ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພະແນກສາທາລະນະສຸກແຂວງສາລະວັນ ໄດ້ຈັດພິທີເປີດຂະບວນການຈັດຕັ້ງປະຕິບັດວັນສັກຢາກັນພະຍາດແຫ່ງຊາດ ( ວສຊ ) ໝາກແດງໃຫຍ່, ໝາກແດງນ້ອຍ ໃຫ້ກຸ່ມເປົ້າໝາຍອາຍຸ 9 ເດືອນ ຫາລຸ່ມ 5 ປີຂຶ້ນໃນວັນທີ 17 ພິຶດສະພານີ້ ທີ່ໂຮງຮຽນປະຖົມນາເຫຼັກ ເມືອງສາລະວັນ ໂດຍການເຂົ້າຮ່ວມຂອງທ່ານ ສົມໃຈ ອຸ່ນຈິດ ຮອງເຈົ້າແຂວງສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ ປະທານຄະນະກຳມະການສົ່ງເສີມຄວາມກ້າວໜ້າຂອງແມ່ຍິງ ແລະເດັກນ້ອຍຂັ້ນແຂວງ, ທ່ານ ອາຄົມ ລໍ່າວິຈິດ ຫົວໜ້າພະແນກສາທາລະນະສຸກແຂວງ, ມີຄະນະກຳມະການເພື່ອຄວາມກ້າວໜ້າຂອງແມ່ຍິງ ແລະ ເດັກຂັ້ນແຂວງ-ເມືອງ, ພະນັກງານແພດ-ໝໍ, ຄູ-ອາຈານ, ຜູ້ປົກຄອງພ້ອມດ້ວຍຫຼານນ້ອຍ ອາຍຸລຸ່ມ 5 ປີເຂົ້າຮ່ວມ.
ທ່ານ ສົມໃຈ ອຸ່ນຈິດ ກ່າວວ່າ: ການເປີດຂະບວນການຄັ້ງນີ້ ເພື່ອຄວບຄຸມພະຍາດໝາກແດງໃຫຍ່-ໝາກແດງນ້ອຍ ແນໃສ່ຫັນເອົາວຽກງານສາທາລະນະສຸກລົງສູ່ຮາກຖານ ໃຫ້ກາຍເປັນຂະບວນການຂອງທົ່ວປວງຊົນ ເພື່ອເຮັດໃຫ້ສຸຂະພາບຂອງແມ່ຍິງ ແລະ ເດັກນ້ອຍມີຄວາມປອດໄພຈາກການຕິດພະຍາດ ທີ່ສາມາດກັນໄດ້ດ້ວຍວັກຊິນ. ການສັກຢາ ແລະ ຢອດຢາກັນພະຍາດມີຄວາມສໍາຄັນທີ່ສຸດ ເພາະມັນເປັນການກັນພະຍາດໄວ້ລ່ວງໜ້າທີ່ມີວິທະຍາສາດ ເມື່ອແມ່ຍິງ ແລະ ເດັກນ້ອຍ ຫາກໄດ້ຮັບການສັກວັກຊິນຄົບ ກໍ່ຈະມີຊີວິດທີ່ປອດໄພຈາກບັນດາພະຍາດຮ້າຍແຮງດັ່ງກ່າວ, ການກັນພະຍາດດ້ວຍການສັກວັກຊິນນັ້ນ ຍັງເປັນການລົງທຶນທີ່ປະຢັດ, ລາຄາຖືກ, ຄຸ້ມຄ່າຕໍ່ການລົງທຶນຖ້າທຽບໃສ່ ການປິ່ນປົວເມື່ອພະຍາດເກີດຂຶ້ນ. ຊຶ່ງໄດ້ຖືເອົາການເບິ່ງແຍງສຸຂະພາບຂອງແມ່ ແລະ ເດັກເປັນບຸລິມະສິດແຖວໜ້າ ໂດຍຖືເອົາວຽກສັກຢາ ແລະ ຢອດຢາກັນພະຍາດເປັນແກນ ແລະ ເປັນໃຈກາງເຊື່ອມສານກັບວຽກງານອື່ນໆ ທີ່ກ່ຽວຂ້ອງກັບສຸຂະພາບແມ່ ແລະ ເດັກ. ມາຮອດໄລຍະນີ້ການເກີດກໍລະນີພະຍາດທີ່ສາມາດກັນໄດ້ດ້ວຍວັກຊິນໄດ້ຫຼຸດຜ່ອນລົງຢ່າງຕັ້ງໜ້າ ປະກອບສ່ວນເຮັດໃຫ້ອັດຕາການຕາຍຂອງແມ່ ແລະ ອັດຕາການຕາຍຂອງເດັກລຸ່ມ 5 ປີຫຼຸດລົງເທື່ອລະກ້າວ. ຮຽກຮ້ອງມາຍັງຄະນະພັກ, ອຳນາດການປົກຄອງ, ອົງການຈັດຕັ້ງມະຫາຊົນ, ເອກະຊົນ ແລະ ບັນດາຂະແໜງການ ຍົກສູງຄວາມຮັບຜິດຊອບ ແລະ ປະກອບສ່ວນຢ່າງຕັ້ງໜ້າເພື່ອກະກຽມເຮັດໃຫ້ວັນສັກຢາກັນພະຍາດແຫ່ງຊາດ ໄດ້ຮັບຜົນສຳເລັດຕາມລະດັບຄາດໝາຍ, ຮຽກຮ້ອງໃຫ້ປະຊາຊົນບັນດາເຜົ່າທຸກຖ້ວນໜ້ານຳພາລູກຫຼານຢູ່ໃນເປົ້າໝາຍອາຍຸ 9 ເດືອນ ຫາລຸ່ມ 5 ປີມາສັກວັກຊິນໃນສະຖານທີ່ບໍລິການສາທາລະນະສຸກ ແລະ ນໍາທີມງານແພດທີ່ລົງໄປສັກຢາຢູ່ບ້ານຂອງທ່ານ.
ຂະບວນການດັ່ງກ່າວຈະດຳເນີນໄປເຖິງວັນທີ 31 ພຶດສະພາ 2024 ຈຶ່ງຈະສຳເລັດ, ທັງນີ້ເພື່ອຍົກສູງອັດຕາການສັກຢາກັນພະຍາດ ໃຫ້ບັນລຸຕາມຄາດໝາຍ 95% ຂຶ້ນໄປ ເພື່ອເປັນການສ້າງພູມຄຸ້ມກັນໃຫ້ແກ່ຮ່າງກາຍ ສາມາດປ້ອງກັນການລະບາດຂອງພະຍາດທີ່ສາມາດກັນໄດ້ດ້ວຍວັກຊິນ.
ພາບ-ຂ່າວ: ທິດລານີ ໂຄດໂຍທາ