ໃນການດຳເນີນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ IX ຕອນບ່າຍວັນທີ 25 ມິຖຸນານີ້ ທ່ານ ພົນຕີ ສົມວັນ ສາຍລ້ອງພາ ຮອງລັດຖະມົນຕີ ກະຊວງ ປ້ອງກັນຄວາມສະຫງົບ ໄດ້ສະເໜີກ່ຽວກັບການປັບປຸງຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ ເພື່ອແນໃສ່ເຮັດໃຫ້ກຳລັງສະກັດກັ້ນ ແລະ ຕ້ານອັກຄີໄພ ມີຄວາມເຂັ້ມແຂງ, ເຕີບໃຫຍ່, ຂະຫຍາຍຕົວຢ່າງໜັກແໜ້ນ ແລະ ຮັບປະກັນໄດ້ຄວາມ ສະຫງົບປອດໄພ ທີ່ເກີດຂຶ້ນຈາກອັກຄີໄພ.
ທ່ານໄດ້ຍົກໃຫ້ເຫັນສະພາບການຄົ້ນຄວ້າປັບປຸງກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພໂດຍປະຕິບັດຕາມແຜນການສ້າງ ແລະ ປັບປຸງກົດໝາຍຂອງສະພາແຫ່ງຊາດ (ປີ 2023-2025), ລ່າສຸດໃນຄັ້ງວັນທີ 14 ມິຖຸນາ 2024 ກອງປະຊຸມຄົ້ນຄວ້າປັບປຸງ ຮ່າງກົດໝາຍສະບັບດັ່ງກ່າວ ລະຫວ່າງ ຄະນະຮັບຜິດຊອບກະຊວງປ້ອງກັນຄວາມສະຫງົບ ຮ່ວມກັບ ກົມກົດໝາຍ, ກົມ ປກສ ສະພາແຫ່ງຊາດ, ກົມກົດໝາຍ ກະຊວງຍຸຕິທຳ ແລະ ກົມນິຕິກຳ ຫ້ອງວ່າການສໍານັກງານນາຍົກ ລັດຖະມົນຕີ ຕາມຄໍາເຫັນຂອງຄະນະປະຈຳສະພາແຫ່ງຊາດ ແລະ ຄຳເຫັນຂອງສະມາຊິກສະພາແຫ່ງຊາດປະຊາຊົນຂັ້ນແຂວງ.
ຜ່ານການຄົ້ນຄວ້າກອງປະຊຸມ ສະເໜີຮັກສາເນື້ອໃນເກົ່າ 40 ມາດຕາ, ກວມເອົາ 154 ເນື້ອໃນ, ເຫັນດີປັບປຸງຕາມການສະເໜີ 10 ມາດຕາ, ກວມເອົາ 16 ເນື້ອໃນ, ໂຄງປະກອບ ແລະ ເນື້ອໃນຂອງຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ ໂຄງປະກອບຂອງກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພສະບັບປີ 2007 ປະກອບມີ 11 ໝວດ ແລະ 71 ມາດຕາ, ພາຍຫຼັງປັບປຸງ ຮ່າງກົດໝາຍສະບັບນີ້ ປະກອບມີ X ພາກ, 5 ໝວດ ແລະ 89 ມາດຕາ ໃນນັ້ນ ປັບປຸງ 64 ມາດຕາ, ເພີ່ມໃໝ່ 21 ມາດຕາ ແລະ ຮັກສາເດີມ 4 ມາດຕາ ຄາດຄະເນຜົນໄດ້ຮັບຈາກການປັບປຸງຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານອັກຄີໄພ
ທ່ານຍົກໃຫ້ເຫັນຕື່ມວ່າ: ເມື່ອກົດໝາຍສະບັບນີ້ຖືກຮັບຮອງ ແລະ ປະກາດໃຊ້ແລ້ວ ຄາດຄະເນຜົນໄດ້ຮັບດັ່ງນີ້: ການຄຸ້ມຄອງ, ກວດກາ, ສະກັດກັ້ນ ແລະ ແກ້ໄຂ ຂອດຊ່ອງວ່າງ, ຂໍ້ຄົງຄ້າງ ໃນການເຄື່ອນໄຫວປະຕິບັດໜ້າທີ່ວຽກງານ ແລະ ການຈັດຕັ້ງປະຕິບັດກົດໝາຍ ກໍຄື ສະພາບປະກົດການຫຍໍ້ທໍ້ໃນສັງຄົມ ຊຶ່ງພົວພັນເຖິງວຽກງານສະກັດກັ້ນ ແລະ ຕ້ານອັກຄີໄພໃຫ້ຫັນເຂົ້າສູ່ລະບົບກົດໝາຍຢ່າງເຂັ້ມງວດ ເທື່ອລະກ້າວ; ເປັນມາດຕະ ການທາງດ້ານກົດໝາຍເພື່ອເຮັດໃຫ້ບຸກຄົນ, ນິຕິບຸກຄົນ ແລະ ການຈັດຕັ້ງ ທັງພາກລັດ ແລະ ເອກະຊົນ ມີສ່ວນຮ່ວມ ແລະ ໃຫ້ການຮ່ວມມື ໃນການຈັດຕັ້ງເຄື່ອນໄຫວວຽກງານສະກັດກັ້ນ ແລະ ຕ້ານອັກຄີໄພ; ເຮັດໃຫ້ສັງຄົມມີຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ອື່ນໆ.
