ທ່ານ ອານຸພາບ ຕຸນາລົມ ເລຂາຄະນະພັກ ປະທານສະພາສະພາປະຊາຊົນ ນະຄອນຫຼວງວຽງຈັນ (ນວ) ພ້ອມດ້ວຍຄະນະສະມາຊິກສະພາແຫ່ງຊາດ (ສສຊ) ແລະ ສະມາຊິກສະພາປະຊາຊົນນະຄອນຫຼວງວຽງຈັນ (ສສນວ) ປະຈຳເຂດເລືອກຕັ້ງທີ I ນວ ໄດ້ລົງເຄື່ອນໄຫວພົບປະຜູ້ມີສິດເລືອກຕັ້ງ ແລະ ໂຄສະນາເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 7 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນນະຄອນຫຼວງຊຸດທີ II ໃນວັນທີ 21 ສິງຫາ 2024 ຢູ່ເຂດເສດຖະກິດພິດເສດກວມລວມໄຊເສດຖາ ໂດຍການຕ້ອນຮັບຂອງ ທ່ານ ທະນົງໄຊ ຄຸດໄພທູນ ຫົວໜ້າຄະນະຄຸ້ມຄອງເຂດເສດຖະກິດພິເສດ ນວ ມີທ່ານ ຂຽງຄໍາ ພຸດຈັນທະວົງສາ ຮອງອໍານວຍການບໍລິສັດຮ່ວມທຶນລາວຈີນ ຈໍາກັດ ພ້ອມດ້ວຍຄະນະ ແລະ ນັກງານຫຼັກແຫ່ງເຂົ້າຮ່ວມ.
ທ່ານ ທະນົງໄຊ ຄຸດໄພທູນ ໄດ້ລາຍງານໂດຍສັງເຂບກ່ຽວກັບສະພາບການຄຸ້ມຄອງບໍລິຫານ ແລະ ພັດທະນາເຂດເສດຖະກິດພິເສດ ນວ ໂດຍສະເພາະສະພາບການຈັດຕັ້ງປະຕິບັດ ໃນ 6 ເດືອນຕົ້ນປີ 2024 ແລະ ແຜນ 6 ເດືອນທ້າຍປີ 2024 ຂອງການພັດທະນາເຂດເສດຖະກິດພິເສດ ນວ ເຊິ່ງການລົງທຶນໃນ 6 ເດືອນຕົ້ນປີຜ່ານມາ ເຂດເສດຖະກິດພິເສດ ນວ ສາມາດດຶງດູດລົງທຶນໃໝ່ຈາກພາຍໃນ ແລະ ຕ່າງປະເທດໄດ້ທັງໝົດ 18 ບໍລິສັດ ໃນນີ້ເປັນການລົງທຶນຕ່າງປະເທດ 11 ບໍລິສັດ ພາຍໃນ 3 ບໍລິສັດ ແລະ ພາຍໃນບວກຕ່າງປະເທດ 4 ບໍລິສັດ ທຽບໃສ່ 6 ເດືອນຕົ້ນປີຂອງໄລຍະດຽວກັນປີຜ່ານມາຫຼຸດລົງ 12 ບໍລິສັດ ແຕ່ຖ້າທຽບໃສ່ແຜນການປີສາມາດປະຕິບັດໄດ້ 51,4% ຂອງແຜນການ.
ຈາກນັ້ນ ສສຊ-ສສນວ ກໍໄດ້ພັດປ່ຽນກັນເຜີຍແຜ່ຜົນສຳເລັດກອງປະຊຸມສະໄໝສາມັນ ເທື່ອທີ 7 ຂອງ ສພຊ ແລະ ກອງປະຊຸມສະໄໝສາມັນ ເທື່ອທີ 7 ຂອງ ສປນວ ເພື່ອແນໃສ່ໃຫ້ພະນັກງານທຸກຂົງເຂດ ກໍຄືຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈຕໍ່ເນື້ອໃນຈິດໃຈຜົນສຳເລັດຂອງກອງປະຊຸມດັ່ງກ່າວ ກໍຄື ການປະຕິບັດພາລະບົດບາດ ສິດ ແລະ ໜ້າທີ່ຂອງ ສສຊ ແລະ ສສນວ ໃຫ້ເລິກເຊິ່ງກວ່າເກົ່າ.
ໂອກາດນີ້ ທ່ານ ອານຸພາບ ຕຸນາລົມ ຍັງໄດ້ຍົກເອົາບາງຄຳສະເໜີຂອງປະຊາຊົນສະເໜີ ມາແລກປ່ຽນນຳຄະນະຄຸ້ມຄອງເຂດເສດຖະກິດພິເສດ ນວ ເພື່ອຄົ້ນຄວ້າຊອກຫາວິທີທາງແກ້ໄຂຮ່ວມກັນ ເປັນຕົ້ນການແກ້ໄຂບັນຫາແຮງງານຂອງລາວທີ່ຮົ່ວໄຫຼໄປເຮັດວຽກຕ່າງປະເທດ ສະເໜີໃຫ້ພາກສ່ວນກ່ຽວຂ້ອງມີກົນໄກການປະສານງານຫາພະແນກການກ່ຽວຂ້ອງໃຫ້ມີການສະໜອງແຮງງານໃຫ້ພຽງພໍ ໃຫ້ແກ້ໄຂບັນຫາປະຊາຊົນບຸກລຸກເຂດແດນເຂດພັດທະນາເຂດເສດຖະກິດ ຕໍ່ບັນຫານີ້ ທ່ານ ອານຸພາບ ຕຸນາລົມ ໄດ້ເນັ້ນໃຫ້ເຂດເສດຖະກິດພິເສດ ນວ ຕ້ອງເອົາໃຈໃສ່ສ້າງລະບຽບຄຸ້ມຄອງເຂດເສດຖະກິດພິເສດ ແລ້ວສະເໜີຫາອົງການປົກຄອງ ນວ ແກ້ໄຂຕາມຂັ້ນຕອນ ແລະ ຕ້ອງມີການປັບໄໝໃສ່ໂທດຢ່າງເດັດຂາດ ບັນຫາປະຊາຊົນສະເໜີໃຫ້ເລັ່ງປັບປຸງສ້ອມແປງເສັ້ນທາງຫຼັກ 21-450 ປີ ທີ່ເປ່ເພມາຫຼາຍປີແຕ່ບໍ່ໄດ້ຮັບການແກ້ໄຂ ແລະ ບັນຫາການສະໜອງຊົມໃຊ້ໄຟຟ້າບໍ່ພຽງ ຕໍ່ບັນຫານີ້ສະເໜີໃຫ້ເຂດເສດຖະກິດສະເໜີຫາວິທີທາງແກ້ໄຂ ແລະ ສ້າງແຜນຄາດຄະເນ ແຜນການນຳໃຊ້ໄຟຟ້າ ເພື່ອສະເໜີໄປ ໄຟຟ້າລາວ ໃຫ້ປະຕິບັດຕາມຂັ້ນຕອນຢ່າງລະອຽດຄົບຖ້ວນ ສະເໜີໃຫ້ເລັ່ງແກ້ໄຂບັນຫາກ່ຽວກັບພະນັກງານ ພາລະກອນ ກົນໄກຄຸ້ມຄອງເຂດເສດຖະກິດພິເສດ ບັນຫາວັດຖຸດິບປ້ອນໂຮງງານບໍ່ພຽງພໍ ແລະ ບັນຫາອື່ນໆຈຳນວນໜຶ່ງ.
ທີ່ມາ: ວຽງຈັນໃໝ່
