ກອງປະຊຸມຄັ້ງປະຖົມມະລຶກ ຂອງສະພາປະຊາ ຊົນແຂວງຫົວພັນ ຊຸດທີ II ໄດ້ສໍາເລັດລົງ ໃນຕອນ ບ່າຍຂອງວັນທີ 14 ພຶດສະພາ 2021,ໂດຍເປັນປະ ທານ ຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ປະທານສະພາປະ ຊາຊົນແຂວງຫົວພັນ, ມີ ທ່ານ ວັນໄຊ ແພງຊຸມມາ ກຳມະການສູນກາງພັກ ເລຂາພັກແຂວງ, ເຈົ້າແຂວງຫົວພັນ, ມີບັນດາການນຳແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 8 ແຂວງຫົວພັນ ແລະ ສະມາຊິກສະພາປະຊາຊົນແຂວງ, ການນຳເມືອງ 10 ເມືອງ, ອົງການຈັດຕັ້ງແນວລາວສ້າງຊາດ,ອົງການຈັດຕັ້ງມະຫາຊົນ, ພະແນກການ, ອົງການທຽບເທົ່າ,ສອງກອງບັນຊາການ ແລະພາກ ສ່ວນທຸລະກິດຕ່າງໆ ພາຍໃນແຂວງເຂົ້າຮ່ວມ.
ກອງປະຊຸມ ໄດ້ເປັນເອກະພາບ ເລືອກຕັ້ງທ່ານ ນາງ ອຳໄພວອນ ລ້ອມບຸນແພງ ກຳມະການສຳ ຮອງສູນກາງພັກ ເປັນປະທານສະພາປະຊາຊົນແຂວງຫົວພັນ, ເລືອກຕັ້ງຮອງປະທານສະພາປະ ຊາຊົນແຂວງ 2 ທ່ານ ຄື: ທ່ານ ຄອນປະພັນ ເລືອງສີຈັນທອງ ຄະນະປະຈໍາພັກແຂວງ ແລະ ທ່ານ ສົມສັກ ດອນຈານິດ ຄະນະປະຈຳພັກແຂວງ, ເລືອກຕັ້ງຮອງເຈົ້າແຂວງ 2 ທ່ານ ຄື: ທ່ານ ພອນສຸກ ອິນທະວົງ ຄະນະປະຈຳພັກແຂວງ ແລະ ທ່ານ ພຸດພັນ ແກ້ວວົງໄຊ ຄະນະປະຈຳພັກແຂວງ ແລະ ເລືອກເອົາກຳມະການ ຄະນະປະຈຳສະພາປະຊາຊົນແຂວງ ຈຳນວນ 4 ທ່ານ. ນອກນັ້ນ, ຕະຫຼອດໄລ ຍະ 2 ວັນ ທີ່ຜ່ານມາ, ບັນດາຜູ້ເຂົ້າຮ່ວມ ຍັງໄດ້ຮັບຟັງການລາຍງານ ແລະ ຮັບຮອງເອົາຫຼາຍບັນຫາສຳຄັນຕ່າງໆຂອງແຂວງ ກ່ຽວກັບຜົນການເລືອກຕັ້ງ ແລະ ການຢັ້ງຢືນຄຸນລັກສະນະ ຂອງສະມາຊິກສະພາປະຊາຊົນແຂວງ ຊຸດທີ II, ຮັບຮອງເອົາໂຄງປະກອບ ກົງຈັກການຈັດຕັ້ງ ຂອງສະພາປະຊາຊົນແຂວງ ຄື: ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ, ຄະນະກໍາມະການເສດຖະກິດ, ແຜນການ ແລະ ການເງິນ, ຄະນະກໍາ ມະການວັດທະນະທໍາສັງຄົມ ແລະບັນດາເຜົ່າ, ຄະ ນະເລຂາທິການສະພາປະຊາຊົນແຂວງ, ຮັບຮອງເອົາການແຕ່ງຕັ້ງ ຫົວໜ້າອົງການໄອຍະການປະຊາ ຊົນແຂວງ ແລະ ປະທານສານປະຊາຊົນແຂວງ, ຮັບຮອງເອົາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ ຄັ້ງທີ IX ແລະ ແຜນງົບປະມານ 5 ປີ ( 2021–2025 ), ຮັບຮອງ ເອົາບົດລາຍງານການເຄື່ອນໄຫວວຽກງານ ປະຈຳ 5 ປີ 2016 – 2020 ແລະ ທິດທາງແຜນການ 5 ປີ 2021 – 2025 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງ, ຮັບຮອງເອົາບົດລາຍງານ ແຜນການ 5 ປີ 2021 – 2025 ຂອງສະພາປະຊາຊົນແຂວງ.
ກອງປະຊຸມ ຍັງໄດ້ຮັບຟັງ ການຊີ້ແຈ້ງອະທິບາຍ ຈາກທ່ານເຈົ້າແຂວງ, ຫົວໜ້າພະແນກການ ຂອງແຂວງ, ຫົວໜ້າອົງການໄອຍະການປະຊາຊົນ, ປະ ທານສານປະຊາຊົນແຂວງ ແລະ ຄະນະປະຈໍາສະ ພາປະຊາຊົນແຂວງຕໍ່ຂໍ້ຂ້ອງໃຈ ຂອງສະມາຊິກສະ ພາປະຊາຊົນແຂວງ ເຊິ່ງສ່ອງແສງໃຫ້ເຫັນຄວາມຮັບຜິດຊອບຂອງ ອົງການລັດທຸກພາກສ່ວນ ໃນການປະຕິບັດໜ້າທີ່ວຽກງານ ທີ່ປະຊາຊົນມອບ ໝາຍໃຫ້.