ກອງປະຊຸມວຽກງານຮ່ວມມືຝຶກອົບຮົມຕໍາຫຼວດອາຊຽນ ຄັ້ງທີ 12 ພາຍໃຕ້ຫົວຂໍ້ “ເພີ່ມທະວີຮ່ວມມືຝຶກອົບຮົມຕຳຫຼວດອາຊຽນ ໃນການຕ້ານອາຊະຍາກຳຂ້າມຊາດ” ໄດ້ສຳເລັດ ໃນວັນທີ 21 ມິຖຸນາ 2024 ທີ່ນະຄອນຫຼວງວຽງຈັນ, ໂດຍການເປັນປະທານຂອງ ພັນເອກ ໂອໄດ ທິລັນດາ ຫົວໜ້າອຳນວຍການວິທະຍາຄານຕຳຫຼວດປະຊາຊົນ, ມີບັນດາຄະນະຜູ້ແທນວິທະຍາຄານຕຳຫຼວດ, ບັນດາປະເທດ ອາຊຽນ, ຄູ່ຮ່ວມເຈລະຈາ ແລະ ຕາງໜ້າປະເທດຜູ້ສັງເກດການ ເຂົ້າຮ່ວມ.
ໃນກອງປະຊຸມ, ບັນດາຜູ້ແທນແຕ່ລະປະເທດ ໄດ້ພ້ອມກັນປຶກສາຫາລືຢ່າງເລິກເຊິ່ງ, ສ້າງສັນ ແລະ ກົງໄປກົງມາ ໃນການແລກປ່ຽນປະສົບການ ແລະ ຂໍ້ມູນຂ່າວສານທີ່ພົວພັນເຖິງວຽກງານການຮ່ວມມືຝຶກອົບຮົມຕໍາຫຼວດອາຊຽນ ພາຍໃຕ້ຫົວຂໍ້ “ເພີ່ມທະວີຮ່ວມມືຝຶກອົບຮົມຕໍາຫຼວດອາຊຽນ ໃນການຕ້ານອາຊະຍາກໍາຂ້າມຊາດ” ເຊິ່ງໄດ້ເຮັດໃຫ້ກອງປະຊຸມມີຜົນສຳເລັດຕາມຈຸດປະສົງ ແລະ ຄາດໝາຍທີ່ໄດ້ວາງໄວ້.
ພັນໂທ ຄໍາຕັນ ບຸນທອນອຸໄທ ຫົວໜ້າຫ້ອງການ ວິທະຍາຄານຕໍາຫຼວດປະຊາຊົນລາວ ກ່າວວ່າ: ກອງປະຊຸມຝຶກອົບຮົມຕໍາຫຼວດອາຊຽນ ແມ່ນກອງປະຊຸມສະຖາບັນການສຶກສາຕຳຫຼວດອາຊຽນ ນອກຈາກ 10 ປະເທດສະມາຊິກອາຊຽນແລ້ວ ຍັງມີ 21 ປະເທດ ເປັນຜູ້ສັງເກດການ ເຊິ່ງກອງປະຊຸມນີ້ແມ່ນໄດ້ຈັດຂຶ້ນທຸກໆປີ ເຊິ່ງຜັດປ່ຽນກັນເປັນເຈົ້າພາບ ໂດຍເອົາວາລະຂອງກອງປະຊຸມສຸດຍອດອາຊຽນ.
ສຳລັບປີນີ້, ວິທະຍາຄານຕຳຫຼວດປະຊາຊົນ ສປປ ລາວ ໄດ້ຮັບກຽດເປັນເຈົ້າພາບໃນຫົວຂໍ້ “ເພີ່ມທະວີໃນການຮ່ວມມືຝຶກອົບຮົບຕ້ານອາຊະຍາກຳຂ້າມຊາດ”; ເຊິ່ງໃນກອງປະຊຸມຄັ້ງນີ້ ມີຫຼາຍປະເທດ, ຫຼາຍສະຖາບັນການສຶກສາ ໄດ້ແລກປ່ຽນຖອດຖອນບົດຮຽນປະສົບການຕ່າງໆຂອງແຕ່ລະປະເທດ ເຊິ່ງເຮັດໃຫ້ກອງປະຊຸມມີເນື້ອໃນ, ມີບົດຮຽນ ແລະ ສາມາດນໍາໄປຈັດຕັ້ງປະຕິບັດໄດ້ ໂດຍສະເພາະແມ່ນ ການຮ່ວມມືຝຶກອົບຮົມຕ້ານອາຊະຍາກຳຂ້າມຊາດ. ນອກນັ້ນ, ກອງປະຊຸມ ຍັງໄດ້ຕີລາຄາວ່າ ປັດຈຸບັນ ບັນຫາອາຊະຍາກຳ ເປັນບັນຫາທີ່ມີຄວາມຫຍຸ້ງຍາກສັບສົນ ເນື່ອງຈາກວ່າການກໍ່ອາຊະຍາກຳປັດຈຸບັນນີ້ ມີການຈັດຕັ້ງພົວພັນກັບຫຼາຍປະເທດ. ສະນັ້ນ, ກຳລັງຕໍາຫຼວດ ຈະຕ້ອງໄດ້ພັດທະນາຮ່ວມມືກັນໃນການຕ້ານອາຊະຍາກໍາຂ້າມຊາດ.
