄດ້ກໍານົດໃນເວລານັ້ນ ມາຮອດປັດຈຸບັນບໍ່ສອດຄ່ອງ ແລະ ແທດເໝາະກັບສະພາບການໃໝ່ ເປັນຕົ້ນ ລະບົບກົງຈັກການຈັດຕັ້ງ, ພາລະບົດບາດ, ສິດ ແລະ ໜ້າທີ່, ໂຄງປະກອບການຈັດຕັ້ງ ແລະ ບຸກຄະລາກອນຂອງອົງການຕ້ານການ ສໍ້ລາດບັງຫຼວງແຕ່ລະຂັ້ນຍັງບໍ່ທັນແຈ້ງ, ບໍ່ທັນຮັດກຸມ, ມີບາງເນື້ອໃນຂອງບາງມາດຕາປະຕິບັດໄດ້ຍາກ ແລະ ອື່ນໆ.
ຈາກເຫດຜົນດັ່ງກ່າວ, ຈຶ່ງມີຄວາມຈໍາເປັນຈະຕ້ອງໄດ້ມີການປັບປຸງ ເພື່ອເຮັດໃຫ້ກົດໝາຍສະບັບ ດັ່ງກ່າວມີເນື້ອໃນຄົບຖ້ວນ, ພາວະວິໄສ, ປະຕິບັດໄດ້ງ່າຍ ທັງສອດຄ່ອງກັບກົດໝາຍ ແລະ ນິຕິກໍາອື່ນທີ່ກ່ຽວຂ້ອງ ໂດຍໄດ້ມີການປັບປຸງໃນດ້ານໂຄງປະກອບ ແລະ ເນື້ອໃນຂອງມາດຕາ ຄື: ກົດໝາຍວ່າດ້ວຍ ການຕ້ານການສໍ້ລາດບັງຫຼວງສະບັບປັດຈຸບັນ ປະກອບດ້ວຍ 10 ໝວດ ແລະ 64 ມາດຕາ. ຮ່າງກົດໝາຍວ່າດ້ວຍການຕ້ານການສໍ້ລາດບັງ ຫຼວງ ສະບັບປັບປຸງ (ສະບັບໃຫມ່) ປະກອບມີ 10 ພາກ, 8 ໝວດ ແລະ 95 ມາດຕາ.
ຮ່າງກົດໝາຍສະບັບປັບປຸງນີ້, ຍັງໄດ້ມີການປັບປຸງໂຄງສ້າງ, ຈັດລຽງບາງພາກ, ບາງໝວດ ແລະ ບາງມາດຕາ. ໃນນີ້ ໄດ້ຕັດອອກ 9 ມາດຕາ ຍ້ອນໄດ້ເອົາເນື້ອໃນຂອງບາງມາດຕາສັບຊ້ອນເຂົ້າ ບັນດາມາດຕາກ່ຽວກັບສິດ ແລະ ໜ້າທີ່ຂອງອົງການຕ້ານການສໍ້ລາດບັງຫຼວງແຕ່ລະຂັ້ນ, ບາງມາດຕາ ແມ່ນໄດ້ສັບຊ້ອນເຂົ້າພາກທີ VI ຂໍ້ຫ້າມ ແລະ ບາງມາດຕາ ແມ່ນໄດ້ກໍານົດຢູ່ໃນກົດໝາຍວ່າດ້ວຍການກວດກາລັດ ແລະ ປະມວນກົດຫມາຍອາຍາແລ້ວ ດັ່ງນັ້ນຈຶ່ງຈໍາເປັນຕ້ອງໄດ້ຕັດອອກ ເພື່ອບໍ່ໃຫ້ເນື້ອໃນຊໍ້າຊ້ອນກັນ; ເພີ່ມໃໝ່ 41 ມາດຕາ, ປັບປຸງ 38 ມາດຕາ, ຮັກສາເນື້ອໃນເກົ່າໄວ້ 16 ມາດຕາ.
