ສານປະຊາຊົນສູງສຸດ ແລະ ອົງການກວດກາແຫ່ງລັດເຊັນບົດ ບັນທຶກການປະສານງານ

ສານປະຊາຊົນສູງສຸດ ແລະ ອົງການກວດກາແຫ່ງລັດ ເຫັນດີເປັນເອກະພາບສ້າງບົດບັນທຶກປະສານງານຮ່ວມກັນ ໂດຍໄດ້ຈັດພິທີເຊັນບົດບັນທຶກດັ່ງກ່າວ ໃນວັນທີ 11 ມີນາ 2024 ທີ່ສານປະຊາຊົນສູງສຸດ, ຮ່ວມລົງນາມ ລະຫວ່າງ ທ່ານ ວິໄລວັນ ບຸດດາຄຳ ຮອງປະທານອົງການກວດກາແຫ່ງລັດ ແລະ ທ່ານ ອານົງ ຍອຍສາຍຄຳ ຮອງປະທານສານປະຊາຊົນສູງສຸດ, ໂດຍມີ ທ່ານ ຄຳພັນ ພົມມະທັດ, ກຳມະການກົມການເມືອງສູນກາງພັກ, ຄະນະເລຂາ ທິການສູນກາງພັກ, ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງ ຂັ້ນສູນກາງ, ທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານປະຊາ ຊົນສູງສຸດ ພ້ອມດ້ວຍພະນັກງານທີ່ກ່ຽວຂ້ອງທັງສອງຝ່າຍເຂົ້າ ຮ່ວມເປັນສັກຂີພິຍານ.

ການເຊັນບົດບັນທຶກສະບັບນີ້: ລວມມີ 3 ໝວດ ແລະ 11 ມາດຕາ. ຫຼັກການປະສານງານ ມີ:

1. ປະຕິບັດຕາມພາລະບົດບາດ, ໜ້າທີ່ ແລະ ຂອບເຂດສິດ ທີ່ໄດ້ກຳນົດໄວ້ ແລະ ນິຕິກຳໃຕ້ກົດໝາຍ ຂອງສານປະຊາຊົນ ແລະ ອົງການກວດກາລັດ;.

2. ຮັບປະກັນຄວາມເປັນເອກະລາດ ໃນການເຄື່ອນໄຫວວຽກງານວິຊາສະເພາະຂອງສານປະຊາຊົນ ແລະ ອົງການກວດກາລັດ.

3. ສະໜອງຂໍ້ມູນ ແລະ ຫຼັກຖານ ຂອງເປົ້າໝາຍຖືກກວດກາ ທີ່ລະເມີດກົດໝາຍຈາກຜົນກວດກາ.

4. ປະສານສົມທົບ ເພື່ອເຮັດໃຫ້ການເກັບກຳຂໍ້ມູນ ແລະຫຼັກຖານ ໃຫ້ມີຄວາມຖືກຕ້ອງ, ຊັດເຈນ, ຄົບຖ້ວນ, ພາວະວິໄສ ຮັບປະກັນການດຳເນີນຄະດີ ຕໍ່ເປົ້າໝາຍຖືກກວດກາທີ່ລະເມີດກົດໝາຍ ຕາມຜົນຂອງການກວດກາໃຫ້ມີຄວາມຍຸຕິທຳ ແລະ ໂປ່ງໃສ.

5. ມີການປະຊຸມ ປຶກສາຫາລື ສະຫຼຸບລາຍງານ ແລະ ຖອດຖອນບົດຮຽນ ຮ່ວມມກັນເປັນປົກກະຕິ.

ທີ່ມາ: ສານປະຊາຊົນສູງສຸດ ແຫ່ງ ສປປ ລາວ