ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສາທາລະນະສຸກແຂວງຫລວງນໍ້າທາ ສືບຕໍ່ຄວບຄຸມການລະບາດຂອງພະຍາດໂຄວິດ19

ທ່ານ ດຣ ຄໍາຈັນ ອິນທອງໄຊ ຫົວໜ້າພະແນກສາທາລະນະສຸກແຂວງ, ຮອງປະທານຄະນະສະເພາະກິດຄວບຄຸມໂຄວິດ19 ແຂວງຫລວງນໍ້ທາ ໃຫ້ສໍາພາດຕໍ່ສື່ມວນຊົນ ຕອນບ່າຍວັນທີ 16 ມິຖຸນານີ້ວ່າ: ນັບແຕ່ໂຄວິດ-19 ລະບາດເຂົ້າມາ ສປປ ລາວ, ພະແນກສາທາລະນະສຸກແຂວງຫຼວງນໍ້າທາ, ໄດ້ແຕ່ງຕັ້ງຄະນະສະເພາະກິດສູນສຸກເສີນຂຶ້ນ ໂດຍໄດ້ເວນຍາມຕະຫຼອດ 24 ຊົ່ວໂມງ ເພື່ອຮັບປະກັນໃຫ້ການຊ່ວຍເຫລືອຜູ້ທີ່ໄດ້ຮັບຜົນກະທົບທັນເວລາ, ໂດຍໄດ້ກະກຽມສະຖານທີ່ບໍລິການ ຢູ່ 3 ແຫ່ງຄື: ໂຮງໝໍແຂວງ, ໂຮງໝໍເສນາຮັກທະຫານແຂວງ ແລະໂຮງໝໍຕໍາຫຼວດ. ໂດຍໂຮງໝໍທັງສາມແຫ່ງໄດ້ກະກຽມສະຖານທີ່ແຍກປ່ຽວ,  ພ້ອມດ້ວຍລົດຂົນສົ່ງ.

ຂະນະດຽວກັນ ພະແນກສາທາລະນະສຸກແຂວງ ໄດ້ປະຕິບັດຕາມຄໍາສັ່ງ ແລະແຈ້ງການຂອງລັດຖະບານທີ່ອອກມາແຕ່ລະໄລຍະຢ່າງເຂັ້ມງວດ ໂດຍໄດ້ລົງໂຄສະນາເຜີຍແຜ່ວຽກງານສຸຂະສຶກສາ ວຽກງານປ້ອງກັນ ແລະ ຄວບຄຸມພະຍາດ ໃຫ້ປະຊາຊົນທຸກຄົນເຂົ້າໃຈເຖິງຄວາມຮ້າຍແຮງຂອງໂຄວິດ-19. ແລະຮູ້ວິທີປ້ອງກັນຕົນເອັງ.

ດຣ ພູວຽງ ດວງດາລາ ຮອງຜູ້ອໍານວຍການໂຮງຫມໍແຂວງຫລວງນໍ້າທາ ໃຫ້ຮູ້ວ່າ: ໃນໄລຍະທີ່ໂຄວິດ 19 ລະບາດ, ໂຮງໝໍແຂວງຫລວງນໍ້າທາ ໄດ້ເຂັ້ມງວດປະຕິບັດຕາມຄໍາສັ່ງຂອງລັດຖະບານ ໂດຍໄດ້ກະກຽມອຸປະກອນ , ຈັດທີມແພດຕັ້ງຈຸດຄັດກອງວັດແທກອຸນຫະພູມທຸກຄົນກ່ອນຈະເຂົ້າມາໃນໂຮງໝໍ  ຖ້າພົບກໍລະນີສົງໃສເຂົ້າກັບນິຍາມແມ່ນໄດ້ແຍກຈາກຄົນເຈັບທົ່ວໄປ ໄວ້ຢູ່ຫ້ອງແຍກປ່ຽວ. ແລະເກັບຕົວຢ່າງ ສົ່ງໄປກວດຫ້ອງວິເຄາະຂອງໂຮງໝໍ ແລະສົ່ງໄປກວດວິເຄາະຢູ່ສູນວິເຄາະລະບາດວິທະຍາ ທີ່ວຽງຈັນ, ເພື່ອເປັນການຢັ້ງຢືນຜົນກວດວ່າເປັນພະຍາດໂຄວິດ-19ຫລືບໍ່, ຖ້າບໍ່ພົບເຊື້ອ ແມ່ນເອົາໄປໄວ້ສູນກັກກັນ 14 ວັນ. ສະເພາະການກວດວິເຄາະຫາເຊື້ອ ຢູ່ໂຮງໝໍມີ 52 ກໍລະນີ, ໃນນັ້ນ, 11 ກໍລະນີເປັນຄົນຈີນ.

 

ດຣ ພູວຽງ ດວງດາລາ ຮອງຜູ້ອໍານວຍການໂຮງຫມໍ ແຂວງຫລວງນໍ້າທາ ໃຫ້ຮູ້ອີກວ່າ: ຜ່ານມາໄດ້ແລກປ່ຽນບົດຮຽນການປິ່ນປົວ ແລະກວດວິເຄາະຫາເຊື້ອ ກັບທິມແພດຂອງໂຮງໝໍເມືອຫຼາ ສປ ຈີນ ແລະໄດ້ຮັບການຊ່ວຍເຫຼືອຈາກຫລາຍພາກສ່ວນ ເປັນຕົ້ນອົງການອະນາໄມໂລກ ໄດ້ໃຫ້ການຊ່ວຍເຫລືອຊຸດປ້ອງກັນໂຕເອງ, ຜ້າອັດປາກອັດດັງ, ເຈວລ້າງມື ແລະອື່ນໆ ນອກຈາກນີ້, ອົງການ UNICEF ຍັງໄດ້ໃຫ້ ການຊ່ວຍເຫຼືອດ້ານການໂຄສະນາແຜ່ນພັບ ໂດຍໄດ້ແຈກຢາຍໃຫ້ໂຮງໝໍເມືອງຕ່າງໆພາຍໃນແຂວງຢ່າງທົ່ວເຖິງ .

ທ່ານ ພູຂົງ ແກ້ວກາງເພັງ ຫົວໜ້າສູນກັກກັນບໍລິເວນ ແຂວງຫຼວງນໍ້າທາໃຫ້ຮູ້ວ່າ: ນັບແຕ່ວັນທີ 21 ເມສາ 2020 ເປັນຕົ້ນມາ ໄດ້ນໍາແຮງງານລາວທີ່ເດີນທາງກັບຈາກຕ່າງປະເທດມາກັກກັນຢູ່ສູນທັງໝົດ 201 ຄົນ, ຍິງ 129 ຄົນ, ໃນນັ້ນມີເດັກ 7 ຄົນ. ສ່ວນຫຼາຍແມ່ນມາຈາກ ສປ ຈີນ, ໄທ, ມຽນມາ ແລະຈາກຕ່າງແຂວງຈໍານວນໜຶ່ງ ປະຈຸບັນມີຜູ້ກັກກັນຢູ່ສູນ 48 ຄົນ