ເນື່ອງໃນໂອກາດສະເຫຼີມສະຫຼອງສອງວັນປະຫວັດສາດລາວ-ຫວຽດນາມ ຄື: ວັນສ້າງຕັ້ງສາຍພົວພັນການທູດລາວ- ຫວຽດນາມຄົບຮອບ 62 ປີ ວັນທີ 5 ກັນຍາ 1962-2024 ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ- ຫວຽດນາມ ຄົບຮອບ 47 ປີ 18 ກໍລະກົດ 1977 -2024 ທ່ານ ພົຕ ປອ ສຸວັນນີ ສີສຸພາບມີໄຊ ຫົວໜ້າກົມໃຫຍ່ການ ເມືອງ ປກສ ໄດ້ຍົກໃຫ້ເຫັນເຖິງສາຍພົວພັນພິເສດລາວ- ຫວຽດນາມ, ຫວຽດນາມ-ລາວ ທີ່ເວລາໃດພັກ, ລັດຖະບານ ແລະ ປະຊາຊົນສອງຊາດ ກໍ່ໃຫ້ຄວາມສໍາຄັນເຄົາລົບນັບຖື, ປຽບ ເໝືອນຊັບສົມບັດອັນລໍ້າຄ່າ, ເປັນປັດໃຈກໍາລັງແຮງ ຮັບປະກັນໄຊຊະນະຂອງການປະຕິວັດຂອງແຕ່ລະປະເທດ.
ພ້ອມນີ້, ທ່ານຍັງໄດ້ຍົກໃຫ້ເຫັນຄວາມໝາຍຄວາມສໍາຄັນຂອງການພົວພັນສາມັກຄີພິເສດ ແລະ ການຮ່ວມມືໃນການກໍ່ສ້າງກໍາລັງ ລະຫວ່າງກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ. ພ້ອມທັງສະແດງທັດສະນະທີ່ມີຄວາມໝາຍສໍາຄັນໃນນາມທີ່ທ່ານເປັນຜູ້ໜຶ່ງທີ່ເປັນນັກສຶກສາຮຽນຈົບມາຈາກ ສສ ຫວຽດນາມ.
ໂດຍພາຍໃຕ້ການນໍາພາຂອງກົມການເມືອງສູນກາງພັກປະ ຊາຊົນປະຕິວັດລາວ ແລະ ກົມການເມືອງສູນກາງພັກຄອມມູນິດຫວຽດນາມ, ການຮ່ວມມືລະຫວ່າງກະຊວງປ້ອງກັນຄວາມສະ ຫງົບແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບແຫ່ງ ສສ ຫວຽດນາມນັບມື້ໄດ້ຮັບການປັບປຸງ, ເສີມຂະຫຍາຍດ້ວຍໝາກຜົນສູງ, ກາຍເປັນຕົວແບບສາຍພົວພັນທີ່ງົດງາມຂອງກໍາ ລັງປະກອບອາວຸດສອງຊາດລາວ-ຫວຽດນາມ.
ການພົວພັນຮ່ວມມືຂອງກະຊວງປ້ອງກັນຄວາມສະຫງົບລາວ ແລະ ກະຊວງປ້ອງກັນຄວາມສະຫງົບຫວຽດນາມໄດ້ກວມເອົາສາຍພົວພັນມິດຕະພາບ, ການຮ່ວມມືຮອບດ້ານ ແລະ ຄວາມສາມັກຄີພິເສດອັນເປັນມູນເຊື້ອມາ ຕັ້ງແຕ່ດົນນານ. ການພົວພັນຂອງສອງກະຊວງບໍ່ພຽງແຕ່ເກີດມາຈາກກົກເຄົ້າແຫ່ງສາຍພົວພັນທາງທຳມະຊາດ, ພູມສາດ, ເສດຖະກິດພື້ນຖານສັງຄົມ ແລະ ປະຫວັດ ສາດອັນຍາວນານເທົ່ານັ້ນແຕ່ມັນຍັງແມ່ນຄວາມຕື່ນຕົວແຕ່ຕໍ່າຫາສູງ, ແຕ່ນ້ອຍຫາໃຫຍ່ບົນພື້ນຖານຄວາມຮຽກຮ້ອງຕ້ອງການພາວະວິໄສ, ຜົນປະໂຫຍດ ແລະ ຄວາມເປັນເອກະພາບທາງດ້ານຈຸດໝາຍໃນປະຫວັດສາດແຫ່ງການຕໍ່ສູ້ກູ້ຊາດຕ້ານຈັກກະພັດຕ່າງດ້າວ ໂດຍສະເພາະນັບແຕ່ມີພັກຄອມ ມູນິດອິນດູຈີນນໍາພາໃນເມື່ອກ່ອນ ແລະ ມີພັກປະຊາຊົນລາວ ແລະ ພັກຄອມມູນິດຫວຽດນາມຜູ້ສືບທອດພາລະກິດໃນປັດຈຸບັນ. ມູນເຊື້ອ, ການພົວພັນສາມັກຄີພິເສດ, ການຮ່ວມ ມືຮອບດ້ານລະຫວ່າງກະຊວງປ້ອງກັນຄວາມສະຫງົບລາວ ແລະ ກະຊວງປ້ອງກັນຄວາມສະຫງົບຫວຽດນາມໄດ້ນັບມື້ເລິກ ເຊິ່ງ, ແໜ້ນແຟ້ນ ແລະ ມີຊີວິດຊີວາ, ກາຍເປັນແບບຢ່າງການພົວພັນທີ່ຫາຍາກໃນໂລກ.
ທີ່ມາ: ຄວາມສະຫງົບລາວ
