ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ສຳເລັດກອງປະຊຸມປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງຫຼວງພະບາງ ຊຸດທີ່ 1

ໃນວັນທີ 11 ມັງກອນ 2019, ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນ ແຂວງຫຼວງພະບາງຊຸດທີ່ 1 ໄດ້ສຳເລັດລົງພາຍຫຼັງທີ່ດຳເນີນມາແຕ່ວັນທີ່ 9 ມັງກອນ ຢູ່ສະໂມສອນໃຫຍ່ຫ້ອງວ່າການປົກຄອງແຂວງຫຼວງພະບາງ, ໂດຍການເປັນປະທານຂອງ ທ່ານ ສາຍສະໝອນ ຄົມທະວົງ, ຮອງເລຂາພັກແຂວງ, ປະທານສະພາປະຊາຊົນແຂວງ, ແລະ ໂດຍມີ ທ່ານ ຄຳຂັນ ຈັນທະວີສຸກ, ກຳມະການສູນກາງພັກ, ເລຂາພັກແຂວງ, ເຂົ້າແຂວງຫຼວງພະບາງ ພ້ອມດ້ວຍ ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະພາປະຊາຊົນແຂວງປະຈຳເມືອງ-ນະຄອນ ແລະ ແຂກຮັບເຊີນເຂົ້າຮ່ວມ.
ໃນກອງປະຊຸມຄັ້ງນີ້, ຜູ້ແທນໄດ້ຮັບຟັງການລາຍງານສະພາບພົ້ນເດັ່ນ ໃນການປະຕິບັດວຽກງານຂອງອົງການປົກຄອງແຂວງ ແລະ ບາງພະແນກການ-ອົງການທຽບເທົ່າ ເປັນຕົ້ນ ແຜນພັດທະນາເສດຖະກິດ-ສັງຄົມ, ແຜນງົບປະມານປະຈຳປີ 2018 ແລະທິດທາງແຜນການ 2019, ວຽກງານລືບລ້າງຄວາມທຸກຍາກ ໃຫ້ປະຊາຊົນຕາມທິດ 3 ສ້າງ ແລະ ຕາມມະຕິ ຂອງກອງປະຊຸມສະພາປະຊາຊົນແຂວງປະຈະປີ 2018 ແລະ ທິດທາງແຜນການ 2019; ວຽກງານຄຸ້ມຄອງ ນຳໃຊ້ທີດິນຂອງລັດ ແລະ ການອອກໃບຕາດິນລັດ ຢູ່ແຂວງໃນປີ 2018 ແລະ ທິດທາງແຜນການ 2019; ອັດຕາການປະລະການຮຽນ ຂອງນັກຮຽນຊັນມັດທະຍົມຕອນຕົ້ນ ແລະ ຕອນປາຍໃນປີ 2018 ແລະ ທິດທາງແຜນການປີ 2019; ການປະຕິບັດ ກິດຈະກຳການທ່ອງທ່ຽວໃນປີ 2018 ແລະທິດທາງແຜນການປີ 2019, ການເຄື່ອນໄຫວວຽກງານ ປີ 2018 ແລະ ທິດທາງແຜນການ 2019 ຂອງອົງການໄອຍະການປະຊາຊົນແຂວງ, ສານປະຊາຊົນແຂວງ, ອົງການກວດສອບ ແລະ ສະພາປະຊາຊົນແຂວງ.
ພ້ອມນີ້, ຜູ້ແທນກອປະຊຸມ ຍັງໄດ້ພິຈາລະນາ ແລະ ຮັບຮອງເອົາ ຂໍ້ຕົກລົງຂອງເຈົ້າແຂວງ ວ່າດ້ວຍການແຕ່ງກາຍ ຂອງສາວບໍລິການຢູ່ຮ້ານອາຫານ ພາຍໃນນະຄອນຫຼວງພະບາງ ແລະ ການຕິດຕັ້ງປ້າຍໂຄສະນາຕ່າງໆ ຢູ່ໃນນະຄອນຫຼວງພະບາງ, ທັງມີການຊີ້ແຈງ ເພີ່ມຕື່ມຈາກພາກພະແນກການ-ອົງການທຽບເທົ່າຂັ້ນແຂວງ ຕໍ່ຄຳຊັກຖາມຂອງສະມາຊິກສະພາ ປະຊາຊົນຂັ້ນແຂວງ ເພື່ອຫາວິທີທາງແກ້ໄຂບັນຫາຄົງຄ້າງໃນຕໍ່ໜ້າ, ພ້ອມທັງລົງປະຊາ ມະຕິຮັບຮອງເອົາແຜນການຂອງທຸກພາກສ່ວນ ທີ່ສະເໜີຕໍ່ກອງປະຊຸມ.
ໃນໂອກາດນີ້, ທ່ານ ສາຍສະໝອນ ຄົມທະວົງ ໄດ້ມີຄຳເຫັນກ່າວປິດກອງປະຊຸມ ໂດຍໄດ້ຊົມເຊີຍຕໍ່ການປະກອບສ່ວນຂອງທຸກພາກສ່ວນ ທີ່ໄດ້ຊ່ວຍເຮັດໃຫ້ການດຳເນີນກອງປະຊຸມປະສົບຜົນສຳເລັດຢ່າງຈົບງາມ ຕາມຄາດໝາຍທີ່ວາງໄວ້.
ພ້ອມນີ້, ທ່ານຍັງໄດ້ຮຽກຮ້ອງມາຍັງບັນດາສະມາຊິກສະພາປະຊາຊົນແຂວງ ໃຫ້ຮີບຮ້ອນນຳເອົາຜົນສຳເລັດຂອງກອງປະຊຸມ ໄປຜັນຂະຫຍາຍ ໃນເຂດເລືອກຕັ້ງຂອງຕົນ ເພື່ອໃຫ້ປະຊາຊົນບັນດາເຜົ່າ ໄດ້ຮັບຮູ້ຢ່າງເລິກເຊິ່ງ ແລະ ທົ່ວເຖິງ.
ທ່ານ ສາຍສະໝອນ ຄົມທະວົງ ໄດ້ກ່າວຕື່ມວ່າ: ໃນວາລະ ກອງປະຊຸມຄັ້ງນີ້, ມີປະຊາຊົນຜູ້ມີສິດເລືອກຕັ້ງ ປະກອບຄຳຄິດ ຄຳເຫັນທີ່ເປັນປະໂຫຍດຕໍ່ ກອງປະຊຸມ ໂດຍຜ່ານສາຍດ່ວນ, ໝາຍເລກ 071 156 ໂດຍບໍ່ເສຍຄ່າ ມີທັງໝົດ 10 ສາຍ 14 ເລື່ອງ ເຊີ່ງຄະນະປະຈຳສະພາປະຊາຊົນແຂວງ ຈະສືບຕໍ່ພົວພັນປະສານງານກັບພາກສ່ວນກ່ຽວຂ້ອງ ເພື່ອຊອກຫາວິທີທາງແກ້ໄຂ ແລະ ໃຫ້ຄຳຕອບ ໃນລະດັບທີ່ເໝາະສົມ ແລະເປັນທຳກັບທຸກພາກສ່ວນ.
ຂ່າວ: ອາພຸດເດດ ບຸບຜາ
ພາບ: ຄຸດແກ້ວ ແສງທະວີ