ໃນລະຫວ່າງວັນທີ 4-20 ເດືອນກຸມພາ ປີ 2022, ສປ ຈີນ ໄດ້ຮັບກຽດເປັນເຈົ້າພາບຈັດງານກິລາໂອແລັມປິກລະ ດູໜາວ ຄັ້ງທີ 24 ມີແຂ່ງຂັນ 7 ປະເພດກິລາ ແລະ ງານກິ ລາໂອແລັມປິກຄົນພິການລະດູໜາວປັກກິ່ງ 2022 ໃນລະ ຫວ່າງວັນທີ 3-13 ມີນາ 2022, ມີແຂ່ງຂັນ 6 ປະເພດກິລາ ເຊີ່ງທັງສອງງານຈັດຂຶ້ນທີ່ນະຄອນຫລວງປັກກິ່ ເຮັດໃຫ້ລັດຖະບານຈີນຕ້ອງໄດ້ກໍ່ສ້າງ ແລະ ປັບປຸງສະໜາມແຂ່ງ ຂັນກິລາໃໝ່ຫລາຍແຫ່ງເພື່ອຮອງຮັບການແຂ່ງຂັນກິລາດັ່ງກ່າວ.
ສະໜາມແຂ່ງຂັນກິລາສະເກັດນໍ້າກ້ອນ ຫລື National Speed Skating Oval (The Ice Ribbon) ເຊີ່ງເປັນສະ ໜາມກິລາພຽງແຫ່ງດຽວໃນງານກິລາໂອແລັມປິກລະດູໜາວປັກກິ່ງ 2022 ທີ່ຖືກສ້າງຂຶ້ນໃໝ່ ມີທີ່ຕັ້ງຢູ່ໃກ້ກັບສະ ໜາມກິລາຮັງນົກໃນໃຈກາງນະຄອນຫລວງປັກກິ່ງ ເຊີ່ງເປັນສະໜາມທີ່ໃຊ້ເຂົ້າໃນພິທີເປີດ-ປິດ ແລະ ແຂ່ງຂັນກິລາໂອແລັມປິກປັກກິ່ງ 2008 ທີ່ ສປ ຈີນ ໄດ້ຮັບກຽດເປັນເຈົ້າພາບມາແລ້ວ.
ສະໜາມກິລາດັ່ງກ່າວ, ເລີ່ມກໍ່ສ້າງມາແຕ່ເດືອນເມສາປີ 2017 ແລະ ສໍາເລັດສົມບູນໃນທ້າຍປີ 2021 ເຊີ່ງເປັນສະ ໜາມທີ່ຜ່ານການອອກຈໍາລອງແບບດິຈິຕອລຫລາຍພັນລາຍການ ແລະ ການກວດສອບທົດລອງຫລາຍຄັ້ງໃນໄລ ຍະເວລາກ່ອນການກໍ່ສ້າງ ເຊີ່ງມີຮູບຊົງຂອງອາຄານທີ່ຖືກອອກແບບມາເປັນພິເສດດ້ວຍເຕັກໂນໂລຊີທີ່ທັນສະໄໝທີ່ສຸດ ທັງເຕັກນິກການເກັບພະລັງງານຮູບແບບໃໝ່ ແລະ ລະບົບຫລຸດການປ່ອຍກາກບອນດ້ວຍເຕັກໂນໂລຊີເຮັດນໍ້າກ້ອນ ໂດຍນໍາໃຊ້ກາສກາກບອນໄດອົກຊິດເປັນສານເຮັດຄວາມເຢັນ ເຊີ່ງຖືເປັນການນໍາໃຊ້ເຕັກໂນໂລຊີທໍາອິດໃນປະຫວັດສາດຂອງໂອແລັມປິກ, ພ້ອມນີ້ ຍັງນໍາເອົາຄວາມຮ້ອນທີ່ໄດ້ຈາກການເຮັດນໍ້າກ້ອນມານໍາໃຊ້ການເຮັດຄວາມຮ້ອນໃນຫ້ອງອາບນໍ້າຂອງນັກກິລາ, ການລະລາຍນໍ້າກ້ອນໃນຖັງສໍາລັບລະລາຍ ແລະ ການຮັກສາຜີວໜ້າສະ ໜາມທີ່ເປັນນໍ້າກ້ອນ ເຊີ່ງເຕັກໂນໂລຊີນີ້ສາມາດຫລຸດການໃຊ້ໄຟຟ້າໄດ້ເຖີງປີລະ 2 ລ້ານກິໂລວັດຊົ່ວໂມງ.
