ກົມສົນທິສັນຍາ ແລະ ກົດໝາຍ, ກະຊວງການຕ່າງປະເທດ ຮ່ວມກັບ ສະຖານເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ຈັດສຳມະນາ ກ່ຽວກັບ ກົດໝາຍທະເລ ແລະ ປະເທດທີ່ບໍ່ມີຊາຍແດນຕິດຈອດກັບທະເລ ໃນວັນທີ 17 ມິຖຸນາ 2024 ທີ່ສູນການຮ່ວມມືສາກົນ ແລະ ການຝຶກອົບຮົມ (ICTC) ພາຍໃຕ້ການເປັນປະທານຂອງ ທ່ານ ທອງຜ່ານ ສະຫວັນເພັດ ຮອງລັດຖະມົນຕີກະຊວງການຕ່າງປະເທດ ໂດຍມີວິທະຍາກອນຈາກ ຍີ່ປຸ່ນ ແລະ ສປປ ລາວ ຂຶ້ນນຳສະເໜີເນື້ອໃນທັງໝົດ 3 ຫົວຂໍ້ຄື: ກົດໝາຍທະເລ; ກົດໝາຍທະເລ ແລະ ບັນດາປະເທດທີ່ບໍ່ມີຊາຍແດນຕິດຈອດກັບທະເລ ແລະ ການເຂົ້າຮ່ວມຂອງ ສປປ ລາວ ໃນວຽກງານການຄຸ້ມຄອງທະເລສາກົນ.
ຈຸດປະສົງຂອງການສຳມະນາຄັ້ງນີ້, ເພື່ອເພີ່ມທະວີສ້າງຄວາມຮັບຮູ້ ແລະ ຄວາມເຂົ້າໃຈ ໂດຍພື້ນຖານກ່ຽວກັບ ກົດໝາຍທະເລ, ສິດ ແລະ ຜົນປະໂຫຍດຂອງປະເທດທີ່ບໍ່ມີຊາຍແດນຕິດກັບທະເລ ແລະ ຄວາມສຳຄັນຂອງກົດໝາຍທະເລ ລວມທັງສົນທິສັນຍາ ສປຊ ວ່າດ້ວຍ ກົດໝາຍທະເລ.
ຜ່ານການສຳມະນາ, ວິທະຍາກອນ ແລະ ສຳມະນາກອນ ໄດ້ມີການແລກປ່ຽນຄຳຄິດເຫັນຢ່າງກົງໄປກົງມາ ເຊິ່ງສະແດງອອກໃນການຕັ້ງຄຳຖາມ, ການມີຄຳເຫັນ ແລະ ການສະແດງທັດສະນະສ່ວນຕົວຂອງບັນດາສຳມະນາກອນ ຈຶ່ງເຮັດໃຫ້ການສຳມະນາຄັ້ງນີ້ ດຳເນີນໄປດ້ວຍບັນຍາກາດອັນຟົດຟື້ນ ທີ່ເຕັມໄປດ້ວຍເນື້ອໃນອັນເປັນປະໂຫຍດແກ່ຜູ້ເຂົ້າຮ່ວມ.
ທີ່ມາ: ຂປລ
