ສະຖາບັນການເມືອງ ແລະ ການປົກຄອງແຫ່ງຊາດ ຮ່ວມກັບ ແຂວງຫລວງນໍ້າທາ ຈັດສຳມະນາວິທະຍາສາດ ສ້າງການຫັນປ່ຽນຢ່າງແຂງແຮງ ໃຫ້ພະນັກງານ ໃນເງື່ອນ ໄຂເສດຖະກິດຕະຫລາດຢູ່ 6 ແຂວງພາກເໜືອຄື: ແຂວງຫລວງນ້ຳທາ, ອຸດົມໄຊ, ບໍ່ແກ້ວ, ຜົ້ງສາລີ, ຫລວງພະບາງ ແລະ ແຂວງໄຊຍະບູລີ ໃນວັນທີ 5 ສິງຫາ 2024 ທີ່ແຂວງຫລວງນ້ຳທາ ໂດຍການເປັນປະທານຂອງທ່ານ ດາວສະຫວັນ ເຄືອມີໄຊ ຮອງປະທານສະພາວິທະຍາສາດ, ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ພ້ອມດ້ວຍບັນດາຄະນະໂຮງຮຽນການເມືອງ-ການປົກຄອງ 6 ແຂວງພາກເໜືອ, ນັກວິທະຍາສາດ ແລະ ພະນັກງານຄູ-ອາຈານທີ່ກ່ຽວຂ້ອງເຂົ້າຮ່ວມ.
ທ່ານ ດາວສະຫວັນ ເຄືອມີໄຊ ໃຫ້ຮູ້ວ່າ: ເງື່ອນໄຂການພັດທະນາເສດຖະກິດ ຕະຫລາດຕາມທິດສັງຄົມນິຍົມ ທີ່ພວກເຮົາກໍາລັງດໍາເນີນຢູ່ໃນປັດຈຸບັນນີ້ ນອກ ຈາກດ້ານຕັ້ງໜ້າແລ້ວ ເສດຖະກິດຕະຫລາດຍັງສົ່ງຜົນກະທົບດ້ານຫຍໍ້ທໍ້ບໍ່ໜ້ອຍ ເຖິງພະນັກງານ, ສະມາຊິກພັກ ເປັນຕົ້ນ ເກີດມີພະຍາດລັດທິເອກະຊົນ ເຊິ່ງເປັນສາຍເຫດກໍ່ໃຫ້ເກີດຫລາຍໆພະຍາດ ທີ່ເປັນການບັນທອນກຳລັງແຮງສູ້ຮົບຂອງພັກ ເຮັດໃຫ້ອິດທິພົນ ແລະ ຄວາມເຊື່ອໝັ້ນຂອງມະຫາຊົນຕໍ່ພັກ, ຕໍ່ລັດຫລຸດໜ້ອຍຖອຍລົງ ໂດຍສະເພາະພະຍາດຂາດລະບຽບວິໄນ, ຫ່າງເຫີນມະຫາຊົນ, ພະຍາດໃນຕົວ, ການເສື່ອມຖອຍ ດ້ານຄຸນທາດການເມືອງ, ພະຍາດສໍ້ລາດບັງຫລວງ, ຫລິ້ນກິນຟຸມເຟືອຍ, ຊຶ່ງພະຍາດນີ້ກໍາລັງແຜ່ລະບາດຢ່າງໜັກໜ່ວງ ສາເຫດຫລັກ ເຮັດໃຫ້ພະນັກງານ ຍັງບໍ່ທັນສ້າງໄດ້ການຫັນປ່ຽນຢ່າງເລິກເຊິ່ງ, ພະນັກງານຈຳນວນໜຶ່ງ ຍັງຂາດການຝຶກຝົນຫລໍ່ຫລອມທາງດ້ານຄຸນທາດການເມືອງ, ຄຸນສົມບັດ-ສິນທຳປະຕິວັດ ພະນັກງານ, ສະມາຊິກພັກ, ຄະນະພັກແຕ່ລະຂັ້ນ ຍັງບໍ່ທັນຖືສຳຄັນວຽກ ງານສຶກສາອົບຮົມການເມືອງແນວຄິດ ຍັງຂາດຄວາມເປັນແບບຢ່າງນຳໜ້າດ້ວຍເຫດຜົນ.
ໂອກາດນີ້, ທ່ານ ດາວສະຫວັນ ເຄືອມີໄຊ ຍັງໄດ້ຮຽກຮ້ອງໃຫ້ບັນດານັກວິທະຍາ ສາດ ຈົ່ງຍົກສູງຄວາມຮັບຜິດຊອບການເມືອງ, ຄົ້ນຄວ້ານຳສະເໜີແນວຄວາມຄິດ, ໂຄງສ້າງບົດທີ່ຮັດກຸມ ເພື່ອຊອກໃຫ້ເຫັນເຖິງເນື້ອແທ້ຂອງບັນຫາທີ່ຈະຄົ້ນຄວ້າ ເພື່ອເປັນບ່ອນອີງແກ່ການດຳເນີນການຄົ້ນຄວ້າລົງເລິກ, ເອົາໃຈໃສ່ໃນການຄົ້ນຄິດ ໃຫ້ການປະກອບຄຳເຫັນເພີ່ມຕື່ມ ແກ່ບົດສຳມະນາວິທະຍາສາດຢ່າງກົງໄປກົງມາ ເພື່ອເຮັດໃຫ້ບົດມີເນື້ອໃນ ພ້ອມກັນຄົ້ນຄວ້າ, ສຳມະນາວິທະຍາສາດໃນຄັ້ງນີ້ ສາມາດຮັບປະກັນໄດ້ທັງລັກສະນະວິທະຍາສາດຖືກຕ້ອງຕາມຄວາມເປັນຈິງ ແລະ ນຳເອົາເນື້ອໃນຈິດໃຈຂອງກອງປະຊຸມຄັ້ງນີ້ ໄປຄົ້ນຄວ້າ ແລະ ຂຽນບົດໃຫ້ມີຄວາມເລິກເຊິ່ງເຖິງຖອງ.
ໃນກອງປະຊຸມ ຍັງໄດ້ຮັບຟັງການລາຍງານຫົວຂໍ້: ບຸກທະລຸດ້ານແນວຄິດ, ຈິນ ຕະນາການ ແກ່ພະນັກງານ-ສະມາຊິກພັກ ຢູ່ແຂວງຫລວງນໍ້າທາ, ສ້າງການຫັນປ່ຽນດ້ານແນວຄິດ ຂອງພະນັກງານ-ສະມາຊິກພັກ ໃນເງື່ອນໄຂເສດຖະກິດຕະຫລາດຕາມທິດສັງຄົມນິຍົມ ຢູ່ແຂວງອຸດົມໄຊ, ຍົກສູງຄຸນທາດການເມືອງ, ຄຸນສົມບັດສິນທໍາປະຕິວັດ ໃຫ້ພະນັກງານສະມາຊິກພັກ ຢູ່ແຂວງໄຊຍະບູລີ, ຝຶກຝົນຫລໍ່ຫລອມຄຸນສົມບັດສິນທໍາປະຕິວັດ ໃຫ້ພະນັກງານ-ສະມາຊິກພັກ ຢູ່ແຂວງຫລວງພະບາງ ຕື່ມອີກ.
ຂ່າວ: ອຸ້ມ ສົມນໍວັນ
