ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສະເໜີໃຫ້ລັດຖະບານ ພິຈາລະນາຕໍ່ແຜນຍຸດທະສາດດ້ານພະລັງງານໄຟຟ້າຂອງລາວທີ່ຈະເປັນໝໍ້ໄຟອາຊຽນ

ສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ ສະເໜີໃຫ້ລັດຖະບານ, ຂະແໜງການທີ່ກ່ຽວຂ້ອງທຸກພາກສ່ວນ ພິຈາລະນາຕໍ່ແຜນຍຸດທະສາດດ້ານພະລັງງານໄຟຟ້າຂອງລາວທີ່ຈະເປັນໝໍ້ໄຟອາຊຽນ ເພາະຍັງມີຫາງສຽງຈາກສັງຄົມສະແດງຄວາມເປັນຫ່ວງກ່ຽວກັບຜົນກະທົບທີ່ເກີດຂຶ້ນຍ້ອນການກໍ່ສ້າງເຂື່ອນໄຟຟ້າ.
ໃນໂອກາດຕາງໜ້າສູນກາງແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ ປະກອບຄໍາເຫັນຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ 8 ເມື່ອບໍ່ດົນມານີ້ ທ່ານ ນາງ ຄໍາຈັນ ພົມແສງສະຫວັນ, ຮອງປະທານສູນກາງແນວລາວສ້າງຊາດ ສະເໜີວ່າ: ຈາກແຜນຍຸດທະສາດດ້ານພະລັງງານໄຟຟ້າຂອງລາວທີ່ຈະເປັນໝໍ້ໄຟອາຊຽນນັ້ນ ຫາງສຽງສັງຄົມໄດ້ສະເໜີວ່າ: ຍ້ອນມີຫລາຍເຫດການເກີດຂຶ້ນໃນໄລຍະຜ່ານມາ (2-3 ປີ) ລວມທັງບັນຫາໄພນ້ຳຖ້ວມເກີດຂຶ້ນໃນແຕ່ລະປີ ປະຊາຊົນເປັນຫ່ວງຢ້ານມີຄວາມສ່ຽງຫລາຍດ້ານຈາກໂຄງການພັດທະນາໄຟຟ້າ. ປັດຈຸບັນ ຈໍານວນເຂື່ອນໄຟຟ້າມີຫລາຍ, ບາງແຂວງມີເຖີງ 11 ແຫ່ງ ແລະ ບາງເມືອງມີເຖີງ 3 ແຫ່ງ, ຕໍ່ບັນຫານີ້ຕ້ອງພິຈາລະນາຄືນ. ນອກຈາກນີ້ ໄລຍະຜ່ານມາ ເຖີງວ່າກະຊວງພະລັງງານ ແລະ ບໍ່ແຮ່ໄດ້ອອກແຈ້ງການສະບັບເລກທີ 1167/ພບ, ລົງວັນທີ 28 ພຶດສະພາ 2018 ວ່າດ້ວຍການຢຸດຊົ່ວຄາວຕໍ່ການອະນຸມັດໂຄງການສ້າງເຂື່ອນໄຟຟ້າຂະໜາດນ້ອຍແຕ່ 15 ເມກາວັດ ລົງມາແມ່ນເປັນເລື່ອງທີ່ດີແລ້ວ, ແຕ່ຂໍໃຫ້ເອົາໃຈໃສ່ຢ່າງຈົດຈໍ່ຕໍ່ຄວາມຮັບຜິດຊອບຂອງພະນັກງານທີ່ເຮັດໜ້າທີ່ກວດກາເຕັກນິກ, ຄຸນນະພາບ ແລະ ອື່ນຯ ຕໍ່ໂຄງການທີ່ໄດ້ອະນຸມັດ ແລະ ກໍາລັງດຳເນີນການກໍ່ ສ້າງໃນປັດຈຸບັນ.
ຮອງປະທານສູນກາງແນວລາວສ້າງຊາດ ຍັງໄດ້ສະເໜີໃຫ້ພາກສ່ວນກ່ຽວຂ້ອງມີການຊີ້ແຈງອະທິບາຍໃຫ້ປະຊາຊົນມີຄວາມເຂົ້າໃຈຕໍ່ໂຄງການກໍ່ສ້າງເຂື່ອນໄຟຟ້ານ້ຳໂມ້ 2 ຢູ່ແຂວງ ຊຽງຂວາງ ແລະ ໂຄງການກໍ່ສ້າງເມືອງ ອໍາມະຕະຢູ່ແຂວງ ອຸດົມໄຊ ເນື່ອງຈາກປະຊາຊົນຍັງຂັດຂ້ອງຫລືບໍ່ເຫັນດີນໍາສອງໂຄງການດັ່ງກ່າວ.
ອີງຕາມການຊີ້ແຈງຂອງ ທ່ານ ຄຳມະນີ ອິນທິລາດ ລັດຖະມົນຕີກະຊວງພະລັງງານ ແລະ ບໍ່ແຮ່ ຕໍ່ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ໃນວັນທີ 15 ພະຈິກ 2019 ໃຫ້ຮູ້ວ່າ: ປັດຈຸບັນ ສປປ ລາວ ມີແຫຼ່ງຜະລິດພະລັງງານໄຟຟ້າ ຈໍານວນ 71 ແຫ່ງ, ມີກໍາລັງຕິດຕັ້ງ 9.700 ເມກາວັດ ແລະ ພາຍໃນທ້າຍປີ 2019 ຈະສໍາເລັດການກໍ່ສ້າງເຂື່ອນໄຟຟ້າອີກ 4 ແຫ່ງ ຄື: ເຂື່ອນໄຟຟ້ານໍ້າຂອງໄຊຍະບູລີ, ເຂື່ອນນໍ້າງຽບ 1, ເຂື່ອນໄຟຟ້າດອນສະໂຮງ ແລະ ເຂື່ອນໄຟຟ້າເຊປຽນ – ເຊນ້ຳນ້ອຍ.

ໂດຍ: ບຸນຕຽງ ຈັນທະວົງ