ນອກຈາກນີ້, ພາຍໃນສະໜາມແຂ່ງຂັນຍັງນໍາເອົາລະບົບປັນຍາປະດິດ (AI) ມານໍາໃຊ້ເຂົ້າໃນລະບົບເຮັດນໍ້າກ້ອນ, ການຄວບຄຸມສະພາບໃນອາຄານ ແລະ ການຮັກສາພະລັງ ງານ ເຮັດໃຫ້ສາມາດຄວບຄຸມອຸນຫະພູມ, ຄວາມໜາຂອງນໍ້າກ້ອນ ແລະ ຄວາມໝັ້ນຄົງຂອງຜີວໜ້າສະໜາມໄດ້, ທັງ ເຮັດໃຫ້ສະໜາມດີຕໍ່ນັກກິລາ ໂດຍອຸນຫະພູມທີ່ຄວບຄຸມໄວ້ຢູ່ທີ່ 0,5 ອົງສາ ເຮັດໃຫ້ນັກກິລາສາມາດສະແດງຄວາມສາມາດຂອງຕົນອອກມາໃນການແຂ່ງຂັນໄດ້ໃນລະດັບສູງ ສຸດ.
ສະໜາມແຂ່ງຂັນກິລາແຫ່ງນີ້ ສາມາດບັນຈຸຜູ້ຊົມໄດ້ 12.000 ຄົນ. ພາຍໃນສະໜາມສໍາລັບຜູ້ຊົມແມ່ນຮັກສາອຸນຫະພູມຢູ່ທີ່ 16 ອົງສາ ເຮັດໃຫ້ຜູ້ຊົມສາມາດນັ່ງຊົມການແຂ່ງຂັນໄດ້ຢ່າງສະບາຍ ເພາະບໍ່ໜາວ ຫລື ຮ້ອນເກີນໄປ.
ພາຍຫລັງສໍາເລັດການແຂ່ງກິລາໂອແລັມປິກລະດູໜາວປັກກິ່ງ 2022, ຄະນະຮັບຜິດຊອບທີ່ກ່ຽວຂ້ອງຂອງຈີນ ໄດ້ອະນຸຍາດໃຫ້ມວນຊົນທົ່ວໄປ ກໍຄື ນັກທ່ອງທ່ຽວສາ ມາດເຂົ້າຊົມ ແລະ ນໍາໃຊ້ການບໍລິການຂອງສະໜາມກິລາແຫ່ງນີ້, ລວມອີກຫລາຍສະໜາມທີ່ນໍາໃຊ້ເຂົ້າໃນການແຂ່ງ ຂັນກິລາໂອແລັມປິກຄັ້ງນີ້ ເພື່ອອອກກໍາລັງກາຍ, ການເລີ່ມຕົ້ນຮຽນກິລາແຕ່ລະປະເພດທີ່ກ່ຽວຂ້ອງທີ່ຕົນສົນ ໃຈ, ລວມເຖີງໄປຖ່າຍຮູບເກັບໄວ້ເປັນທີ່ລະນຶກ.
ຢ່າງໃດກໍຕາມ, ເນື່ອງຈາກປັດຈຸບັນ ທາງການຈີນຍັງສືບຕໍ່ເຂັ້ມງວດປ້ອງກັນພະຍາດໂຄວິດ-19 ຈິ່ງບໍ່ທັນເປີດຮັບນັກທ່ອງທ່ຽວຕ່າງປະເທດເຂົ້າປະເທດເທື່ອ ເຮັດໃຫ້ຜູ້ທີ່ເຂົ້າໄປທ່ຽວຊົມ ກໍຄື ໃຊ້ບໍລິການຢູ່ສະໜາມກິລາເຫລົ່ານີ້ຍັງແມ່ນມວນຊົນ ແລະ ນັກທ່ອງທ່ຽວທີ່ອາໃສຢູ່ນະຄອນ ຫລວງປັກກິ່ງເປັນຕົ້ນຕໍ, ແຕ່ຄິດວ່າໃນອະນາຄົດຖ້າຫາກການລະບາດຂອງພະຍາດດັ່ງກ່າວຢຸດຕິລົງ ແລະ ທາງການຈີນເປີດຮັບນັກທ່ອງທ່ຽວຕ່າງປະເທດ, ສະໜາມແຂ່ງຂັນກິລາສະເກັດນໍ້າກ້ອນ ກໍຄື ສະໜາມອື່ນໆ ທີ່ນໍາໃຊ້ເຂົ້າໃນການແຂ່ງກິລາໂອແລັມປິກລະດູໜາວປັກກິ່ງ 2022 ຈະເປັນອີກສະຖານທີ່ທ່ອງທ່ຽວທີ່ສາມາດດຶງດູດນັກທ່ອງ ທ່ຽວຕ່າງປະເທດໄດ້ຈໍານວນບໍ່ໜ້ອຍໃນແຕ່ລະປີ.
Cr: BT
