ສະພາທິດສະດີສູນກາງພັກ, ຄະນະຮັບຜິດຊອບການຄົ້ນຄວ້າແນວຄິດໄກສອນ ພົມວິຫານ, ສະຖາ ບັນການເມືອງ ແລະ ການປົກຄອງແຫ່ງຊາດ ຄະນະໂຄສະນາອົບຮົມສູນກາງພັກ ໄດ້ຈັດກອງປະຊຸມສຳມະນາ ວິທະຍາສາດລະດັບຊາດຂຶ້ນໃນຕອນເຊົ້າ ຂອງວັນທີ 8 ກຸມພາ 2023, ທີ່ສະໂມສອນຄະນະໂຄສະນາອົບຮົມ ສູນກາງພັກ, ພາຍໃຕ້ຫົວຂໍ້: “ຊີວິດ ແລະ ພາລະກິດປະຕິວຫດ ຂອງປະທານ ໄກສອນ ພົມວິຫານ ໄລຍະປີ 1955-1975. ໃຫ້ກຽດເປັນປະທານຊີ້ນຳກອງປະຊຸມ ໂດຍ ສະຫາຍ ຄຳພັນ ເຜີຍຍະວົງ ເລຂາທິການ ສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກ, ຫົວໜ້າຄະນະ ຮັບຜິດຊອບການຄົ້ນຄວ້າແນວຄິດໄກສອນ ພົມວິຫານ ແລະ ໃຫ້ກຽດເປັນຄະນະປະທານຮ່ວມມີ ສະຫາຍ ສົມສະຫວາດ ເລັ່ງສະຫວັດ ທີ່ປຶກສາສະພາທິດສະດີສູນກາງພັກ, ທີ່ປຶກສາຄະນະຮັບຜິດຊອບການຄົ້ນຄວ້າ ແນວຄິດໄກສອນ ພົມວິຫານ; ສະຫາຍ ສອນທະນູ ທຳມະວົງ ກຳມະການສູນກາງພັກ, ຫົວໜ້າສະຖາບັນ ວິທະຍາ ສາດເສດຖະກິດ ແລະ ສັງຄົມແຫ່ງຊາດ, ຮອງປະທານສະພາທິດສະດີສູນກາງພັກ, ຮອງຫົວໜ້າ ຄະນະຮັບຜິດຊອບການຄົ້ນຄວ້າແນວຄິດໄກສອນ ພົມວິຫານ, ສະຫາຍ ຮສ ພູວົງ ອຸ່ນຄຳແສນ, ກຳມະການ ສູນກາງພັກ, ຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ຮອງປະທານສະພາທິດສະດີສູນກາງ ພັກ, ຜູ້ປະຈໍາການຄະນະຮັບຜິດຊອບການຄົ້ນຄວ້າແນວຄິດ ໄກສອນ ພົມວິຫານ
ຈຸດປະສົງໃນການຈັດກອງປະຊຸມໃນຄັ້ງນີ້ ກໍແມ່ນເພື່ອສືບຕໍ່ຜັນຂະຫຍາຍມະຕິ ຂອງກົມການເມືອງ ສູນກາງພັກ ວ່າດ້ວຍການຄົ້ນຄວ້າແນວຄິດໄກສອນ ພົມວິຫານ ສະບັບເລກທີ 059/ກມສພ ລົງວັນທີ 13 ທັນວາ 2018 ແລະ ເປັນການສ້າງຂະບວນການສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 74 ປີ, ຂ່ຳນັບຮັບຕ້ອນ ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 67 ປີ ແລະ ເປັນການຜັນຂະຫຍາຍ ເນື້ອໃນຈິດໃຈ ຂອງມະຕິກອງປະຊຸມໃຫຍ່ຄັ້ງທີ ຄັ້ງທີ XI ຂອງພັກປະຊາຊົນປະຕິວັດລາວ ໃຫ້ປະກົດຜົນ ເປັນຈິງ.
