ທ່ານ ດາວເພັດ ສີຣິແສງ ຫົວໜ້າຄູຝຶກສະໂມສອນ ແລັບດັອກ ໃຫ້ຮູ້ວ່າ: ການແຂ່ງຂັນດອກປີກໄກ່ທົ່ວປະເທດ ຄັ້ງທີ 23, ທາງສະໂມສອນຂອງຕົນຈະສົ່ງນັກກິລາເຂົ້າຮ່ວມຫລາຍ ກວ່າຄັ້ງຜ່ານມາ ລວມ 60 ກວ່າຄົນ, ຍິງ 10 ຄົນ ຮ່ວມຊິງໄຊໃນ 13 ລາຍການ, ລາຍການທີ່ສົ່ງເຂົ້າຮ່ວມໃໝ່ແມ່ນປະເພດອາຍຸ 35 ປີຂຶ້ນໄປ ໂດຍການເຂົ້າຮ່ວມຄັ້ງນີ້ ຈະສູ້ຊົນຍາດໃຫ້ໄດ້ຢ່າງຕໍ່າ 8 ຫລຽນຄຳ ເພື່ອຫວັງຄອງແຊ້ມສະໄໝທີ 2 ຕິດຕໍ່ກັນ ໂດຍຕັ້ງຄວາມຫວັງຫລຽນຄຳ ແມ່ນປະເພດທົ່ວໄປ.
ນັກກິລາຂອງສະໂມສອນ ແລັບດອກ ສ່ວນໃຫຍ່ແມ່ນນັກກິລາທີມຊາດ ແລະ ມີຜົນງານພົ້ນເດັ່ນຫລາຍລາຍການໃນລະດັບປະເທດ ຈຶ່ງເປັນກຳລັງທີ່ສຳຄັນທີ່ຈະຊ່ວຍໃຫ້ທີມປະສົບຜົນສຳເລັດຕາມເປົ້າໝາຍ.
ທ່ານ ດາວເພັດ ສີຣິແສງ ໃຫ້ຮູ້ຕື່ມວ່າ: ໃນການປ້ອງກັນແຊ້ມຄັ້ງນີ້ບໍ່ງ່າຍ ເພາະຄູ່ແຂ່ງຫລາຍພາກສ່ວນມີນັກກິລາທີ່ດີມີຄຸນນະພາບຫລາຍຄົນ ແລະ. ດັ່ງນັ້ນ ຈຶ່ງຮຽກຮ້ອງໃຫ້ນັກກິລາທຸກຄົນເອົາໃຈໃສ່ຝຶກຊ້ອມໃຫ້ໜັກກວ່າເກົ່າ ເຊື່ອໝັ້ນວ່າ: ນັກກິລາຈະເຮັດໄດ້ຕາມຄາດໝາຍ.
ຂະນະທີ່ ນັກກິລາຄົນສໍາຄັນຂອງທີມ ລ້ວນແລ້ວແຕ່ມີຄວາມພ້ອມ ຫວັງຈະສ້າງຜົນງານໃຫ້ດີກວ່າຜ່ານມາ ແລະ ຈະຍາດແຊ້ມມາໃຫ້ໄດ້.
ສຳພາດ: ໄຊມາລາ ຣາຊະພົນ ນັກກິລາສະໂມສອນ ແລັບດອກ ລົງແຂ່ງ U15 ດ່ຽວຍິງ, U17 ຄູ່ຍິງ
ທ່ານ ດາວເພັດ ສີຣິແສງ ຫົວໜ້າຄູຝຶກສະໂມສອນ ແລັບດັອກ ໃຫ້ຮູ້ຕື່ມວ່າ: ຫລັງຈົບລາຍການນີ້ ສະໂມສອນມີແຜນສົ່ງນັກກິລາເຂົ້າຮ່ວມກິລານັກຮຽນທົ່ວປະເທດ ທີ່ແຂວງສາລະວັນ ໃນທ້າຍປີນີ້ ລວມທັງ ສົ່ງເຂົ້າຮ່ວມເອຊຽນອິນດໍຣ ແອນ ມາຊ້ຽວອ໊າດ ທ້າຍປີເຊັ່ນກັນ, ປັດຈຸບັນ ພາຍໃນສະໂມສອນມີນັກກິລາມາຮ່ວມຝຶກຊ້ອມນຳ 80 ກວ່າຄົນດ ມີຄະນະຄູຝຶກ ແລະ ທີມງານປະມານ 15 ຄົນ ທັງຮັບຜິດ ຊອບດ້ານວິທະຍາສາດການກິລາ, ໂພສະນາການ ແລະ ການພັດທະນານັກກິລາໃຫ້ເປັນມືອາຊີບ ຕາມແນວທາງຂອງສະໂມສອນ.
ການແຂ່ງຂັນດອກປີກໄກ່ທົ່ວປະເທດ ຄັ້ງທີ 23 ນີ້ ກຳນົດນັກກິລາ 1 ຄົນ ສາ ມາດລົງແຂ່ງຂັນໄດ້ບໍ່ເກີນ 3 ລາຍການ, ລວມແລ້ວມີການຊິງໄຊທັງໝົດ 17 ລາຍ ການ, ຮຸ່ນເຍົາວະຊົນ 10 ລາຍການ ແລະ ທົ່ວໄປ 7 ລາຍການ, ມີນັກກິລາເຂົ້າຮ່ວມຫລາຍກວ່າ 100 ຄົນ ຈາກສະໂມສອນຕ່າງໆໃນທົ່ວປະເທດ ແຂ່ງຂັນລະຫວ່າງວັນທີ 22-25 ສິງຫານີ້ ທີ່ເດີ່ນດອກປີກໄກ່ເສດຖາ ສູນກິລາໃນຮົ່ມບຶງຂະຫຍອງ, ນະຄອນ ຫລວງວຽງຈັນ. ຜູ້ໃດສົນໃຈສາມາດເຂົ້າຮຮ່ວມຊົມຮ່ວມເຊຍ ແລະ ເປັນກຳລັງໃຈໃຫ້ນັກກິລາ ເຂົ້າຊົມໂດຍບໍ່ເສຍຄ່າ.
