ສັດຕູພືດລະບາດ ທຳລາຍເຂົ້ານາ ປະຊາຊົນຢູ່ເມືອງປາກລາຍ

ການລະບາດຂອງແມງໄມ້ສັດຕູພືດ ໂດຍສະເພາະ ເພ້ຍຈັກຈັ່ນ ແລະ ແມງບົ່ວ ທຳລາຍເຂົ້ານາ ຂອງປະຊາຊົນຢູ່ ເມືອງປາກລາຍ ໃນນີ້, ມີປະຊາຊົນ 5 ບ້ານ, 56 ຄອບຄົວ ໄດ້ຮັບຜົນກະທົບ. ມາໃນວັນທີ 6 ກັນຍາ 2023 ນີ້, ທ່ານ ກົມ ບຸນຍາສິດ ຫົວໜ້າກົມປູກຝັງ ກະຊວງກະສິກຳ ແລະ ປ່າໄມ້ ແລະ ທ່ານ ບຸນຊູ ຫົວໜ້າສູນປ້ອງ ກັນພືດ ກະຊວງກະສິກຳ ແລະ ປ່າໄມ້, ພ້ອມດ້ວຍທີມງານຫ້ອງການກະສິກຳ ແລະ ປ່າໄມ້ເມືອງປາກລາຍ ໄດ້ລົງຕິດ ຕາມກວດກາເບິ່ງຜົນກະທົບເພ້ຍຈັກຈັ່ນ ແລະ ແມງບົ່ວ ທຳລາຍເຂົ້ານາ ຂອງປະຊາຊົນ ຢູ່ບ້ານກາງ ເມືອງປາກລາຍ ໂດຍມີ ທ່ານ ຄຳຝັ້ນ ວົງສະຫັວນ ຮອງເຈົ້າເມືອງປາກລາຍ ໃຫ້ການຕ້ອນຮັບ ແລະ ຮ່ວມລົງພື້ນທີ່ໄດ້ຮັບຜົນກະທົບ.

ໂອກາດນີ້, ວິຊາການໜ່ວຍງານປູກຝັງ ໄດ້ລາຍງານສະພາບການລະບາດ ແລະ ວິທີປ້ອງກັນ ແລະ ທຳລາຍສັດຕູພືດໃນເບື້ອງຕົ້ນວ່າ: ເພ້ຍຈັກຈັ່ນ ແລະ ແມງບົ່ວ ໄດ້ທຳລາຍເນື້ອທີ່ນາຂອງປະຊາ ຊົນ 5 ບ້ານ, ມີທັງໝົດ 56 ຄອບຄົວ, ເນື້ອທີ່ຖືກຜົນກະທົບ 51,72 ເຮັກຕາ. ໃນນີ້, ເສຍຫາຍ 100% ມີ 16 ຄອບຄົວ, ເນື້ອທີ່ 9,58 ເຮັກຕາ, ເສຍຫາຍໃນລະດັບ 30-50% ມີ 40 ຄອບຄົວ, ເນື້ອທີ່ 13,31 ເຮັກຕາ. ເສຍຫາຍຈາກເພ້ຍຈັກຈັ່ນ: ມີ 4 ບ້ານ, 49 ຄອບຄົວ, ເນື້ອທີ່ຖືກຜົນກະທົບ 45,29 ເຮັກຕາ, ເສຍຫາຍ 100% ມີ 16 ຄອບຄົວ, ເນື້ອທີ່ 9,58 ເຮັກຕາ, ເສຍຫາຍ 30-50% ມີ 33 ຄອບຄົວ, ເນື້ອທີ່ 12,03 ເຮັກຕາ.

