ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ສຳເລັດກອງປະຊຸມຄົບຄະນະບໍລິຫານງານພັກ ເມືອງຫົງສາ ສະໄໝທີ VIII ຄັ້ງທີ 3

ກອງປະຊຸມຄົບຄະນະບໍລິຫານງານພັກເມືອງຫົງສາ ແຂວງໄຊຍະບູລີ ຄັ້ງທີ 3 ສະໄຫມທີ VIII ໄດ້ສຳເລັດລົງໃນຕອນເຊົ້າຂອງວັນທີ 7 ກໍລະກົດ 2020 ພາຍຫຼັງດຳເນີນມາເປັນເວລາ 1 ວັນເຄິ່ງ. ຢູ່ທີ່ສະໂມສອນຂອງເມືອງ ພາຍໃຕ້ການເປັນປະທານຂອງສະຫາຍ ຄຳຫຼ້າ ຜິວວັນນາ ເລຂາຄະນະບໍລິຫານງານພັກເມືອງ, ເຈົ້າເມືອງຫົງສາ. ມີບັນດາສະຫາຍຄະນະປະຈໍາພັກເມືອງ, ກໍາມະການພັກເມືອງ, ເລຂາໜ່ວຍພັກສຳນັກງານ-ອົງການ, ເລຂາຄະນະພັກຮາກຖານ, ເລຂາຫນ່ວຍພັກບ້ານ, ກອງບັນຊາການທະຫານ, ຕໍາຫລວດ, ຕາງໜ້າຫົວຫນ່ວຍລັດວິສາຫະກິດສູນບໍລິການປະຈຳເມືອງ, ນັກທຸລະກິດ ແລະ ຕາງໜ້າສະມາຄົມບຳນານ ເຂົ້າຮ່ວມທັງໝົດ 72 ສະຫາຍ, ຍິງ 7 ສະຫາຍ.
ກອງປະຊຸມ ຜູ້ແທນເຂົ້າຮ່ວມໄດ້ພ້ອມກັນຄົ້ນຄວ້າ ເປັນເອກະພາບຮັບຮອງເອົາບົດສະຫລຸບການ ຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງເມືອງຫົງສາ ໃນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2020, ເຫັນດີເປັນເອກະພາບ ຕາມແຜນການກະກຽມຄວາມພ້ອມສ້າງເມືອງຫົງສາ ເປັນເມືອງສາມັກຄີປອງດອງ ແລະ ກະກຽມປະເມີນການສ້າງເມືອງເປັນຫົວໜ່ວຍເຂັ້ມແຂງຮອງດ້ານ ແລະ ສ້າງບ້ານເປັນຫົວໜ່ວຍພັດທະນາ, ເຫັນດີເປັນເອກະພາບໃນການເຕົ້າໂຮມບ້ານ ໂພນໄຊ ແລະ ບ້ານໂພນສະອາດ ເຂົ້າເປັນບ້ານດຽວກັນ, ໃຫ້ຄະນະພັກແຕ່ລະຂັ້ນ ສືບຕໍ່ນຳເອົາມະຕິກອງປະຊຸມຄົບຄະນະ ຄັ້ງທີ 10 ຂອງຄະນະບໍລິຫານງານສູນກາງພັກສະ ໄໝທີ X ໄປຈັດຕັ້ງເຊື່ອມຊືມໃຫ້ແກ່ສະມາຊິກພັກທີ່ຢູ່ໃນຄວາມຮັບຜິດຊອບຂອງຕົນໃຫ້ທົ່ວເຖິງ; ສືບຕໍ່ເອົາໃຈໃສ່ສຶກສາອົບຮົມການເມືອງ-ແນວຄິດເປັນຫາສຳຄັນອັນດັບໜຶ່ງ ສອດຫ້ອຍເຂົ້າທຸກຂົງເຂດວຽກງານ ແລະ ເຂົ້າເຖິງທຸກເປົ້າໝາຍ; ຖຶເອົາວຽກງານກວດກາພັກ, ກວດກາລັດ ເປັນວຽກງານປົກກະຕິ ແລະ ເຂັ້ມງວດ ແນ່ໃສ່ແກ້ໄຂປະກົດການຫຍໍ້ທໍ້ພາຍໃນພັກ; ສະມາຊິກພັກ-ພະນັກງານບຳນານທີ່ຢູ່ຮາກຖານບ້ານ ຕ້ອງເອົາໃຈໃສ່ຍົກສູງບົດບາດ ປະກອບສ່ວນ ເປັນທີ່ປຶກສາໃຫ້ກັບໜ່ວຍພັກຮາກຖານບ້ານ; ການສ້າງບຸກຄະລາກອນຂອງບ້ານໃຫ້ມີຄວາມເຂັ້ມແຂງ ຕ້ອງຫັນເອົາຜູ້ທີ່ມີຄວາມຮູ້ທາງດ້ານວິຊາສະເພາະເຂົ້າຊ່ວຍອົງການປົກຄອງບ້ານ ເພຶ່ອສ້າງເຂົ້າໃນອົງການຈັດຕັ້ງບ້ານ, ສືບຕໍ່ແກ້ໄຂບັນຫາຢາເສບຕິດໃນຖັນແຖວສະມາຊິກພັກ, ພະນັກງານ ແລະ ປະຊາຊົນ ຕາມລະບຽບ ແລະ ກົດໝາຍ, ຄຸ້ມຄອງກຳບັນຫາສະພາບຊາຍແດນ, ກຸ່ມຄົນບໍ່ຫວັງດີກໍ່ຄວາມບໍ່ສະຫງົບຕ່າງໆ ເພຶ່ອວາງແຜນແກ້ໄຂໃຫ້ທັນເວລາ; ຖືການແກ້ໄຂບັນຫາຢາເສບຕິດ ເປັນວຽກງານລວມຂອງທຸກພາກສ່ວນໃນສັງຄົມ ແລະ ເອົາໃຈໃສ່ຄຸ້ມຄອງພົນລະເມືອງ ໂດຍມອບໃຫ້ເຈົ້າໜ້າທີ່ ປກສ ເມືອງ ແລະ ບ້ານກວດກາຄືນ ແລະ ອອກສຳມະໂນຄົວໃຫ້ປະຊາຊົນຢູ່ແຕ່ລະບ້ານ.
ໃນຕອນທ້າຍ ສະຫາຍ ຄຳຫຼ້າ ຜິວວັນນາ ກໍໄດ້ໂອ້ລົມ ແລະ ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດຂອງການນຳພາຈັດຕັ້ງປະຕິບັດວຽກງານດ້ານຕ່າງໆ ທີ່ຍາດມາໄດ້ໄລຍະຜ່ານມາ, ພ້ອມທັງຮຽກຮ້ອງມາຍັງຄະນະພັກແຕ່ລະຂັ້ນ ຈົ່ງເອົາໃຈໃສ່ໃນການຄົ້ນຄວ້າ ຜັນຂະຫຍາຍ ແຜນການຂອງຕົນທີ່ວາງໄວ້ໃນແຕ່ລະໄລຍະ ແລະ ມີການສະຫຼຸບ-ສັງລວມ ເພຶ່ອລາຍງານໃຫ້ຄະນະປະຈຳໄດ້ຮັບຮູ້ ແລະ ຊຸກຍູ້ຕິດຕາມ ເປັນແຕ່ລະໄລຍະ; ສະມາຊິກພັກ, ພະນັກງານຫຼັກແຫຼ່ງທຸກສະຫາຍ ຈົ່ງເຊີດຊູຄວາມເປັນແບບຢ່າງນໍາໜ້າໃນທຸກດ້ານ, ນໍາພາຈັດຕັ້ງປະຕິບັດໃຫ້ເກີດມີໝາກຜົນຕົວຈິງ. ພ້ອມນີ້, ກໍ່ຮຽກຮ້ອງມາຍັງພະນັກງານ, ທະຫານ, ຕໍາຫຼວດ ແລະ ປະຊາຊົນບັນດາເຜົ່າຈົ່ງເຊີດຊູນໍ້າໃຈຮັກຊາດ ແລະ ມານະຈິດບຸກບືນປະຕິບັດຫນ້າທີ່ ໃນການສ້າງສາພັດທະນາເມືອງຫົງສາ ໃຫ້ຈະເລີນຮຸ່ງເຮືອງຂື້ນເລື້ອຍໆ.
ພາບ-ຂ່າວ: ກິດຕິສັກ ບົວໄລ. (ນັກຂ່າວເມືອງຫົງສາ).