ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ຈັດເວທີເສວະນາ ພາຍໃຕ້ຫົວຂໍ້ “ສຳມະນາວິທະຍາສາດ ຕ້ານຂ່າວປອມໃນສື່ສັງຄົມອອນລາຍ ແລະ ບົດບາດຂອງສື່ທີ່ເປັນທາງການໃນການຕ້ານຂ່າວປອມ” ໃນວັນທີ 8 ສິງຫາ 2024, ທີ່ນະຄອນຫລວງວຽງຈັນເພື່ອສ້າງຄວາມຮັບຮູ້ ແລະ ແລກປ່ຽນບົດຮຽນເຊິ່ງກັນ ແລະ ກັນ ໃນຂົງເຂດວຽກງານ ຖະແຫລງຂ່າວ-ສື່ມວນຊົນ ພ້ອມທັງເປັນການສ້າງຄວາມເຂັ້ມແຂງໃຫ້ພະ ນັກງານ, ນັກຮົບສື່ມວນຊົນເນື່ອງໃນໂອກາດສະເຫລີມສະຫລອງວັນສື່ມວນຊົນ ແລະ ການພິມຈໍາໜ່າຍລາວ ຄົບຮອບ 74 ປີ (13 ສິງຫາ 1950-13 ສິງຫາ 2024) ໂດຍການເປັນປະທານຂອງທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ.
ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທລາຍງານໃຫ້ຮູ້ວ່າ: ສຳລັບບົດບາດຂອງສື່ມວນຊົນທາງ ການໃນການຕ້ານຂ່າວປອມຄືກວດກາເບິ່ງຂໍ້ມູນທີ່ເປັນຈິງຢ່າງລະອຽດ ກ່ອນທີ່ຈະເຜີຍແຜ່ຂ່າວ, ການນໍາໃຊ້ແຫລ່ງຂ່າວທີ່ເຊື່ອຖືໄດ້ ແລະ ການກວດສອບຂໍ້ມູນຈາກຫລາຍແຫລ່ງ ຈະຊ່ວຍຫລຸດຜ່ອນການແຜ່ກະຈາຍຂອງຂ່າວປອມ ພ້ອມນີ້, ການ ສະໜອງຂໍ້ມູນທີ່ຖືກຕ້ອງ ການເຜີຍແຜ່ຂໍ້ມູນທີ່ຖືກຕ້ອງ ແລະ ເຊື່ອຖືໄດ້ຊ່ວຍສ້າງຄວາມເຊື່ອໝັ້ນໃຫ້ກັບປະຊາຊົນ,ສື່ມວນຊົນຄວນ ເນັ້ນໜັກເຖິງການລາຍງານຂ່າວທີ່ເປັນຈິງ ແລະ ມີຈັນຍາ ບັນ,ສື່ມວນຊົນສາມາດຜະລິດບົດຄວາມ ຫລື ໂຄງການທີ່ໃຫ້ຄວາມຮູ້ແກ່ປະຊາຊົນໃນການກວດສອບຂ່າວປອມລວມທັງການຈໍາແນກລະຫວ່າງ ຂ່າວທີ່ເຊື່ອຖືໄດ້ ແລະ ຂ່າວປອມ.
ໂອກາດນີ້, ທ່ານ ໂພສີ ແກ້ວມະນີວົງ ຍັງໃຫ້ຮູ້ເຖິງ ທິດທາງ ແລະ ການພັດທະນາສື່ມວນຊົນໃນຍຸກໃໝ່ ໂດຍຍົກໃຫ້ເຫັນເຖິງວິໄສທັດຂອງສື່ມວນຊົນລາວຕ້ອງພັດທະນາໃຫ້ກ້າວສູ່ຄຸນນະ ພາບ, ທັນສະໄໝ, ວ່ອງໄວ, ຊັດເຈນ, ທັນເຫດການ, ທັນເວລາ ສາມາດເຂົ້າເຖິງໄດ້ທຸກພື້ນທີ່ທົ່ວປະເທດ, ມີຄວາມຫລາກຫລາຍ ຄົບຖ້ວນດ້ານເນື້ອໃນ, ເປັນແຫລ່ງສະໜອງຂໍ້ມູນຂ່າວສານ ແລະ ໃຫ້ສາລະຄວາມຮູ້ຢ່າງຮອບດ້ານໃຫ້ພັກ-ລັດ ປະຊາຊົນບັນດາເຜົາທຸກຊັ້ນຄົນ; ຊຸກຍູ້ ສົ່ງເສີມ ສ້າງບຸກຄະລາກອນສື່ມວນຊົນ ທີ່ມີຄຸນທາດທາງດ້ານການເມືອງໜັກແໜ້ນ ແລະ ມີວຸດທິ ສື່ສານ ມວນຊົນທີ່ກ້າວໜ້າ ສົມຄູ່ກັບຍຸກສະໄໝ; ສ້າງຄວາມເຂັ້ມແຂງ ແລະ ຫັນໄປສູ່ກຸ້ມຕົນເອງໃນລະດັບທີ່ແນ່ນອນ; ສົ່ງເສີມການຮ່ວມມືລະຫວ່າງ ພາກລັດ ແລະ ພາກເອກະຊົນ, ການຮ່ວມມືກັບຕ່າງປະເທດ ໃນການສົ່ງເສີມການລົງທຶນໃນວຽກງານຖະແຫລງຂ່າວໃຫ້ກວ້າງ ຂ້າງກວ່າເກົ່າ ແລະ ອື່ນໆ.