ສຳລັບ ບ້ານກາງ: ມີ 20 ຄອບຄົວ, ເນື້ອທີ່ຖືກຜົນກະທົບ 21,85 ເຮັກຕາ, ເສຍຫາຍ 100% ມີ 6 ຄອບຄົວ, ເສຍຫາຍ 50% ມີ 14 ຄອບຄົວ, ເນື້ອທີ່ 7,13 ເຮັກຕາ; ບ້ານນາຕ້າ: ມີ 24 ຄອບຄົວ, ເນື້ອທີ່ຖືກຜົນກະທົບ 15,84 ເຮັກຕາ, ເສຍຫາຍ 100% ມີ 10 ຄອບຄົວ, ເສຍຫາຍ 40% ມີ 14 ຄອບຄົວ, ເນື້ອທີ່ 3,6 ເຮັກຕາ; ບ້ານນາໂພ: ມີ 3 ຄອບຄົວ, ເນື້ອທີ່ຖືກຜົນກະທົບ 5,8 ເຮັກຕາ, ເສຍຫາຍ 10% ເທົ່າກັບ 0,5 ເຮັກຕາ; ບ້ານເມືອງປາ: ມີ 2 ຄອບ ຄົວ, ເນື້ອທີ່ຖືກຜົນກະທົບ 1,8ເຮັກຕາ, ເສຍຫາຍ 40% ເທົ່າກັບ 0,72 ເຮັກຕາ.

ໃນໂອກາດດຽວກັນ, ທ່ານ ກົມ ບຸນຍາສິດ ຫົວໜ້າກົມປູກຝັງ ກະຊວງກະສິກຳ ແລະ ປ່າໄມ້ ໄດ້ຊີ້ນຳໃຫ້ພະນັກງານວິຊາການທີ່ໄດ້ລົງຕິດຕາມ ຈົ່ງໄດ້ນຳພາປະຊາຊົນຮີບຮ້ອນປັບປຸງພື້ນທີ່ນາທີ່ເສຍຫາຍ, ນຳເອົາແນວພັນ ທີ່ກະຊວງກະສິກຳ ແລະ ປ່າໄມ້ ມາຊ່ວຍຄັ້ງນີ້ ແຂກຍາຍໃຫ້ປະ ຊາຊົນປູກຄືຮ ໃຫ້ທວງທັນກັບລະດູການ, ສ່ວນພື້ນທີ່ນາ ທີ່ຍັງເຫລືອຈາກສັດຕູພືດທຳລາຍ ແມ່ນຮີບຮ້ອນປ້ອງກັນ ແລະ ບົວລະບັດຮັກສາ ໃຫ້ໄດ້ເກັບກ່ຽວຜົນຜະລິດ.

ຈາກນັ້ນ, ກໍໄດ້ມອບບັ້ງສີດ ແລະ ຢາປາບສັດຕູພືດ ເຊິ່ງປະກອບມີ: ຈັກສີດເປ້ຫລັງ 1 ບັ້ງ, ບັ້ງສີດໂຍກດ້ວຍມື 15 ບັ້ງ, ຢ່າຊະນິດ Emidaclopria ຈຳນວນ 14 ກ່ອງ, ຢາຊະນິດ lmamectin bemzoate ຈຳນວນ 3 ຖັງ, ຊຸດປ້ອງກັນ 12 ຊຸດ, ເກີບໂບກ 10 ຄູ່, ລວມມູນຄ່າ 13 ລ້ານກວ່າກີບ ແລະ ໃຫ້ພະແນກກະສິກຳ ແລະ ປ່າໄມ້ແຂວງ ເພື່ອນໍາໄປມອບຕໍ່ໃຫ້ ຫ້ອງການກະສິກຳແລະປ່າໄມ້ເມືອງປາກລາຍ ນຳໄປໝູນໃຊ້ເຂົ້າໃນວຽກງານກະສິກຳ ແລະ ໄດ້ມອບແນວພັນເຂົ້າ 400 ກິໂລ ໃຫ້ ຄອບຄົວທີ່ໄດ້ຮັບຜົນກະທົບ ເພື່ອນຳໄປປູກຄືນ ໃຫ້ທ່ວງທັນກັບລະດູການ

ຂ່າວ-ພາບ:ດາວປະດິດ ເສດຖາລາດ