ສະຫາຍ ຄຳພັນ ເຜີຍຍະວົງ ໄດ້ເນັ້ນໜັກວ່າ: ກອງ ປະຊຸມສຳມະນາວິທະຍາສາດລະດັບຊາດ ພາຍໃຕ້ຫົວຂໍ້: “ຊີວິດ ແລະ ພາລະກິດປະຕິວັດ ຂອງປະທານ ໄກ ສອນ ພົມວິຫານ ໄລຍະປີ 1955-1975” ໃນເທື່ອນີ້ ແມ່ນເປັນກອງປະຊຸມທີ່ມີຄວາມໝາຍສຳຄັນ ທັງໃນການດຳລົງຊີວິດ ໂດຍຜ່ານບັນດາຜົນງານການຊີ້ນຳ-ນຳພາ ພາລະກິດປະຕິວັດ ຂອງເພິ່ນ ໃຫ້ແກ່ການສຶກສາ ອົບຮົມພະນັກງານ, ສະມາຊິກພັກ, ກຳລັງປະກອບອາວຸດ ຕະຫຼອດຮອດປະຊາຊົນລາວບັນດາເຜົ່າເນື້ອໃນບົດນຳກອງປະຊຸມສຳມະນາ ສະເດໜີໂດຍ ສະຫາຍ ຮສ. ພູວົງ ອຸ່ນຄຳແສນ ໄດ້ຍົກໃຫ້ເຫັນຊີວິດ ແລະ ພາລະ ກິດ ຂອງປະທານ ໄກສອນ ພົມວິຫານ ໄລຍະນີ້ ແມ່ນຕິດພັນກັບເງື່ອນໄຂທີ່ປະເທດລາວ ຂອງພວກເຮົາ ໄດ້ຕົກເປັນຫົວເມືອງຂຶ້ນ ຂອງລ່າເມືອງຂຶ້ນແບບໃໝ່ ທີ່ມີກຳລັງທາງດ້ານເສດຖະກິດ, ການ ທະຫານອາວຸດຍຸດໂທປະກອນ ທີ່ທັນສະໄໝເໜືອກວ່າຫຼາຍເທົ່າ. ແຕ່ປະທານ ໄກສອນ ພົມວິຫານ ໄດ້ພະ ຍາຍາມເຄື່ອນໄຫວນຳພາການປະຕິວັດ ດ້ວຍຫຼາຍຮູບການ, ຫຼາຍວິທີການຕໍ່ສູ້ ສຸມໃສ່ປຸກລະດົມຂົນຂວາຍ, ເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ ຈົນສາມາດຍາດໄດ້ໄຊຊະນະຢ່າງສົມບູນ ແລະ ສະຖາປະ ນາເປັນ ສາທາະລະນະລັດ ປະຊາທິ ປະໄຕ ປະຊາຊົນລາວ ຂຶ້ນໃນວັນທີ 02 ທັນວາ ປີ 1975 ເຊິ່ງເປັນການ ສ້າງຕັ້ງລັດ ຂອງປະຊາຊົນ ໂດຍປະຊາຊົນ ແລະ ເພື່ອປະຊາຊົນ ຢ່າງແທ້ຈິງ.
ກອງປະຊຸມໄດ້ຮັບຟັງການນໍາສະເໜີ 5 ຫົວຂໍ້ຍ່ອຍ ເຊັ່ນ: ພາລະກິດສ້າງຕັ້ງພັກປະຊາຊົນ ປະຕິວັດ ລາວ ແລະ ປົກປັກຮັກສາເຂດທີ່ໝັ້ນສອງແຂວງເຕົ້າໂຮມ ຫົວພັນ ແລະ ຜົ້ງສາລີ ປີ 1955-1958, ຊີ້ນຳຫັນ ທິດຕໍ່ສູ້ ໂດຍເອົາການຕໍ່ສູ້ ດ້ວຍອາວຸດເປັນກົກ ສົມທົບກັບການຕໍ່ສູ້ທາງດ້ານການເມືອງ ແລະ ກົດໝາຍ ໃນ ໄລຍະ 1959-1962, ການນຳພາຕໍ່ສູ້ຕີເອົາພຸດທະສາດສົງຄາມພິເສດ ເພີ່ມທະວີ ປີ 1963-1968, ປະທານ ໄກສອນ ພົມວິຫານ ຊີ້ນຳການສ້າງຄວາມຖືກຕ້ອງ ປອງດອງຊາດ ປີ 1969-1972, ພາລະກິດນໍາພາປວງຊົນ ລາວທັງຊາດ ລຸກຮື້ຂຶ້ນຢຶດອຳນາດໃນທົ່ວປະເທດ ແລະ ສະຖາປະນາ ສປປ ລາວປີ 1973-1975.
ໃນຕອນທ້າຍ, ກອງປະຊຸມສໍາມະນາ ໄດ້ຮັບຟັງການສະຫຼຸບລາຍງານຜົນຂອງກອງ ປະຊຸມໂດຍ ສະຫາຍ ປອ. ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນ ກາງພັກ, ປະທານສະພາທິດສະດີສູນກາງພັກ, ຫົວໜ້າຄະນະຮັບຜິດຊອບການຄົ້ນຄວ້າແນວຄິດໄກສອນ ພົມວິຫານ ເຊິ່ງໄດ້ຕີລາຜົນໄດ້ຮັບໃນເບື້ອງຕົ້ນ ທີ່ນັກວິທະຍາ ສາດໄດ້ຄົ້ນຄວ້າຢ່າງເລິກເຊິ່ງ ແລະ ຈະແຈ້ງ ກ່ຽວ ກັບຊີວິດ ແລະ ພາລະກິດປະຕິວັດ ຂອງປະທານ ໄກສອນ ພົມວິຫານ ແລະ ໄດ້ເນັ້ນໜັກໃຫ້ພະນັກງານ, ສະມາຊິກພັກ, ປະຊາຊົນລາວບັນດາເຜົ່າສືບຕໍ່ຝຶກຝົນຫລໍ່ຫຼອມ ແລະ ຮ່ຳຮຽນເອົາແບບແຜນດຳລົງຊີວິດ ແລະພາລະກິດປະຕິວັດ ຂອງປະທານ ໄກສອນ ພົມວິຫານ ໃນຕໍ່ໜ້າ.
