ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມຄົບຄະນະບໍລິຫານງານພັກກະຊວງປ້ອງກັນປະ ເທດ ຄັ້ງທີ 7 ສະໄໝທີ V ໄດ້ສຳເລັດລົງດ້ວຍ ໝາກຜົນອັນຈົບງາມພາຍຫຼັງດຳເນີນມາເປັນເວລາ 2 ວັນໃນລະຫວ່າງວັນທີ 13-14 ມິຖຸນານີ້ ໂດຍການເປັນປະທານຂອງສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ ເລຂາຄະນະບໍລິຫານງານພັກກະຊວງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ມີກຳມະການສູນກາງພັກ, ຮອງເລຂາຄະນະບໍລິຫານງານພັກ, ຄະນະປະຈຳພັກ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ພົນເອກ ຈັນສະໝອນ ຈັນຍາລາດ ໄດ້ມີຄໍາເຫັນສັງລວມ ແລະ ໃຫ້ທິດຊີ້ນຳຕໍ່ກອງປະຊຸມຫຼາຍບັນຫາສໍາຄັນວ່າ: ກອງປະຊຸມໄດ້ດໍາເນີນມາເປັນເວລາ 2 ວັນ, ບົນຈິດໃຈເສີມ ຂະຫຍາຍປະຊາທິປະໄຕ, ສະຕິປັນຍາລວມໝູ່ ແລະ ເຊີດຊູຄວາມ ຮັບຜິດຊອບສູງ ເຮັດໃຫ້ກອງປະຊຸມໄດ້ສໍາເລັດຕາມຈຸດປະສົງຄາດໝາຍຢ່າງຈົບງາມ.
ກອງປະຊຸມໄດ້ພ້ອມກັນຄົ້ນຄວ້າປະກອບຄຳຄິດເຫັນໃສ່ເນື້ອ ໃນຕ່າງໆຂອງກອງປະຊຸມ ຊຶ່ງໄດ້ຍົກໃຫ້ເຫັນຜົນງານດ້ານຕັ້ງໜ້າ, ຜົນງານທີ່ເຮັດໄດ້ສຳເລັດ, ບັນດາຈຸດອ່ອນທີ່ຍັງຄົງຄ້າງ, ພ້ອມ ທັງວິທີການແກ້ໄຂ ແລະ ເປັນເອກະພາບຕໍ່ທິດທາງວຽກງານຈຸດສຸມນໍາພາ-ຊີ້ນໍາໃນຕໍ່ໜ້າ. ການນໍາພາ-ຊີ້ນໍາຂອງຄະນະພັກກະຊວງປ້ອງກັນ ປະເທດ ກໍຄືຄະນະພັກແຕ່ລະຂັ້ນໃນ 6 ເດືອນຕົ້ນປີ 2024 ຜ່ານມາ ພວກເຮົາໄດ້ຕັ້ງໜ້າຊີ້ນໍາການຈັດຕັ້ງຜັນ ຂະຫຍາຍມະຕິກອງປະຊຸມໃຫຍ່ຄັ້ງທີ V ຂອງຄະນະພັກກະຊວງປ້ອງກັນປະເທດ ແລະ ມະຕິວ່າດ້ວຍ 4 ໜ້າທີ່ໃຫຍ່ 26 ແຜນງານ ແລະ 5 ບຸກທະ ລຸຢ່າງມີຈຸດສຸມ, ແທດຕົວຈິງນັບແຕ່ຂັ້ນກະຊວງລົງຮອດກົມກອງທ້ອງຖິ່ນມີຜົນສໍາເລັດໃນຫຼາຍດ້ານ; ພ້ອມນັ້ນໄດ້ສຸມໃສ່ຊີ້ນໍາຢ່າງໃກ້ຊິດວຽກງານປົກປັກຮັກສາຄວາມສະຫງົບປອດໄພໃຫ້ແກ່ວັນບຸນ ແລະ ກອງປະຊຸມທີ່ສໍາຄັນຕ່າງໆນັບທັງລະດັບສາກົນ ແລະ ລະດັບຊາດ ເປັນຕົ້ນການສະ ເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ຊຶ່ງຮັບປະກັນໄດ້ຄວາມສະຫງົບປອດໄພ 100%; ສືບຕໍ່ຮັກສາໄດ້ສະຖຽນລະພາບທາງດ້ານການເມືອງ, ຄວາມສະ ຫງົບປອດໄພ ແລະ ຄວາມເປັນລະບຽບຮຽບຮ້ອຍທາງດ້ານສັງຄົມ, ການພັດ ທະນາເສດຖະກິດດຳເນີນໄປຢ່າງຕໍ່ເນື່ອງ; ກອງທັບພວກເຮົາຍັງມີຄວາມໜັກແໜ້ນ, ມີຄວາມຈົງຮັກພັກດີຕໍ່ພັກ, ຕໍ່ປະ ເທດຊາດ ແລະ ປະຊາຊົນຢ່າງສຸດໃຈ; ສືບຕໍ່ເປັນກໍາລັງຫຼັກແຫຼ່ງໃນການປະຕິບັດແນວທາງ ປກຊ-ປກສ ທົ່ວປວງຊົນຮອບດ້ານຂອງພັກ.
ສະຫາຍ ພົນເອກ ຈັນສະໝອນ ຈັນຍາລາດ ໄດ້ຊີ້ແຈງຕໍ່ບັນດາຄໍາຄິດເຫັນ ແລະ ຄຳສະເໜີຂອງບັນດາຄະນະບໍລິຫານງານພັກກະຊວງປ້ອງກັນປະເທດ ພ້ອມທັງເນັ້ນໜັກໃຫ້ສືບຕໍ່ຮັບປະກັນໃຫ້ປະເທດມີສະຖຽນລະພາບ ມີຄວາມສະຫງົບປອດໄພຢ່າງໜັກແໜ້ນ, ດ້ວຍມາດຕະການຍຸດທະສາດຫັນກໍາລັງລົງກໍ່ສ້າງຮາກຖານການເມືອງ, ສ້າງທ່າສະ ໜາມ 3 ຂັ້ນ ຕິດພັນກັບການ ສ້າງບ້ານ-ກຸ່ມບ້ານພັດທະນາ ແລະ ວຽກງານ 3 ສ້າງ; ສຸມໃສ່ຊີ້ນໍາຈັດຕັ້ງກໍາລັງເຄື່ອນໄຫວແກ້ໄຂເຂດເກາະຫ້ອຍ, ຫຼໍ່ແຫຼມຢູ່ບາງຈຸດຂອງແຂວງເຂດໃຈກາງ; ສົມທົບກັບບັນດາກະຊວງ ແລະ ຂະແໜງ ການກ່ຽວຂ້ອງແກ້ໄຂໜໍ່ແໜງຄວາມບໍ່ສະຫງົບ ເພື່ອຮັບປະກັນໃຫ້ແກ່ວັນສໍາຄັນຂອງຊາດໃຫ້ມີຄວາມປອດໄພ, ເຊີດຊູຄວາມ ຮັບຜິດຊອບ, ຕັ້ງໜ້າບຸກບືນຜ່ານຜ່າຄວາມຫຍຸ້້ງຍາກ ແລະ ສິ່ງທ້າທາຍຕ່າງໆ, ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ V ຂອງຄະນະພັກກະຊວງປ້ອງກັນປະເທດໃຫ້ມີຜົນ ສຳເລັດ ເຮັດໃຫ້ທຸກຂົງເຂດວຽກງານມີການຫັນປ່ຽນຢ່າງຕັ້ງໜ້າ ແລະ ເດັ່ນຊັດຂຶ້ນຢ່າງຈະແຈ້ງ.
ຂ່າວ-ພາບ: ເພັດ ສົມນໍວັນ